युवकलाई डोरीले बाँधेर कुटपिट गर्ने वडाध्यक्ष पक्राउ- कर्णाली - कान्तिपुर समाचार

युवकलाई डोरीले बाँधेर कुटपिट गर्ने वडाध्यक्ष पक्राउ

भीमबहादुर सिंह

जाजरकोट — युवकलाई डोरीले बाँधेर कुट्ने वडाध्यक्षलाई प्रहरीले पक्राउ गरेको छ । जुनीचाँदे गाउँपालिका वडा नम्बर २, मजकोटका १८ वर्षीय सर्पे दमाईलाई डोरीले बाँधेर कुटपिट गर्ने वडाध्यक्ष रामबहादुर नेपालीलाई प्रहरीले बिहीबार पक्राउ गरेको हो ।

प्रहरी चौकी पञ्चालाको प्रहरी टोलीले वडाध्यक्ष नेपालीलाई पक्राउ गरेर जिल्ला प्रहरी कार्यालयतर्फ ल्याउँदै गरेको प्रहरी निरीक्षक खुमानन्द पाण्डेले बताए । घटनास्थल सदरमुकाम खलंगादेखि ७५/८० किलोमिटर टाढा भएकोले नेपालीलाई जिल्ला प्रहरी कार्यालयमा ल्याउन समय लाग्ने उनले बताए ।

वडाध्यक्ष नेपालीलाई नियन्त्रणमा लिएर आवश्यक अनुसन्धान प्रक्रिया अगाडि बढाइएको प्रहरी निरीक्षक पाण्डेले बताए । वडाध्यक्ष नेपालीले गत साउन १५ गते दाजु रमेश दमाईका छोराछोरीको पोषणभत्ता माग्न गएका सर्पेलाई डोरीले बाँधेर कुटपिट गर्नुका साथै ३ घण्टासम्म बन्धक बनाएका थिए ।

प्रकाशित : श्रावण २१, २०७८ १३:०२
प्रतिक्रिया
पठाउनुहोस्

वडाध्यक्षद्वारा सेवाग्राहीलाई डोरीले बाँधेर निर्घात कुटपिट

३ घन्टासम्म बन्धक
भीमबहादुर सिंह

जाजरकोट — जुनीचाँदे गाउँपालिका-२ का वडाध्यक्ष रामबहादुर नेपालीले डोरीले बाँधेर एक युवालाई कुटपिट गरेका छन् । वडाअध्यक्ष नेपालीले मजकोटका १८ वर्षीय सर्पे दमाईलाई डोरीले बाँधेर कुटपिट गरेका हुन् ।

दाजु रमेश दमाईका छोराछोरीको पोषण भत्ता बुझ्‍न गएका सर्पेले वडा कार्यालय मदिरा सेवन गरेर होहल्ला गरेको भन्दै वडाध्यक्ष नेपालीले उनलाई बाँधेर निर्घात कुटपिट गरेका हुन् ।

पोषण भत्ता माग्दा वडा सचिवले बालबालिका लिएर आएपछि मात्र दिने भनेपछि सर्पे र वडासचिवबीच विवाद भएको थियो । सोही विवादको निहुँमा वडाध्यक्ष नेपालीले सर्पेलाई स्थानीय गब्बले तिरुवाको घरको दलानमा डोरीले बाँधेर निर्घात कुटपिट गरी ३ घण्टासम्म बन्दक बनाएका थिए ।

पोषण भत्ता पाउन ढिलाइ भएपछि वडा सचिवसँग वादविवाद गरिरहेको अवस्थामा वडाअध्यक्षले सर्पेलाई लतार्दै वडा कार्यालय नजिकै रहेको गब्बले घरमा लिई डोरीले बाँधेर कुटपिट गरी बन्दक बनाएको स्थानीय जय नाथले बताए । वडा अध्यक्षले सर्पेलाई गत साउन १५ गते बाँधेर कुटपिट गरेका हुन् । वडाध्यक्ष नेपालीले सर्पेलाई डोरीले बाँधेर कुटपिट गरेको भिडियो सामाजिक सञ्जालमा सार्वजनिक भएपछि सर्वत्र विरोध भएको छ ।

वडाअध्यक्ष नेपालीद्वारा डोरीले बाँधेर बन्दक बनाइएका सर्पेलाई ३/४ घण्टापछि इलाका प्रहरी कार्यालय पञ्चालाको प्रहरी टोलीले उद्धार गरेको नाथले बताए । सर्पेलाई बाँधेर कुटपिट गरेपछि वडाअध्यक्ष नेपालीले वडा कार्यालयमा असुरक्षा भयो भन्दै प्रहरीलाई खबर गरेको उनले बताए ।

सरकारी सेवा पाउन वडा कार्यालयमा पुगेका सेवाग्राहीलाई वडाअध्यक्ष जस्तो व्यक्तिले पदको दुरुपयोग गरी मानिसलाई बाँधेर कुटपिट गर्नु गलत भएको पीडितका बाबु रंगे नेपालीले बताए । ‘जनप्रतिनिधिले बाँधेर कुटपिट गर्ने तथा बन्धक बनाउने उल्टै पीडितलाई आगामी दिन गल्ती गर्ने छैन भनी प्रहरीमा कागज गराउनु जस्तो अपराध अरु के हुन सक्छ,’ नेपालीले भने । विकास र समृद्धिका आशामा भोट हालेर निर्विचित बनाएका जनप्रतिनिधिबाटै कुटाइ खानु परेको उनले बताए । छोरालाई बाँधेर कुटपिट नगर्न बारम्बार आग्रह गर्दा पनि वडाअध्यक्ष नेपालीले नमानेर लगातार कुटपिट गरेको उनले बताए ।

अध्यक्ष नेपालीले कुटपिटको विरुद्धमा पीडितलाई प्रहरी समक्ष पुग्न नदिई दबाब दिँदै आएका छन् । मदिरा सेवन गरेर वडा कार्यालयमा जथाभावी बोल्नुको साथै होहल्ला गरेपछि सर्पेलाई नियन्त्रणमा लिएर सम्झाइ बुझाइ मात्र गरेको वडा अध्यक्ष नेपालीले बताए । अध्यक्ष नेपाली २०७४ मा नेकपा एमालेबाट वडा अध्यक्षमा निर्वाचित भएका थिए ।

प्रकाशित : श्रावण २०, २०७८ १४:००
पूरा पढ्नुहोस्
प्रतिक्रिया
पठाउनुहोस्
×