जथाभावी उत्खननले पुल जोखिममा- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

जथाभावी उत्खननले पुल जोखिममा

पालिकाले अव्यवस्थित उत्खनन रोक्नुको साटो अनुमति दिएको स्थानीयको आरोप
ज्योति कटुवाल

दैलेख — अनियन्त्रित दोहनले दैलेखको तल्लो डुगेंश्वरस्थित कर्णाली राजमार्गअन्तर्गत कर्णाली नदीको पुल जोखिममा परेको छ । नदी आसपासमा अव्यवस्थित रूपमा ढुंगा, गिट्टी र बालुवा उत्खनन हुँदा पुल जोखिममा परेको हो । पुलसँगै आसपासका गाउँ पनि बाढीको जोखिममा परेको स्थानीयको गुनासो छ ।

दैलेखको तल्लो डुगेंश्वरस्थित कर्णाली पुलनजिकै ढुंगागिट्टी उत्खनन गरिँदै । तस्बिर : ज्योति/कान्तिपुर

पुलको पिलरमुनिबाटै ढुंगा, गिट्टी र बालुवा निकाल्दा जोखिम बढेको स्थानीय विमल क्षत्रीले बताए । उनका अनुसार दैलेख, सुर्खेत र अछाम जोड्न उक्त पुलको विकल्प छैन । ‘स्थानीय सरकारले उत्खनन रोक्नुको साटो खुलमखुला अनुमति दियो,’ उनले भने, ‘भारी वर्षा भएर बाढी आए पुल भत्किने खतरा छ ।’ पुलको एक सय मिटर नजिकबाट ढुंगा, गिट्टी र बालुवा निकाल्न नपाउने नियम भए पनि व्यवसायीले नियम मिचेरै उत्खनन गरिरहेको उनले बताए ।

अवैध उत्खननले कर्णाली नदी र लोहोरे खोला आसपासका अधिकांश बस्ती जोखिममा परेको स्थानीय अगुवा माधव सुनारले बताए । उनका अनुसार दुवै नदी र खोलाको किनारी क्षेत्रमा बसोबास गर्ने करिब दुई सय परिवार बाढीको उच्च जोखिममा छन् । छामघाट खोला, चामुन्डाविन्द्रासैनी, चुप्राखोलालगायतमा अवैध उत्खनन हुँदा भर्खर बनाइएको पक्की पुल पनि जोखिममा परेको हो । ‘नदी आसपासका बासिन्दा पानी पर्न थालेपछि जाग्राम बस्न बाध्य छौं,’ उनले भने, ‘ठूलो बाढी आएर परिवारै बगाउने हो कि भन्ने चिन्ता छ ।’ उनले बाढीको जोखिम बढेपछि नदी किनारामा बस्दै आएका बादी समुदाय बढी समस्यामा परेको बताए ।

कर्णाली पुलबाट दैनिक करिब सय गाडीहरू वारपार हुने स्थानीय हिमाल बादीले बताए । कर्णाली राजमार्ग र अछाम जाने गाडीहरूले उक्त पुल तर्नुको विकल्प छैन । उत्खननमा सम्बन्धित निकायले अनुगमन नगर्दा व्यवसायीको मनपरी बढेको उनको आरोप छ । कर्णाली नदी आसपासको क्षेत्रमा ३ वर्षदेखि जथाभावी उत्खनन भइरहेको उनको भनाइ छ । यहाँ सूर्य कन्स्ट्रक्सनले अवैध रूपमा ढुंगा, बालुवा र गिट्टी उत्खनन गरिरहेको हो ।

जिल्ला प्रहरी प्रमुख डीएसपी अनुपम श्रेष्ठले जथाभावी उत्खननबारे प्रहरीलाई जानकारी आएसम्म अनुगमन गरी कारबाही गरिरहेको दाबी गरे । जिल्ला समन्वय समिति प्रमुख प्रेम थापाले पुल नजिकको क्षेत्रभन्दा अन्यत्रबाट नदीजन्य पदार्थ उत्खनन गर्न आग्रह गरे पनि ठेकेदारले अटेरी गरेको गुनासो गरे ।

प्रकाशित : श्रावण ५, २०७८ ०८:५६
प्रतिक्रिया
पठाउनुहोस्

भ्रष्टाचार आरोपमा ४ जनाविरुद्ध मुद्दा

कान्तिपुर संवाददाता

गोरखा — सार्वजनिक सम्पत्ति हिनामिना गरी भ्रष्टाचार गरेको आरोपमा बारपाक सुलिकोट गाउँपालिकाका तत्कालीन प्रमुख प्रशासकीय अधिकृत शिवबहादुर गुरुङसहित चार जनाविरुद्ध अख्तियार दुरुपयोग अनुसन्धान आयोगले विशेष अदालत काठमाडौंमा आरोपपत्र दायर गरेको छ ।

बारपाक सुलिकोटको झाँक्रीचोक–धारापानी–देउराली–बाहकोट सडक निर्माणका क्रममा इस्टिमेटअनुसार काम नगरी इन्जिनियर र ठेकेदारको मिलेमतोमा रकम हिनामिना गरेको उनीहरूमाथि आरोप छ । अख्तियारले गुरुङसहित लेखापाल गंगाबहादुर घले, इन्जिनियर सुजन अम्गाईं र सोम एन्ड अमर कन्स्ट्रक्सन प्रालिका अमरबहादुर गुरुङविरुद्ध आइतबार आरोपपत्र दायर गरेको हो ।

आर्थिक वर्ष २०७५/७६ मा रकम विनियोजन भएको उक्त सडकमा वास्तविक कार्यभन्दा बढी ३ लाख ६८ हजार ४ सय २० रुपैयाँ १७ पैसा (भ्याटसहित) रुपैयाँ बढाई अपचलन गरेको उनीहरूमाथि आरोप छ । निर्माण व्यवसायीसँगको मिलेमतोमा बढी रकम भुक्तानी गरी सार्वजनिक सम्पत्ति हिनामिना गरी भ्रष्टाचार निवारण ऐन, २०५९ को दफा १७ बमोजिम कसुर गरेको पुष्टि भएको आरोपपत्रमा छ ।

निजहरूलाई बिगो ३ लाख ६८ हजार ४ सय २० रुपैयाँ १७ पैसा कायम गरी भ्रष्टाचार निवारण ऐन २०५९ को दफा ३ को उपदफा (१) को देहाय (घ) बमोजिम सजाय र दफा १७ बमोजिम बिगो असुलको मागदाबी गरिएको छ ।

प्रकाशित : श्रावण ५, २०७८ ०८:५५
पूरा पढ्नुहोस्
प्रतिक्रिया
पठाउनुहोस्
×