अदुवा बेचेर सडक- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

अदुवा बेचेर सडक

कान्तिपुर संवाददाता

रुकुम पश्चिम — यहाँका स्थानीले अदुवा बेचेर आएको आम्दानीबाट सडक निर्माण गरेका छन् । त्रिवेणी गाउँपालिका–४ का स्थानीयले एक वर्षमा उत्पादित सम्पूर्ण अदुवा एकमुष्ट बिक्री गरेर गाउँ जोड्ने सडक बनाएका हुन् ।

भालदुलावासीले झण्डै डेढ किलोमिटर सडक निर्माण गरेर गाउँलाई सडकसँग जोडेका छन् । जुग्रुमखोलादेखि कुरल हुँदै झुल्नेटा जोड्ने सडक निर्माण गरेको स्थानीय कल्पना ओलीले बताइन् । २०७३ सालमा १८ घर परिवारले आफूसँगको अदुवा विक्री गरेर सडक निर्माण गरेको ओलीले जानकारी दिइन् । प्रति परिवार १६ हजारका दरले अदुवा विक्री गरेर सोही रकमबाट गाउँ जोड्ने सडक बनाएको उनको भनाइ छ ।

‘हामीसँग नगद थिएन नगदे बाली अदुवा थियो, सबै घर परिवारले एकमुष्ट अदुवा बिक्री गरेर सडक निर्माणमा नगद हालेका हौं,’ स्थानीय रगविर खड्काले भने, ‘नपुग रकम वडापालिकाबाट विनियोजन भएको थियो ।’

सुरुको ट्र्याक ओपन अदुवा विक्री गरेको २ लाख ८८ हजारबाट गरिएको खड्काले बताए । त्यसमा स्थानीयले पनि थप श्रमदान गरेका थिए । त्यसपछिका हरेक वर्ष सडक मर्मतका लागि भने गाउँपालिकाले बजेट दिने गरेको छ । वर्षातमा विग्रे, भत्केको सडक मर्मतमा गाउँपालिकाले घाइरहेको स्थानीयले बताएका छन् । सडक निर्माण भएपछि तलमाथि गर्न सजिलो भएको अर्की स्थानीय ग्वामी खड्काले बताए ।

प्रकाशित : पुस २९, २०७८ १०:१६
प्रतिक्रिया
पठाउनुहोस्

स्वास्थ्यचौकीमा औषधि अभाव

छपाल लामा

हुम्ला — सर्केगाड गाउँपालिका–४ सायास्थित स्वास्थ्यचौकीमा सिटामोललगायत कुनै पनि औषधी छैन । औषधि सकिएपछि स्वास्थ्यकर्मीहरू स्वास्थ्चौकी खोल्ने र बन्द गर्ने गरेरमात्र दिन बिताउन बाध्य छन् । स्वास्थ्यचौकीमा औषधि नभएपछि बिरामीसमेत त्यहाँ जान छोडेका छन् ।

स्वास्थ्यचौकीमा औषधिको अभाव भएपछि उपचार प्रभावित भएको । मौसमी ज्वरोका कारण गाउँमा अधिकांश बालबालिका र ज्येष्ठ नागरिक बिरामी परे पनि झण्डै २ महिनादेखि स्वास्थ्यचौकीमा औषधिको अभाव छ । स्वास्थ्यचौकीमा उपचार गर्न जाँदा रित्तोहात फर्कनुपरेपछि जान छोडिएको स्थानीय मंगला विकले बताइन् । ‘त्यहाँ गएर के गर्ने ? ,’ उनले भनिन्, ‘स्वास्थ्यकर्मीले चेकजाँच गर्छन् अनि औषधि किन्न मेडिकलमा पठाउँछन्, त्योभन्दा मेडिकलमै जचाएको बेस ।’ उनले गाउँमा मेडिकल नहुँदा औषधि किन्न गाउँपालिकाको केन्द्र सर्केगाड जानुपर्ने बाध्यता भएको बताइन् ।

यसअघि स्वास्थ्यचौकीमा दैनिक १५ देखि २० जनासम्म बिरामी उपचार गर्न जाने गरेका थिए । अनमी बिजौरा शाहीले गाउँभरि विभिन्न रोगका बिरामी बढ्दै गए पनि औषधिको अभाव हुँदा उपचार गर्न समस्या भएको बताए । उनले गाउँपालिकाले औषधि खरिदमा कुनै ध्यान नदिएको गुनासो गरिन् । ‘सबैभन्दा बढी बिरामीहरूलाई सिटामोल दिन्थ्यौं,’ उनले भने, ‘अहिले त्यो पनि नभएपछि स्थानीयबासी उपचारबाट वञ्चित छन् ।’ उनका अनुसार गाउँमा टाउको दुख्ने, ज्वरो आउने, शरिर दुख्नेलगायत स्वास्थ्य समस्याका बिरामी घरघरै छन् । उनले हिमपातपछि ज्येष्ठ नागरिकमा दमको समस्या देखिन थालेको बताए ।

स्वास्थ्यचौकीका अहेव धर्मराज शाहीले औषधि अभाव हुँदा बिरामीको गाली खानु परेको सुनाए । ‘औषधि त छैन, तर स्वास्थ्यचौकी खौल्नैपर्‍यो,’ उनले भने, ‘दिनभरि स्वास्थ्यचौकी खोलेर दिन कटाउनुपर्ने बाध्यता छ ।’ उनले औषधि खरिदको व्यवस्था मिलाउन गाउँपालिकालाई पटकपटक आग्रह गरे पनि बेवास्ता भएको गुनासो गरे ।

हुम्लाका अधिकांश स्वास्थ्यचौकीमा औषधि अभाव देखिएको नाम्खा–६ का वडाध्यक्ष पाल्जोर तामाङले बताए । हिउँदका ६ महिना हिउँले लिमीको बाटो बन्द हुँदा लिमीमा सधैं औषधिको अभाव हुने उनले गुनासो गरे । ‘कुनैबेला औषधि हुँदैन, कुनैबेला स्वास्थ्यकर्मी,’ उनले भने, ‘अहिले कोही बिरामी परे हेलिकोप्टर चार्टरको विकल्प छैन ।’ उनका अनुसार लिमीबाट नेपालगन्ज र सुर्खेत हेलिकोप्टर चार्टर गरेबापत कम्पनीहरूले झन्डै १० लाख रुपैयाँसम्म लिने गरेका छन् ।

प्रकाशित : पुस २९, २०७८ १०:१४
पूरा पढ्नुहोस्
प्रतिक्रिया
पठाउनुहोस्
×