पहिरोले सिमकोट अँध्यारोमा

विद्युत् आयोजनाका अनुसार पहिरोका कारण झन्डै ५ मिटर नहर भत्किएको छ । नहर भत्किएपछि कम्तिमा एक साताका लागि बिजुली गएको विद्युत् केन्द्रका प्रमुख साजन ऐडीले बताए । ‘फर्बे ट्यांकी नजिकै पहिरो गएकाले ठूलो क्षति भएको छ,’ उनले भने, ‘क्षतिको विवरण संकलनका लागि प्राविधिक खटाइएको छ ।’

उनका अनुसार ओभरफ्लो पाइप पनि पहिरोले बगाएपछि मर्मत गर्न कम्तीमा एक साता लाग्ने देखिएको हो । नहर मर्मतका लागि प्रहरी र सशस्त्र प्रहरी बलको सहयोग मागिएको केन्द्रले जनाएको छ । तर वर्षा जारी रहेकाले सुरक्षाकर्मी जान समस्या भएको ऐडीले बताए । केन्द्रले सिमकोट र खार्पुनाथ गाउँपालिकाका २ हजार ३ सय घरमा विद्युत् जडान गरेको छ ।