सल्यानमा खोलाले बगाएर एक जनाको मृत्यु- कर्णाली - कान्तिपुर समाचार

सल्यानमा खोलाले बगाएर एक जनाको मृत्यु

विप्लव महर्जन

सल्यान — लगातार चार दिनको वर्षातपछि खोलामा आएको बाढीले बगाएर सल्यानमा बन्गाड कुपिण्डे नगरपालिका–११ माझकाँडाका एक पुरुषको मृत्यु भएको छ ।

शुक्रबार दिउँसो खेतमा लगाएको धान हेर्न जाने क्रममा माझकाँडा खोलाले बगाउँदा ६० वर्षीय लिले बुढाको मृत्यु भएको हो ।

खोला तर्ने क्रममा बगेका उनी खोलादेखि २०/२५ मिटर तल मृत अवस्थामा भेटिएको स्थानीयले खबर गरेको जिल्ला प्रहरी कार्यालय सल्यानका सूचना अधिकारी तथा प्रहरी प्रवक्ता अर्जुन पौडेलले बताए ।

खोलाले बगाएर मृत्यु भएका बुढाको शव पोष्टमार्टमका लागि जिल्ला अस्पताल ल्याइएको उनले जानकारी गराए । खोलाले बगाएर बुढाको मृत्यु भएपनि थप अनुसन्धान भइरहेको उनको भनाइ छ ।

प्रकाशित : कार्तिक ५, २०७८ १७:३२
प्रतिक्रिया
पठाउनुहोस्

बाढीपहिरो र डुबानमा परी हालसम्म १११ को मृत्यु, ३७ जना अझै बेपत्ता

कान्तिपुर संवाददाता

काठमाडौँ — अविरल वर्षाको कारण कात्तिक १ गतेदेखि देशका विभिन्न स्थानमा आएको बाढीपहिरो र डुबानमा परी शुक्रबार दिउँसोसम्म १ सय ११ जनाको मृत्यु भएको छ । नेपाल प्रहरीकाअनुसार बाढी पहिरोमा परी १ नम्बर प्रदेशमा ६५ जना, वाग्मती प्रदेशमा १ जना, गण्डकी प्रदेशमा २ जना, लुम्बिनी प्रदेशमा ४ जना, कर्णाली प्रदेशमा ७ जना र सुदूरपश्चिम प्रदेशमा ३२ जना गरी जम्मा १ सय ११ जनाको मृत्यु भएको छ ।

जसमध्ये १ नम्बर प्रदेशमा २१ जना, कर्णाली प्रदेशमा ४ जना र सुदूरपश्चिम प्रदेशमा १७ जना गरी जम्मा ४२ जना घाइते भएका छन् । घाइतेहरूलाई उपचारको लागि स्थानीय अस्पताल लगिएको छ । बाढी पहिरोमा परी १ नम्बर प्रदेशमा ११ जना, २ नम्बर प्रदेशमा १ जना, लुम्बिनी प्रदेशमा १ जना, कर्णाली प्रदेशमा १ जना र सुदूरपश्चिम प्रदेशमा २३ जना गरी जम्मा ३७ जना वेपत्ता भएका छन् । वेपत्ताको खोजी कार्य जारी छ ।

बाढीको कारण जम्मा २ हजार २ सय ३२ वटा घर डुबानमा परेका छन् । ७८ वटा घर, १६ वटा गोठ, ६ वटा पुल, १ वटा विद्यालय र ३ वटा सरकारी कार्यालयमा क्षति पुगेको छ । १ सय ८६ वटा पशु चौपायाको मृत्यु भएको छ । उक्त अवधिमा विपद्‍का घटनाबाट १ हजार १ सय ८८ वटा घर परिवार विस्थापित भएका छन् ।

साथै बाढी पहिरोको जोखिममा रहेका विभिन्न जिल्लाका विभिन्न घर परिवारलाई सुरक्षित स्थानमा राख्ने, पहिरोमा पुरिएका धनमाल निकालेर सुरक्षा गर्ने काम समेत विभिन्न निकाय र स्थानीयवासीको समन्वय र सहयोगमा गर्नुका साथै विभिन्न स्थानमा भएको बाटो अवरोध समेत प्रहरीले हटाउने कार्य गरिरहेको छ ।

प्रकाशित : कार्तिक ५, २०७८ १७:२६
पूरा पढ्नुहोस्
प्रतिक्रिया
पठाउनुहोस्
×