सल्यानमा ३ महिनामा ४२ सवारी दुर्घटना- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

सल्यानमा ३ महिनामा ४२ सवारी दुर्घटना

विप्लव महर्जन

सल्यान — जिल्लामा पछिल्लो ३ महिनामा ४२ सवारी दुर्घटना भएका छन् । सडकको दूरावस्था तथा तीव्र गतिमा सवारी साधन चलाउँदा दुर्घटनामा बढेको हो ।

सवारी दुर्घटनामा ८ जनाको मृत्यु भएको छ भने ८४ जना घाइते भएका छन् । ३ महिनाको अवधिको उक्त दुर्घटनामा १० ट्रक, ८ बस, १२ जीप, १२ मोटरसाइकल, एक ट्याक्टर र अन्य छ सवारी दुर्घटनामा परेको ट्राफिक कार्यालय सल्यानले जनाएको छ । ट्राफिक कार्यालय सल्यानका प्रहरी नायब निरीक्षक दिपेन्द्रबहादुर केसीका अनुसार साउनमा १८, भदौमा १६ र असोजमा ८ साना–ठूला सवारी दुर्घटनामा परेका छन् ।

ट्रफिक नियम पालना नगर्ने र सडकको अवस्था समेत नहेरी चालक, सहचालकले मनपरी तीव्र गतिमा सवारी हुँइक्याउने गरेकै कारण सडक दुर्घटना बढ्दै गएको उनले जानकारी दिए । ‘जिल्लाका अधिकांश कच्ची सडकमा खाल्डाखुल्डी छन् । पानी पर्नेे बित्तिकै हिलाम्मे हुने गर्छन् । सडकको दूरावस्था भएको देख्दादेख्दै व्यवसायीले छिटो रकम कमाउने लालचमा परेर क्षमता भन्दा बढी यात्रु हाल्छन् र अन्य कुरामा खासै ध्यान दिँदैनन् । सोही कारण दुर्घटना बढ्दै गएको छ,’ उनले भने ।

३ महिनामा ४२ सवारी साधन दुर्घटना परे पनि ठूलो मानवीय क्षति भने नभएको उनी बताउँछन् । ‘दुर्घटना न्यूनीकरणका लागि प्रहरी तथा ट्राफिकले बारम्बार चालक, सहचालक तथा गाडी धनीलाई तालिम, प्रशिक्षण दिँदै आएको छ,’ उनले भने, ‘गाडी व्यवसायीले बेवास्ता गर्दै आएका छन् । जसका कारण समस्या जस्ताको तस्तै छ ।’ दुर्घटनाबाट बच्नका लागि चालक, सहचालकले सुरुमा सवारी साधन जाँच गर्न उनी सुझाउँछन् ।

जिल्लामा सवारी दुर्घटनाको कारण भने सडकको दूरावस्था, घुम्ती, तीव्र गति मात्र नभई कारण धेरै देखिएको जिल्ला प्रहरी कार्यालय सल्यानका प्रहरी नायब उपरीक्षक गोविन्द बताउँछन् । गाडी दुर्घटनाबाट बच्नका लागि अनिवार्य ट्राफिक नियम पालना गर्न र सडकको अवस्था हेरी सवारी साधन चलाउन उनले आग्रह गरेका छन् ।

प्रकाशित : कार्तिक ६, २०७८ १२:३९
प्रतिक्रिया
पठाउनुहोस्

चीनले आफ्नो विकास मोडल निर्यात गर्दैन तर अनुभव बाँड्छ : चिनियाँ परराष्ट्रमन्त्री यी

निवर्तमान नेपाली राजदूत पाण्डे बिदाइ भेटमा व्यस्त
लक्ष्मी लम्साल

बेइजिङ — चीनका परराष्ट्रमन्त्री वाङ यीले चीनले आफ्नो विकास मोडल निर्यात नगर्ने तर नेपाल लगायत देशहरूसँग अनुभव साझा गर्न इच्छुक रहेको बताएका छन् ।

बिहीबार निवर्तमान राजदूत महेन्द्रबहादुर पाण्डेसँगको बिदाइ भेटमा उनले भने, ‘चीनले विकास मोडल निर्यात गर्दैन, अन्य देशको आन्तरिक मामिलामा हस्तक्षेप पनि गर्दैन तर नेपाललगायत देशहरूसँग अनुभव बाँड्न र आदानप्रदानलाई सुदृढ गर्न इच्छुक छ।’

नेपाल सरकारको निर्णय बमोजिम बेइजिङ समयअनुसार मंगलबार राति नेपाल फर्किन लागेका पाण्डे बिदाइ भेटघाटमा व्यस्त भएका छन् । पछिल्लो पटक उनले चिनियाँ परराष्ट्रमन्त्री वाङ यीका साथै शाङहाइ सहयोग संगठनका अध्यक्ष लगायतसँग बिदाइ भेट गरेका हुन् । बेइजिङमा चिनियाँ परराष्ट्रमन्त्री वाङ यीले नेपालको राजनीतिक स्थायित्व, राष्ट्रिय एकता र जनताको सुख र विकासमा थप उपलब्धिको कामना गरेको पाण्डेले जानकारी दिए ।

वाङ यीसँगको भेटमा निवर्तमान राजदूत पाण्डेले कोभिड १९ महामारीविरूद्धको लडाइँमा चीनले हासिल गरेको सफलता र चीनको आर्थिक तथा सामाजिक विकासमा प्राप्त सफलताको साक्षी बन्न पाएकोमा सन्तुष्टि व्यक्त गरे । चिनियाँ कम्युनिष्ट पार्टीको बलियो नेतृत्व, वैज्ञानिक योजना र ‘जनता पहिले’ भन्ने शासकीय अवधारणा नेपाललगायत विकासोन्मुख देशका लागि सान्दर्भिक रहेको भन्दै पाण्डेले नेपाल र चीनबीचको मित्रता प्रवर्द्धन र ‘बेल्ट एण्ड रोड’ सहकार्यको संयुक्त निर्माणका लागि नेपाली पक्ष निरन्तर सहकार्य गर्न इच्छुक रहेको बताए। उनले भने, ‘अन्तर्राष्ट्रिय र क्षेत्रीय मामिलामा चीनले अझ ठूलो भूमिका खेल्नेछ भन्ने आशा र विश्वास छ।’

विदेशमन्त्री यीले नेपालको पूर्व परराष्ट्रमन्त्री तथा चीनका लागि राजदूतका रूपमा पाण्डेले चीन–नेपाल मित्रतामा सकारात्मक योगदान पुर्‍याएको भन्दै प्रशंसा गरे । उनले चीन र नेपालबीच पुस्तौंदेखिको मित्रता रहेको र दुई देशबीचको परम्परागत मित्रतालाई संयुक्त रुपमा अझ प्रगाढ बनाएको भन्दै महामारी विरुद्ध लड्न, द्विपक्षीय सम्बन्धमा निरन्तर नयाँ प्रगति प्रवर्द्धन गर्न र क्षेत्रीय शान्ति, स्थिरता र समृद्धि कायम गर्न दुवै पक्षले मिलेर काम गर्नुपर्ने बताएको चीनको परराष्ट्र मन्त्रालयको सार्वजनिक कूटनीति कार्यालयद्वारा जारी समाचारमा जनाइएको छ ।

निवर्तमान राजदूत पाण्डेले शाङहाइ सहयोग संगठनका महासचिव भ्लादिमिर नोरोभसँग बेइजिङमै भेटवार्ता गरेका हुन् । सन् २००१ मा शाङहाइमा स्थापना भएको यो संगठनको नेपाल ‘डायलग पार्टनर’ को रूपमा रहेको छ । नेपाल यो संगठनमा सक्रियतापूर्वक लागिरहेको बताउँदै नोरोभले नेपालका थिंक ट्यांक र योजनाविदहरूको ठोस विकास अवधारणाबारेमा जान्न खोजेको पाण्डेले कान्तिपुरलाई जानकारी दिए ।

यसैगरी पाण्डेले चीनको परराष्ट्र मन्त्रालय, एसियाली विभागका महानिर्देशक लिउ चिनसुङसँग बिदाइ भेट गरे । भेटमा पाण्डेले चिनियाँ कम्युनिष्ट पार्टीको शतवार्षिकी, गरिबी निवारण, विभिन्न प्रान्तको विकासको अनुभव गर्न पाएको बताउँदै यसबाट नेपालका लागि नयाँ विचार सिर्जना गर्न सघाएको टिप्पणी गरे । प्रत्युत्तरमा महानिर्देशक लिउले चीनले नजीकको छिमेकी नेपाललाई सानो ठूलो नभनीकन महत्व दिएको बताए ।

प्रकाशित : कार्तिक ६, २०७८ १२:३६
पूरा पढ्नुहोस्
प्रतिक्रिया
पठाउनुहोस्
×