तीन महिनापछि अस्पताल संक्रमितमुक्त- कर्णाली - कान्तिपुर समाचार

तीन महिनापछि अस्पताल संक्रमितमुक्त

हरि गौतम

रुकुम पश्चिम — जिल्ला अस्पताल ९७ दिनपछि कोरोना संक्रमितमुक्त बनेको छ । कोरोनाको दोस्रो लहर सुरु भएपछि जिल्ला अस्पतालमा गत वैशाख ४ गतेदेखि संक्रमितलाई भर्ना गरिएको थियो । 


अहिलेसम्म अस्पतालमा २ सय ३२ जना कोरोना संक्रमितको उपचार भएको छ । जसमध्ये २७ जनाको मृत्यु भएको स्वास्थ्य सेवा कार्यालयका कोरोना नियन्त्रण फोकल पर्सन ईश्वर रावलले बताए । उनका अनुसार केहीलाई जिल्लाबाहिर रेफर गरिएकामा अधिकांश निको भई घर फर्किएका छन् । जिल्लाभरिमा ३३ जनाको मृत्यु भएको उनले बताए ।

अस्पतालमा कुनै समय एक दिनमै १२ जना बढी कोभिडका बिरामीहरू भर्ना हुने गरेका थिए । कोरोना फैलिन थालेपछि रोकथाम र उपचारका लागि यसलाई कोभिड विशेष अस्पताल बनाइएको थियो । कुनै बेला एकै पटकमा अस्पतालमा ४७ संक्रमितको उपचार गर्नुपर्ने अवस्था रहेकामा अहिले भने शून्यमा झरेको रावलले बताए । तेस्रो लहरलाई लक्षित गरी केही समय अस्पताललाई कोभिड विशेष अस्पताल नै रहन दिइनेछ ।

अस्पतालले राप्ती समाज अस्पताललाई भाडामा लिएर अन्य सेवा प्रवाह सञ्चालन गरिरहेको हो । स्वास्थ्य सेवा कार्यालयका अनुसार अहिले जिल्लामा ७८ जना सक्रिय संक्रमित छन् । ‘अझै पनि संक्रमणको जोखिम छ,’ निमित्त स्वास्थ्य सेवा व्यवस्थापक विष्णुबहादुर बुढाथोकीले भने, ‘त्यसैले साउनसम्मै कोभिड अस्पताल राखिनेछ ।’ अरू बिरामी थपिन पनि सक्ने सम्भावना बढ्दै गएकाले कोभिड अस्पताललाई अहिल्यै नहटाइने उनले जानकारी दिए ।

प्रकाशित : श्रावण १२, २०७८ १०:०५
प्रतिक्रिया
पठाउनुहोस्

नदी किनारमा बालुवा-गिट्टीको पहाड

तोकिएको परिणामभन्दा बढी उत्खनन गरी क्रसर उद्योगले बालुवा–गिट्टी नदी किनार र जंगल क्षेत्रमा थुपारेका छन्
सन्तोष सिंह

धनुषा — महोत्तरीको गौशाला, बर्दिबास र भंगहा नगरपालिकाका नदी किनारमा क्रसर व्यवसायीले बालुवा–गिट्टी उत्खनन गरेर थुपारेका छन् ।  क्रसर व्यवसायीले ठूलो परिमाणमा राखेको बालुवा–गिट्टी ‘स्टक’ को कुनै नापजाँच गरिएको छैन ।

महोत्तरी–सर्लाही सिमाना बाँके नदीको किनारमा प्रमाणित नभएको स्टक । तस्बिर : सन्तोष सिंह/कान्तिपुर

स्थानीय तहले स्टक प्रमाणित गर्नुपर्ने व्यवस्था भए पनि क्रसर सञ्चालकसँगको मिलेमतोका कारण प्रमाणितको काम गरिएको छैन । महोत्तरी–सर्लाही सीमाबाट बग्ने बाँके नदीको दुवै किनारमा बालुवा–गिट्टीको पहाड नै बनाइएको छ । नदी किनारमा सञ्चालन भइरहेका क्रसर उद्योगबाट ती ढुंगा, गिट्टी र बालुवा उत्पादन भएको हो ।

सागरनाथ वन विकास परियोजना क्षेत्रमा उत्खनन गरिएको नदीजन्य पदार्थ सर्लाहीको श्रीनगर र महोत्तरीको गौशाला नगरपालिका–१२ मा थुपारिएको छ । तोकिएको परिणामभन्दा बढी उत्खनन गरी क्रसर उद्योगले बालुवा–गिटी नदी किनार र जंगल क्षेत्रमा थुपारेका छन् । स्टकको कुनै मूल्यांकन गरिएको छैन । नदीमा मनलाग्दी उत्खनन गरेको क्रसर उद्योग सञ्चालकले क्रसर उद्योग छेउछाउ र अन्य स्थानमा अवैध स्टक थुपारेको पाइएको छ ।

मरहा नदीको दुवै किनारमा समेत अवैध रूपमा नदीबाट उत्खनन गरिएको पदार्थ स्टक राखिएको छ । नदी उत्खननमा रोक लागेको समयमा समेत मरहाबाट बालुवा–गिट्टी निकाल्ने क्रम जारी छ । गौशाला नगरपालिकाको परशुधार क्षेत्रबाट गत साता अवैध स्टक गर्न उत्खनन गरिरहेका डोजर र टिपर प्रहरीले नियन्त्रणमा लिएको छ ।

बर्दिबास र भंगहा नगरपालिकामा पर्ने रातु नदी दोहन गरी नदीजन्य पदार्थको अवैध स्टक गरिएको छ । भंगहाको बिर्ता, सीतापुर छेउछाउका क्रसर उद्योगले मापदण्डविपरीत नदी उत्खनन गरी बालुवा–गिट्टी थुपारेका छन् । जिल्ला समन्वय समिति महोत्तरीका प्रमुख सुरेशप्रसाद सिंहले स्थानीय तह जवाफदेही नबन्दा नदी दोहन मौलाएको बताए । नदी उत्खनन गरी स्टक राखिएका सामग्रीको विवरण प्रमाणित गर्न स्थानीय तहलाई पत्राचार गरे पनि प्रमुखहरूले अटेर गरेको सिंहले बताए ।

‘स्टक प्रमाणित नहुँदा नदी किनारमा राखिएको बालुवा–गिट्टी बिक्री भए पनि अवैध उत्खननका कारण स्टक घटेको छैन,’ अध्यक्ष सिंहले भने, ‘जिल्ला समन्वय समितिले पठाएको पत्रको स्थानीय तहका प्रमुखले जवाफ नै दिँदैन । उत्खननको अवस्था, क्रसरको मापदण्ड, स्टकबारे जानकारी मागे पनि स्थानीय तहका जनप्रतिनिधि र कर्मचारी टेर्दैनन् ।’

स्टक प्रमाणित नभएर खरिद–बिक्री भएका नदीजन्य पदार्थसहित सवारीसाधन प्रहरीले जफत गरी कारबाही प्रक्रिया अगाडि बढाइएको सिंहले बताए । नदीजन्य पदार्थको उत्खनन गरी थुपारिएको स्टक स्थानीय तहले प्रमाणित गर्नुपर्ने व्यवस्था छ ।

ढुंगा–गिट्टी, बालुवा उत्खनन, बिक्री तथा व्यवस्थापनसम्बन्धी मापदण्डको दफा ७ (५) मा गाउँपालिका वा नगरपालिकाले लगाएको ठेक्काअन्तर्गत आर्थिक वर्षको अन्त्यमा नदी किनारमा तथा वन क्षेत्रमा भण्डारण गरी राखिएका ढुंगा–गिट्टी, बालुवा जफत गरी लिलाम बिक्री गर्ने व्यवस्था सम्बन्धित गाउँपालिका वा नगरपालिकाले मिलाउनुपर्ने व्यवस्था छ । लगातारको उत्खननले बाँके, मरहा, रातु नदीको गहिराइ बढेको छ । पछिल्लो तीन वर्षमा नदीहरू साविकभन्दा ३० फिट गहिरिएका छन् ।

प्रकाशित : श्रावण १२, २०७८ ०९:५९
पूरा पढ्नुहोस्
प्रतिक्रिया
पठाउनुहोस्
×