जनप्रतिनिधि र कर्मचारीबीच विवादले नगरसभा भएन- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

जनप्रतिनिधि र कर्मचारीबीच विवादले नगरसभा भएन

विप्लव महर्जन

सल्यान — जिल्लाका ९ स्थानीय तहले बजेट पारित गरेको दुई साता बित्दासमेत बन्गाडकुपिण्डे नगरपालिकाले अहिलेसम्म नगरसभा गर्न सकेको छैन । जनप्रतिनिधि र कर्मचारीबीच विवाद हुँदा नगरसभा अन्योलमा परेको हो ।

अहिलेसम्म विवादको टुंगो नलाग्दा कार्यपालिका बैठक बस्न सकेको छैन । जसका कारण नगरपालिकाले आर्थिक वर्ष २०७८/७९ को नीति तथा कार्यक्रम र बजेट अहिलेसम्म सार्वजनिक गर्न सकेको छैन । वडामा भर्ना गरेका १२ कर्मचारीलाई तलब खुवाउने विषयमा कुरा नमिलेका कारण नगरसभा हुन नसकेको नगर उपप्रमुख मञ्जु ऐरीले बताइन् । उनका अनुसार कर्मचारीलाई गत वर्षदेखि तलब भुक्तानी गर्न सकिएको छैन । ‘अन्य विषयमा पनि विवाद छ, तर मुख्य समस्या कर्मचारीकै तलब हो,’ उनले भनिन्, ‘अहिले त झन् नगर प्रमुख र प्रमुख प्रशासकीय अधिकृत नै नगरपालिकामा छैनन् ।’ नगरसभाका लागि नीति तथा कार्यक्रम र बजेट तयार गरेर राखे पनि नगर प्रमुख गोविन्दकुमार पुन नगरपालिकामा नहुँदा समस्या भएको उनको भनाइ छ । ‘विवाद नसुल्झिँदासम्म जनप्रतिनिधिले कार्यपालिका बैठकमा सहभागी नहुने अडान लिएका छौं,’ ऐरीले भनिन्, ‘अहिले अवस्था जेजस्तो भए पनि नगरसभाका छिटो गर्न नगरप्रमुखलाई आग्रह गरिए पनि बेवास्ता भइरहेको छ ।’

प्रमुख प्रशासकीय अधिकृत मनोज रेग्मीले कर्मचारीलाई तलब खुवाउने विषयमा समस्या हुँदा नगरसभा हुन नसकेको बताए । उनका अनुसार विकास योजनामा काम गरेका ठेकेदारलाई भुक्तानी नदिँदा पनि नगरसभा बस्न समस्या भएको हो । ‘नगरसभाका लागि कार्यपालिका बैठक पटकपटक बसे पनि कुनै छलफल नै हुन सकेको छैन,’ उनले भने, ‘कर्मचारी र जनप्रतिनिधिको विवाद भनिए पनि यहाँ जनप्रतिनिधिकै विवाद बढी छ ।’ उनी अहिले परीक्षाका लागि काठमाडौंमा छन् । नगरसभाको टुंगो भए आफू परीक्षा छोडेर आउन पनि तयार रहेको उनले बताए । ‘जनप्रतिनिधिमै विवाद छ,’ उनले भने, ‘तर दोषजति सबै कर्मचारीमा थुपारिएको छ ।’ उनका अनुसार बजेट नहुँदा कर्मचारीलाई तलब खुवाउन समस्या भएको हो ।

नगरमा जनप्रतिनिधिको बढ्दो लापरबाहीका कारण नगरसभा हुन नसकेको स्थानीय बेदबहादुर रोकाले बताए । ‘आफ्नो कमजोरी लुकाउन उनीहरूले कर्मचारीको तलब र ठेकेदारलाई भुक्तानी दिन सकेका छैनन्,’ उनले भने, ‘अघिल्लो वर्ष पनि मनमुटावकै कारण तोकेको समयभन्दा ६ महिनापछि नगरसभा भयो, नगरसभा नहुँदा हामीले ३ वर्षदेखि नै स्थानीय सरकारको अनुभूति गर्न सकेका छैनौं ।’

नगरप्रमुख पुनले विवाद मिलाएर छिट्टै नगरसभा गरिने बताए । ‘नीति तथा कार्यक्रम र बजेट तयार छ,’ उनले भने, ‘नगरभित्र देखिएका सामान्य समस्याले तोकिएको समयमै नगरसभा हुन सकेन, अब एक साताभित्रै नगरसभाको बैठक गरी बजेट पारित गरिनेछ ।’

प्रकाशित : श्रावण ७, २०७८ ०९:०८
प्रतिक्रिया
पठाउनुहोस्

अस्पतालको सौर्य ऊर्जा प्रयोगविहीन

कान्तिपुर संवाददाता

मुगु — जिल्ला अस्पताल ठिनीमा दुई वर्षदेखि सौर्य ऊर्जा प्रयोगविहीन बनेको छ । कोरिया सरकारको सहयोगमा अस्पतालमा जडान गरिएको ३ किलोवाटको सौर्य ऊर्जा अलपत्र परेको हो । उक्त सौर्य उर्जा प्रणाली ३ वर्षअघि बिग्रिएको थियो ।

अस्पतालमा मर्मतका लागि बजेट नहुँदा सौर्य ऊर्जा मर्मत गर्न नसकिएको अस्पतालका डा. डबल मल्लले बताए । ‘चार्ज कन्ट्रोल जलेपछि सौर्य ऊर्जाबाट बत्ती बल्न छोडेको दुई वर्ष भयो,’ उनले भने, ‘हामीसँग मर्मतका लागि बजेट छैन, दातृ निकायले दिएन ।’ उनका अनुसार गमगाढ जलविद्युत् आयोजनाको बिजुली पटकपटक अवरुद्ध हुने गरेकाले ३ वर्षअघि सौर्य ऊर्जा जडान गरिएको थियो ।

सौर्य ऊर्जा मर्मत भए उपचार र अस्पतालको सेवा प्रवाह सहज हुने उनी बताउँछन् । ‘स्थानीयस्तरमा उत्पादित बिजुली भरपर्दो छैन,’ उनले भने, ‘वैकल्पिक व्यवस्था नहुँदा उपचारमा समस्या भयो ।’ सौर्य ऊर्जा प्रयोगविहीन हुँदा भिडियो एक्सरे, एक्सरे र प्रगोगशालाको काम प्रभावित भएको उनको भनाइ छ ।

कोरिया सरकारको सहयोगमा अस्पतालमा आपत्कालीन रूपमा विद्युत् सेवा प्रवाह गर्न जडान गरिएको ६३ केबी क्षमताको जेनेरेटर पनि प्रयोगविहीन छ । इन्धन खर्च नहुँदा जेनेरेटर मेसिन पनि अलपत्र परेको अस्पतालले जनाएको छ । दैनिक जेनेरेटर सञ्चालन गर्न ८ लिटर डिजेल आवश्यक पर्ने अस्पतालका सुरक्षा गार्ड गगन शाहीले बताए ।

अस्पतालमा जडान गरिएका दुईवटै वैकल्पिक विद्युतीय साधन प्रयोगविहीन बनेपछि बिरामी र स्वास्थ्यकर्मी सास्ती भोग्न बाध्य छन् । सदरमुकामस्थित गमगाढ विद्युत् आयोजनामा पनि पटकपटक बिग्रिँदा उपचारमा समस्या भएको स्थानीय कमल शाहीले बताए । ‘अस्पतालजस्तो ठाउँमा लामो समयदेखि लापरबाही भइरहेको छ,’ उनले भने, ‘विद्युत् समस्याकै कारण बिरामी लामो समयदेखि सास्ती भोग्न बाध्य छन् ।’ अस्पतालमा भर्ना भएका बिरामीले अँध्यारोमा रात गुजार्नुपरेको उनले बताए ।

विद्युत्कै समस्याले अस्पतालमा रात्रिकालीन सेवा प्रवाह प्रभावित भएको डा. मल्लले गुनासो गरे । उनका अनुसार पटकपटक सौर्य ऊर्जा मर्मत गर्न आग्रह गरिए पनि जिल्ला स्वास्थ्य सेवा कार्यालयले बेवास्ता गरिरहेको छ । ‘कार्यालयले पनि कोरिया सरकारकै मुख ताकेको छ,’ उनले भने, ‘विद्युत् नभएको दिन अस्पताल नै सुनसान हुन्छ ।’ दातृ निकायलाई नै सौर्य ऊर्जा मर्मत गर्न आग्रह गरिएको निमित्त स्वास्थ्य सेवा व्यवस्थापक करुणा भट्टराईले बताइन् ।

प्रकाशित : श्रावण ७, २०७८ ०९:०६
पूरा पढ्नुहोस्
प्रतिक्रिया
पठाउनुहोस्
×