डोल्पा कांग्रेस सभापतिमा दीपेन्द्रबहादुर शाही निर्वाचित
रुकुम पश्चिम — कांग्रेस डोल्पाको सभापतिमा दीपेन्द्रबहादुर शाही निर्वाचित भएका छन् । बुधबार बिहान सकिएको मतगणनाअनुसार २ सय ३७ मत प्राप्त गरी शाही सभापति बनेका हुन् । अर्का उम्मेदवार अंगदकुमार बुढाको पक्षमा १ सय ५८ मत परेको छ ।
सभापतिका अर्का उम्मेदवार गौरीशंकर उपाध्यायले २३ मत ल्याए । मनोनयन गरेर पछि छाडेकी दूधकुमारी हमालको नाममा पनि ११ मत परेको छ । शाही देउवा पक्षका नेता हुन् । जिल्ला कार्य समितिका अन्य पदाधिकारीमा पनि शाहीकै प्यानलका उम्मेदवार विजयी बनेका छन् ।
उपसभातिमा पूर्णबहादुर शाही र लवकुमार शाही निर्वाचित भएका छन् । सचिवमा दशरथ रोकाय र हिक्मतबहादुर शाही विजयी हुँदा सुरेन्द्रप्रसाद महत र लक्ष्मणकुमार शाही सहसचिवमा निर्वाचित भएका छन् ।
५ सय १९ मतदातामध्ये ४ सय ३९ मत खसेको थियो । महाधिवेशन प्रतिनिधितर्फको मत गणना हुन बाँकी रहेको निर्वाचन अधिकृत रामकुमार श्रेष्ठले जानकारी दिए ।
प्रकाशित : मंसिर ८, २०७८ १३:००