गाडी चढ्नै डर- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

गाडी चढ्नै डर

‘डोजर अपरेटरले जता मन लाग्यो त्यतै बाटो खन्दा हामीले वर्षौंदेखि दुःख पाइरहेका छौं’
विप्लव महर्जन

सल्यान — वर्षाका कारण जिल्लाका ग्रामीण सडकहरू क्षतविक्षत भएपछि यात्रुहरू गाडी चढ्नै डराउन थालेका छन् । वर्षाका कारण ठाउँठाउँमा पहिरो र हिलाम्मे सडक हुँदा यात्रा जोखिमपूर्ण बनेको हो ।


कालीमाटी– दम्दबाली सडकखण्डको झन्डै २० ठाउँमा पहिरो खसेको कालिमाटी गाउँपालिका–५ का नोखिराम बस्नेतले बताए । ‘अब त गाडी चढ्नै डर लाग्न थाल्यो,’ उनले भने, ‘हिँड्दाहिँड्दै पहिरोले गाडी पुर्ने हो कि भन्ने डर हुन्छ ।’ उनका अनुसार दम्दबालीबाट सुर्खेत र सदरमुकाम खलंगा जाने सडकको पनि अवस्था नाजुक भएको बताए । ‘सुर्खेत र खलंगा जाँदा फसेको ठाउँमा गाडी धकेल्दै यात्रा गर्नुपर्ने बाध्यता छ,’ उनले भने, ‘गाडी चिप्लिएर दुर्घटना हुने जोखिम पनि उत्तिकै हुन्छ ।’

हिलाम्मे सडकका कारण गाडी गन्तव्यमा नपुग्दासम्म डरैडरमा यात्रा गर्नुपर्ने बाध्यता भएको कुमाख गाउँपालिकास्थित स्यानिपिप्लीका दयाराम बोहराले बताए । ‘बरु पैदलै यात्राको भर छ,’ उनले भने, ‘गाडी चढे पनि ठाउँठाउँमा धकेल्दै यात्रा गर्नुपर्ने बाध्यता हुन्छ ।’ उनका अनुसार हिलोका कारण गन्तव्यमा पुग्दासम्म यात्रुले लगाएका कपडा कामै नलाग्ने हुन्छन् ।

हिउँदमा डेढ घण्टामै पुगिने सल्लीबजार–चौरजहारी सडकको यात्रा ४/५ घण्टामा लम्बिएको उनले बताए । बर्सेनि सल्ली–चौरजहारी सडक स्तरोन्नतिका लागि करोडौं रकम खर्च हुने गरे पनि गुणस्तरीय काम नहुँदा यात्रुले सधैं दुःख पाइरहेको उनको भनाइ छ । बाग्चौर नगरपालिकाको पातिहाल्नादेखि खलंगा पुग्ने सडकको पनि हालत उस्तै छ । सडकमा गाडी चल्न लागेकाो झन्डै १५ वर्ष बिते पनि नाली नहुँदा सडक ठाउँठाउँमा चिरा परेको छ । पहिरो र खाल्डाखुल्डीका कारण पनि यात्रा जोखिमपूर्ण बनेको स्थानीय शेरबहादुर रोकाले बताए । ‘सडककै कारण बिरामीले बाटोमै ज्यान गुमाउनुपर्ने बाध्यता छ,’ उनले भने, ‘ठूला गाडीको के कुरा मोटरसाइकल पनि धकेल्दै गुडाउनुपर्छ ।’

सडक डिभिजन कार्यालयले खनेका भन्दा स्थानीय तहले निर्माण गरेका सडकमा बढी दुःख पाउन थालेको भल्चौरका हर्कबहादुर भण्डारीले बताए । ‘जताततै सडक खन्ने काम मात्र हुन्छ, तर स्तरोन्नतिमा स्थानीय सरकारको ध्यान जाँदैन,’ उनले भने, ‘डोजर अपरेटरले जता मन लाग्यो त्यतै बाटो खन्दा कहामीले वर्षौंदेखि दुःख पाइरहेका छौं ।’ पुल नहुँदा कैयौं ठाउँमा खोलाले गाडी बगाउने गरेको उनले बताए । वर्षा अझै नरोकिएका कारण सडक मर्मतमा समस्या भएको स्थानीय जनप्रतिनिधिको भनाइ छ । अवरुद्ध भएका र पहिरोले क्षति पुर्‍याएका सडक मर्मतको तयारी थालिएको शारदा नगरपालिकाका निमित्त प्रमुख प्रशासकीय अधिकृत लीलाधर बबालले बताए । पर्याप्त बजेट नहुँदा सडक मर्मतमा समस्या भएको कालीमाटी गाउँपालिका अध्यक्ष दानबहादुर खत्रीले बताए ।

प्रकाशित : आश्विन ६, २०७८ १२:११
प्रतिक्रिया
पठाउनुहोस्

क्विन्टल चामलमा ५ सय छुट

कान्तिपुर संवाददाता

रुकुम पश्चिम — दसैं–तिहारलाई लक्षित गरी साविकको मूल्यभन्दा ५ सय रुपैयाँ सस्तोमा चामल बिक्री गर्न लागिएको छ । खाद्य व्यवस्था तथा व्यापार कम्पनी लिमिटेडबाट चामल खरिद गर्नेहरूले प्रतिक्विन्टल ५ सय रुपैयाँ सस्तोमा चामल पाइरहेको छन् । 

कम्पनीमा अहिले २ किसिमको चामल बिक्री भइरहेको छ । अरुवा मोटो र अरुवा सोना मन्सुली चामल किन्ने ग्राहकलाई क्विन्टलमा ५ सय रुपैयाँ छुट दिइरहेको कम्पनीका निमित्त प्रमुख चन्द्रबहादुर खड्काले बताए । उनका अनुसार यसअघि प्रतिक्विन्टल ४ हजार ६ सयमा बिक्री भइरहेको अरुवा मोटो चामल अहिले ४ हजार १ सय रुपैयाँमा बिक्री भइरहेको छ । ४ हजार ८ सय पर्ने चामल ४ हजार ३ सय रुपैयाँमा उपभोक्ताले पाइरहेका छन् । चाडपर्व लक्षित सुपथ पसलअन्तर्गत चामलमा छुट दिइएको उनले जानकारी दिए ।

शाखा कार्यालयमै सुपथ मूल्यको पसल सञ्चालन गरिएको कम्पनीले जनाएको छ । कम्पनीका अनुसार अहिले गोदाममा ५ सय क्विन्टल चामल मौज्दात छ । ‘दसैं, तिहार र छठलाई लक्षित गरी थप चामल पनि मगाइएको छ,’ उनले भने, ‘पछि आउने चामलमा पनि उपभोक्ताले यही नै छुट पाउनेछन् ।’ सुपथ मूल्यमा चामल पाएपछि उपभोक्ता खुसी छन् । मुसीकोट नगरपालिका–६ की मनकुमारी पुनले सस्तोमा चामल पाइएपछि विपन्न नागरिकलाई राहत भएको बताइन् । छुटसहितको चामल पाइएपछि चाडबाड मनाउन सजिलो भएको अर्का स्थानीय लक्ष्मण बुढाले बताए ।


प्रकाशित : आश्विन ६, २०७८ १२:०९
पूरा पढ्नुहोस्
प्रतिक्रिया
पठाउनुहोस्
×