स्वास्थ्य केन्द्र चार वर्षदेखि डाक्टरविहीन- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

स्वास्थ्य केन्द्र चार वर्षदेखि डाक्टरविहीन

एलपी देवकोटा

जुम्ला — हिमा गाउँपालिका–५ स्थित कालिकाखेतु प्राथमिक स्वास्थ्य केन्द्र चार वर्षदेखि डाक्टरविहीन बनेको छ । जुम्लामा डाक्टर दरबन्दी भएको एक मात्र प्राथमिक स्वास्थ्य केन्द्रमा पनि सरकारले डाक्टर पठाउन नसकेको हो । 


दरबन्दीमा रहेका डाक्टर अध्ययन बिदामा गएपछि प्राथमिक स्वास्थ्य केन्द्र डाक्टरविहीन बनेको हो । केन्द्रमा डाक्टर नहुँदा उपचारमा समस्या भएको स्थानीय कमल केसीले बताए । ‘गाउँमै उपचार नहुँदा सानो स्वास्थ्य समस्याका लागि सास्ती भोग्नुपरेको छ,’ उनले भने, ‘सामान्य अवस्थाका बिरामी पनि खलंगाको कर्णाली स्वास्थ्य विज्ञान प्रतिष्ठानमा जान बाध्य छौं ।’

मेडिकल अधिकृतको दरबन्दीका डाक्टर पठाइदिन सरकारसँग पटकपटक माग गर्दा पनि सुनुवाइ नभएको कालिकाखेतु स्वास्थ्य केन्द्रका इन्चार्ज गोविन्द भण्डारीले बताए । उनका अनुसार सिञ्जा क्षेत्रका बिरामीले लामो समयदेखि केन्द्रमा डाक्टर देख्न पाएका छैनन् । ‘डाक्टर भएको भए जटिल खालका बिरामीलाई पनि यहीँ उपचार गर्न सकिन्थ्यो,’ उनले भने, ‘अहिले सामान्य अवस्थाका बिरामीलाई पनि सदरमुकाम खलंगामा पठाउनुपर्ने बाध्यता छ ।’

यसअघि ठूलो शल्यक्रिया गर्ने बिरामी मात्रै सदरमुकाम जानुपरेको उनले जानकारी दिए । स्वास्थ्य केन्द्रमा डाक्टर नहुँदा समस्या भइरहेको स्थानीय कृष्ण अधिकारीले बताए । ‘गाउँमा डाक्टर नहुँदा एक दिन हिँडेर उपचारका लागि खलंगा जानुपर्ने बाध्यता छ,’ उनले भने, ‘केन्द्रमा न औषधि हुन्छ न स्वास्थ्यकर्मी, नाम मात्रैको अस्पताल छ ।’ पहिले डाक्टर हुँदा उदाहरणीय बनेको प्राथमिक स्वास्थ्य केन्द्र अहिले अस्तव्यस्त बनेको उनले बताए ।

स्वास्थ्य केन्द्रमा कार्यरत डा. रत्नवीर सुनार अध्ययन बिदामा गएदेखि चिकित्सक दरबन्दी रिक्त छ । दरबन्दीअनुसारको डाक्टर नहुँदा बिरामीको उपचारमा समस्या भइरहेको केन्द्रका इन्चार्ज गोविन्द भण्डारीले बताए । ‘डाक्टर हुँदासम्म औषधि पर्याप्त हुन्थ्यो,’ उनले भने, ‘आकस्मिक सेवा २४ सैं घण्टा प्रवाह हुने गरे पनि नाम मात्रैको छ ।’ डाक्टर नहुँदा सेवा प्रवाहमा पनि समस्या भएको उनले बताए । प्राथमिक स्वास्थ्य केन्द्रमा डाक्टर पठाउन संघीय सरकारसँग हारगुहार गर्दा पनि बेवास्ता भएको हिमा गाउँपालिका अध्यक्ष रजबहादुर शाहीले बताए । ‘कोरोना भाइरसको महामारीका बेला पनि सरकारले डाक्टर पठाएन,’ उनले भने, ‘अझै पनि हामीले पहल गरिरहेका छौं, तर तत्काल डाक्टर आउने छाँटकाँट छैन ।’

प्रकाशित : श्रावण ८, २०७८ १०:१४
प्रतिक्रिया
पठाउनुहोस्

मुगुमा खाद्यान्नको माग बढ्यो, आपूर्ति घट्यो

राजबहादुर शाही

मुगु — जिल्लामा खाद्यान्नको माग बढे पनि आपूर्ति घटेको छ । खाद्य व्यवस्था व्यापार कम्पनीबाट दैनिक १ सय क्विन्टल बढी खाद्यान्न बिक्री हुने गरे पनि सोहीअनुसार आपूर्ति नहुँदा समस्या भएको द्ध । आपूर्ति दैनिक घट्न थालेपछि उपभोक्ता चिन्तित भएका छन् ।


गत आर्थिक वर्षको खाद्यको स्वीकृत कोटा सकिएको र चालु आर्थिक वर्षको कोटा नआउँदा समस्या भएको कम्पनीले जनाएको छ । कम्पनीका अनुसार यो वर्ष कोटा नै स्वीकृत नहुँदा टेन्डर प्रक्रियामा ढिलाइ भएको हो । कम्पनीको गोदाममा सस्तो र गुणस्तरीय चामल पाइने भएकाले विपन्न उपभोक्ताले खाद्य गोदामबाटै खाद्यान्न लिने गरेका छन् । कोटा निर्धारणमा ढिलाइ भएको कम्पनीका सूचना अधिकारी पुष्कर भामले बताए । उनका अनुसार अहिले समगढीस्थित खाद्य गोदाममा २ हजार क्विन्टल चामल मात्र बाँकी छ । ‘दैनिक एक सय क्विन्टल बढी चामल बिक्री हुन्छ,’ उनले भने, ‘तत्काल ढुवानी नभए १५/२० दिनमै गोदाम रित्तिन्छ ।’ गोदाममा छायानाथ राराका १४ वटै वडाका बासिन्दाको भीड बढेपछि वितरणमा समस्या भएको उनले बताए ।

अहिले खाद्यमा १० किलोको बोरा चामल सकिएको छ । नयाँ खाद्य कोटा स्वीकृत हुन कम्तीमा दुई साता लाग्ने कम्पनीले जनाएको छ । ‘वर्षा सुरु हुनुअघि एक सातामा सुर्खेत, नेपालगन्ज र राजापुरबाट दैनिक एक/एकवटा ट्रक आउँथे,’ भामले भने, ‘कोटा सकिएपछि ढुवानी ठप्प छ, बिक्री रोकिएको छैन ।

वर्षाका कारण सडक र हवाई सेवा अवरुद्ध हुँदा बजारमा पनि खाद्यान्न मौज्दात सकिन थालेको स्थानीय व्यापारीले जनाएका छन् । उनीहरूका अनुसार असार तेस्रो सातादेखि नै बजारमा खाद्यान्न अभाव देखिन थालेको थियो । कम्पनीका सोरुकोट, श्रीकोट, पुलु, कालै र रातापानी डिपोमा गोदाम रित्तिएको भामले बताए । उनका अनुसार चामल नभएपछि सदरमुकाम बाहिरका सबै डिपोमा ताला लागेको छ ।

गाउँका खाद्य डिपो खाली भएपछि बजारको महँगो चामल खरिद गरी उपभोग गर्नुपरेको मुगुमकार्मारोङ गाउँपालिकास्थित पुलुका छेवाङछेजुङ लामाले बताए । ‘घण्टौं हिँडेर डिपोमा चामल लिन गयो, कहिल्यै पाइँदैन,’ उनले भने, ‘डिपोमा चामल नपाइएपछि दोब्बर महँगोमा बजारको चामल लिनुपरेको छ ।’ उनका अनुसार सोरु र मुगुमकार्मारोङ गाउँपालिकामा खडेरीका कारण यो वर्ष गहुँ बालीको उत्पादन न्यून भयो । अहिले बजारको चामलको भरमा गुजारा चलाउनुपर्ने बाध्यता भएको उनले बताए ।

खाद्य गोदाममा चामल नभएपछि सोरु गाउँपालिकाको कालै, जिमा, पुरुमुरु, सोरुकोट, नार्थपु भिई र मुगुमकार्मारोङ गाउँपालिकाका १२ वटै बस्तीमा खाद्यान्न अभाव देखिएको छ । सरकारले छिटो नयाँ खाद्य कोटा स्वीकृत गरी चाँडो चामल ढुवानीको व्यवस्था मिलाउनुपर्ने मुगुमकार्मारोङ गाउँपालिका अध्यक्ष छिरिङक्याप्ने लामाले बताए ।

प्रकाशित : श्रावण ८, २०७८ १०:१३
पूरा पढ्नुहोस्
प्रतिक्रिया
पठाउनुहोस्
×