५ दिने यात्रापछि ८५ वर्षीया रारामा- कर्णाली - कान्तिपुर समाचार

५ दिने यात्रापछि ८५ वर्षीया रारामा

राजबहादुर शाही

मुगु — खोटाङको दिक्तेलकी ८५ वर्षीया पवित्रा भट्टराई पर्यटक बनेर सडक मार्गबाट रारा पुगेकी छन् । ५ दिनको जिप यात्रापछि उनी रारा पुगेकी हुन् । रारा घुमेर फर्किएका एक आफन्तबाट राराको वर्णन सुनेकी उनलाई २ वर्षदेखि रारा आउने हुटहुटी चलेको थियो । ‘राराको सुन्दरता साँच्चिकै शब्दमा वर्णन गर्न नसकिने रहेछ,’ उनले भनिन्, ‘बाटोको मनमोहक दृश्य अनि राराको सुन्दरताले मनै छोयो ।’

रारा पुग्ने उनको तीव्र इच्छापछि उनका छोरा विशाल भट्टराईले रारा पुग्ने व्यवस्था मिलाएका हुन् । जिपबाट खोटाङ–काठमाडौं–नेपालगन्ज–सुर्खेत हुँदै उनीहरू रारा पुगेका हुन् ।

कति बेला रारा देखौँला भन्ने उत्सुकताले यात्रामा कुनै थकानको महसुस नभएको भट्टराईले बताइन् । ‘जीवनको उत्तरार्धमा भए पनि रारा देख्न पाइयो,’ उनले भनिन्, ‘फेवातालभन्दा रारा कैयौं गुणा सुन्दर रहेछ ।’ उनले शनिबार दिनभरि डुंगामा बसेर रारातालको सयर गरिन् । स्थानीय रहनसहन, कर्णाली राजमार्ग, कर्णाली नदीलगायतले पनि आफूलाई लोभ्याएको उनको भनाइ छ ।

पौडेल आइतबार भने घोडा चढेर रारा आसपासका गाउँमा घुम्न गइन् । रारामा एक रात बसेर मार्सी चामलको भातको स्वाद चाख्न पाउँदा धेरै खुसी लागेको उनको भनाइ छ । ‘सरकारले रारातालको संरक्षण गर्न जरुरी छ, यहाँको प्राकृतिक सुन्दरतालाई कायम गर्न सके लाखौं विदेशी पर्यटक रारामा ल्याउन सकिन्छ,’ उनले भनिन्, ‘पूर्वाधार अभावमा पनि रारा ओझेलमा परेको छ, सरकारले यसमा ध्यान दिन जरुरी छ ।’

रारा आएर विभिन्न प्रजातिका हिमाली वन्यजन्तु र चराहरू देख्न पाएको उनले बताइन् । ‘रारा आउने सडक जीर्ण हुँदा केही दुःख भोग्नुपर्‍यो, तर पनि राराको सुन्दरताले सबै थकान मेटायो,’ उनले भनिन्, ‘आएका पर्यटकको सुविधाका लागि रारा नजिक १०/१५ वटा होटलको व्यवस्था गर्न सके पर्यटकलाई आकर्षित गर्न सकिन्छ ।’ कोठा नपाएर टेन्टमा बास बस्नुपरेको उनीसँगै घुम्न आएकी मञ्जु पोखरेलले बताइन् ।

दसैं सुरु भएसँगै बिदाको मौका पारी रारा घुम्न आउनेहरूको संख्या बढ्दै गएको छ । अहिले दैनिक १ सयसम्म आन्तरिक पर्यटक रारा घुम्न आएको रारा राष्ट्रिय निकुञ्जका संरक्षण अधिकृत बद्रिविनोद दाहालले बताए । उनका अनुसार रारामा आन्तरिक पर्यटकको चाप बढ्न थालेपछि होटल व्यवसायी, डुंगा चालक र घोडा व्यवसायीको समेत व्यस्तता बढेको छ ।

प्रकाशित : आश्विन २५, २०७८ १२:३६
प्रतिक्रिया
पठाउनुहोस्

नेपाल भारतबीच नजिकको सम्बन्ध रहेकाले कहिलेकाहीँ समस्या आउनु स्वभाविक हो : महत

रासस

काठमाडौँ — भारत भ्रमणमा रहेका कांग्रेस सहमहामन्त्री प्रकाशशरण महतले नेपाल र भारतकाबीच सदियौं पुरानो र नजिकको सम्बन्ध रहेकाले समय समयमा दुई देशबीचको सम्बन्धमा समस्या देखापर्नु स्वभाविकै हो बताएका छन् ।

आइतबार वनारसस्थित वनारस हिन्दू विश्वविद्यालय (वीएचयू) मा आयोजित एक कार्यक्रमलाई सम्बोधन गर्दै उनले भने, 'नेपाल भारतबीच धार्मिक, आर्थिक, सांस्कृतिकलगायतका धेरै क्षेत्रमा सयौं वर्षदेखिको सम्बन्ध हो, धेरै नजिक भएका नाताले पनि कहिलेकाहीँ कुनै विषयमा असमझदारी देखिनु पनि स्वभाविक हो ।'

विश्वविद्यालयको नेपाल अध्ययन केन्द्र र दिनदयाल अध्ययन केन्द्रद्वारा आयोजित अन्तक्र्रियामा उनले भने, 'धेरै नजिक भएपछि सम्बन्धमा कुनै बेला असमझदारी पनि बढ्छ, कुनै विषयमा विवाद पनि आउन सक्छ, त्यसैले यी सबै विषयलाई दुवै तर्फबाट वार्ताको टेबलमा बसेर निकास निकाल्नुपर्छ, समस्या देखियो भने वार्ताबाटै समाधान पहिल्याउनुपर्छ ।' उनले दुई देशबीचको सम्बन्धलाई विश्वासका आधारमा बलियो बनाउनुपर्ने बताए ।

पूर्वपरराष्ट्रमन्त्रीसमेत रहेका महतले यसभन्दा अघिल्लो केपी ओली सरकारको अस्थिर र अपरिपक्व परराष्ट्र नीतिका कारण दुई देशका बीचमा असमझदारी बढेको धारणा राखेका थिए । वर्तमान सरकारले विश्वासमा आधाारित रहेर आफ्ना छिमेकी एवं विश्व समुदायसँग सन्तुलित र परिपक्व परराष्ट्र नीति अख्तियार गर्ने धारणा पनि उनले राखे ।

भारतीय जनता पार्टीको आमन्त्रणमा चार दिनअघि भारत भ्रमणमा गएको सो प्रतिनिधिमण्डलमा कांग्रेसका नेता उदय शमशेर राणा र अजय चौरसिया छन् । सो प्रतिनिधिमण्डलले भारतीय जनता पार्टीका अध्यक्ष जेपी नड्डा, भारतीय विदेशमन्त्री एस जयशंकर, उत्तर प्रदेशका मुख्यमन्त्री योगी आदित्यनाथसँग भेटवार्ता गरेको थियो ।

प्रकाशित : आश्विन २५, २०७८ १२:३३
पूरा पढ्नुहोस्
प्रतिक्रिया
पठाउनुहोस्
×