सम्बन्धविच्छेद बढ्दै- कर्णाली - कान्तिपुर समाचार

सम्बन्धविच्छेद बढ्दै

कान्तिपुर संवाददाता

सल्यान — कुमाख गाउँपालिका–७ पैयाखोलाकी २२ वर्षीया कल्पना बोहराले पति उमेश रावतले मदिरा सेवन गरी शारीरिक र मानसिक यातना दिएको भन्दै असार २० गते जिल्ला अदालतमा सम्बन्धविच्छेदको मुद्दा दर्ता गरिन् ।

अदालतले अहिले पीडित र पीडक पक्षलाई बोलाएर छलफल प्रक्रिया अघि बढाएको छ । कालीमाटी –७ घुइयाबारीकी लालमाया घर्तीले पनि पति रेवानसिं घर्तीमगरसँग लामो समयदेखि खटपट भएको भन्दै मुद्दा दर्ता गरेकी छन् । उनले दिएको मुद्दा पनि अदालतमा विचाराधीन छ ।

पछिल्नो समय कानुनले सम्बन्धविच्छेद गर्ने अधिकार पुरुषलाई पनि दिएपछि यो संख्या झन् बढेको हो । गत आर्थिक वर्षमा अदालतमा १ सय ८ थान सम्बन्धविच्छेदको मुद्दा दर्ता भएका थिए । त्यसमध्ये ७४ थान फैसला भएका छन् । गत वर्षको जिम्मेवारी सरेर आएका र यो वर्ष दर्ता भएका १ सय ६३ थान मुद्दा फैसला भएको अदालतका स्रेस्तेदार हेमन्त ज्ञवालीले बताए । उनका अनुसार बर्सेनि झन्डै दोब्बरको संख्यामा सम्बन्धविच्छेदका मुद्दा दर्ता भइरहेका छन् । सम्बन्धविच्छेदको पहिलो कारण बालविवाह भएको ज्ञवालीले बताए । उनका अनुसार सानै उमेरमा विवाह गरेकाहरू उमेर परिपक्व भएपछि विभिन्न बहानामा सम्बन्धविच्छेद गर्न खोज्छन् । प्रविधिको विकास र घरेलु हिंसाले पनि सम्बन्धविच्छेद बढाएको अदालतले जनाएको छ ।

अदालतमा पर्ने सबै मुद्दामध्ये झन्डै ३० प्रतिशत मुद्दा सम्बन्धविच्छेदका भएको ज्ञवालीले बताए । त्यसमध्ये २२ वर्षदेखि ३० वर्ष उमेर समूहमा सम्बन्धविच्छेद गर्नेको संख्या धेरै छ । कानुन व्यवसायी विष्णु शर्माले वैदेशिक रोजगारीले पनि सम्बन्धविच्छेद बढेको बताइन् । ‘पति विदेशमा हुँदा र महिला नेपालमा बस्दा परपुरुषसँग सम्बन्ध भएर पनि सम्बन्धविच्छेद बढेको छ,’ उनले भनिन्, ‘महिला पहिलाभन्दा बढी सचेत हुँदा पनि मुद्दा बढेका हुन् ।’ इन्सेक जिल्ला प्रतिनिधि मीना बुढाथोकीले बालविवाह, वैदेशिक रोजगारी, जथाभावी सम्बन्धलगायतले सम्बन्धविच्छेद बढिरहेको बताइन् ।

प्रकाशित : आश्विन ११, २०७८ १०:४२
प्रतिक्रिया
पठाउनुहोस्

सिमकोटमा छुटमा चामल

कान्तिपुर संवाददाता

हुम्ला — हुम्ला सदरमुकाम सिमकोटमा पहिलोपल्ट सुपथ मूल्य पसल सञ्चालन गरी छुटमा चामल बिक्री गर्न थालिएको छ । दसैं–तिहारलगायतका चाडपर्वलाई लक्षित गरी पहिलोपल्ट छुटमा चामल बिक्री गर्न लागिएको हो ।

खाद्य व्यवस्था तथा व्यापार कम्पनी लिमिटेडले प्रतिक्विन्टल ५ सय रुपैयाँ छुटमा चामल बिक्री गर्ने गरी पसल सञ्चालनमा ल्याएको हो ।

विगत वर्षमा दसैंतिहारको समयमा चामलको अभाव हुँदा हुम्लामा सुपथ मूल्य पसल सञ्चालनमा आउन सकेको थिएन । केन्द्रबाट २ हजार ३ सय क्विन्टल चामलमा छुट दिने गरी पसल सञ्चालन गर्न अनुमति पाइएको कम्पनीका शाखा प्रमुख कृष्णप्रसाद अधिकारीले बताए । उनका अनुसार कम्पनीले २५ र ३० केजी बोरामा चामल बिक्री गरिरहेको छ । कम्पनीले २५ र ३० किलोका एक बोरा चामलमा १ सय २५ र एक क्विन्टल चामलमा ५ सय रुपैयाँ छुट दिइने जनाएको छ ।

अन्य डिपो तथा बिक्री केन्द्रहरूमा भने स्थायी कर्मचारी नभएकाले सुपथ मूल्य पसल सञ्चालन हुने छैनन् । सदरमुकामबाहिरका डिपोहरूमा भने अहिले चामलको मौज्दात छैन । ढुवानी समस्याका कारण नाम्खा, खार्पुनाथ, सर्केगार्ड, चंखेली, अदानचुली र ताजाकोटका ८ डिपोमा चामल सकिएको छ ।

प्रकाशित : आश्विन ११, २०७८ १०:४०
पूरा पढ्नुहोस्
प्रतिक्रिया
पठाउनुहोस्
×