खेल पूर्वाधारका लागि ५९ करोड- कर्णाली - कान्तिपुर समाचार

खेल पूर्वाधारका लागि ५९ करोड

चाँदनी कठायत

वीरेन्द्रनगर — कर्णाली प्रदेश सरकारले आगामी आर्थिक वर्षको बजेटमा खेलकुदतर्फका पूर्वाधार निर्माण गर्न ५९ करोड रुपैयाँ बजेट विनियोजन गरेको छ । कर्णालीले १० औं राष्ट्रिय खेलकुद प्रतियोगिताको तयारी थाल्न आगामी आवमा विगत वर्षभन्दा बढी बजेट छुट्याएको हो ।

दुई वर्षदेखि नै कर्णालीमा १० औं राष्ट्रिय खेलकुद प्रतियोगिताको आयोजना गर्ने गरी बजेट विनियोजन गरिए पनि कार्यान्वयन सुस्त छ । प्रदेश सरकारले नयाँ बजेटमार्फत प्रदेश राजधानी वीरेन्द्रनगरमा प्रादेशिक रंगशाला, चौरजहारीमा क्षेत्रीय रंगशाला र प्रत्येक जिल्लामा खेल पूर्वाधार एवम् कभर्डहल निर्माण गर्ने घोषणा गरेको छ । तर खेलाडी तथा सरोकारवालाले १० औं राष्ट्रिय खेलकुद प्रतियोगिता आयोजना गर्न प्रदेश सरकारले छुट्याएको ५९ करोड रुपैयाँ कम हुने बताएका छन् । ‘राष्ट्रिय प्रतियोगिता कर्णालीमा आयोजना गर्ने भनिसकेपछि पर्याप्त रकम छुट्याउनुपर्थ्यो,’ कर्णाली प्रदेश फुटबल संघका महासचिव गणेशकुमार कार्कीले भने, ‘छुट्याइएको रकमले सामान्य पूर्वाधार बनाउन पनि सकिँदैन ।’

आगामी आवमा प्रदेश सरकारले विभिन्न खेलकुद पूर्वाधारका लागि ४ करोड ६ लाख, प्रादेशिक रंगशालाका लागि १ करोड ७९ लाख, हाई अल्टिच्युड ट्रेनिङ सेन्टरका लागि १२ लाख, १० औं राष्ट्रियको तयारीका लागि २ करोड र कालीकोटको नरहरिनाथ गाउँपालिकामा खेलमैदानका लागि १५ लाख विनियोजन गरेको छ । ‘रकमका हिसाबले विगतभन्दा बढी बजेट छ,’ कार्कीले भने, ‘तर विगत वर्षको बजेट फ्रिज हुँदा कार्यान्वयन हुनेमा आशंका देखियो ।’

१० जिल्लामा रंगशाला

कर्णाली प्रदेश सरकारले १० वटा जिल्लामा रंगशाला निर्माण गर्न ४५ करोड बजेट छुट्याएको छ । प्रदेश रंगशालाका लागि ३५ करोड र १० वटा जिल्लामा बन्ने रंगशालाका लागि एक/एक करोड रकम विनियोजन गरिएको हो । ‘१० औं राष्ट्रिय खेलकुद प्रतियोगिता–२०८’ कर्णालीमा आयोजना गर्नका लागि खेलकुद पूर्वाधार निर्माणलाई तीव्रता दिइने कर्णाली खेलकुद परिषद्ले जनाएको छ । ३५ करोड रुपैयाँको लागतमा बन्ने प्रदेश रंगशालालाई प्रदेश गौरवको आयोजना रूपमा लिइएको परिषद्का सदस्य सचिव विश्वामित्र संज्यालले बताए । प्रदेश रंगशालामा १० हजार दर्शक अट्ने स्टेडियम, फुटबल मैदान, एथलेक्टिस ट्र्याक, स्विमिङ पुल, १५ सय दर्शक अट्ने कवर्ड हललगायतका संरचना हुनेछन् । खेलका आउटडोर व्यावसायिक प्रयोजनका लागि १ सय २० वटा सटरहरू निकालिने उनले बताए । परिषद्का अनुसार २ अर्ब रुपैयाँ लागत अनुमान गरिएको प्रदेश रंगशालामा आगामी वर्ष ३५ करोड रुपैयाँबाट पूर्वाधारको काम सुरु हुनेछन् । ‘जसका लागि टेन्डर प्रक्रिया सुरु भइसकेको छ,’ उनले भने, ‘अर्थ मन्त्रालयले स्रोत सुनिश्चित गरिदिएमा साउन महिनाभित्रै काम अघि बढ्नेछ ।’

प्रकाशित : श्रावण २, २०७८ १२:२४
प्रतिक्रिया
पठाउनुहोस्

कर्णाली सरकारले ल्यायो अध्यादेशबाट बजेट

चाँदनी कठायत

वीरेन्द्रनगर — कर्णाली प्रदेश सरकारले चालु आर्थिक वर्षको अन्तिम दिनमा अध्यादेशबाट बजेट ल्याएको छ । बिहीबार पत्रकार सम्मेलनमार्फत आगामी आर्थिक वर्ष २०७८/७९ को लागि ३६ अर्ब ५४ करोड ६६ लाख रुपैयाँको बजेट अध्यादेशमार्फत ल्याएको हो । उक्त बजेट प्रदेश प्रमुख गोविन्दप्रसाद कलौनीले जारी गरेका छन् । 

फाइल तस्बिरः कर्णाली प्रदेशसभा भवन ।

असार १ गते प्रदेशसभामा बजेट सार्वजनिक गरेको कर्णाली सरकारले एक महिनाभित्र निरन्तर १० पटकसम्म प्रमुख प्रतिपक्षी दल नेकपा एमालेले अवरोध गरेपछि अध्यादेशबाट बजेट ल्याएको हो । आगामी आवका लागि असार १ गते प्रदेशसभामा पनि सोही आकारको बजेट कर्णाली सरकारले सार्वजनिक गरेको थियो ।

कोभिड–१९ नियन्त्रण तथा रोकथाम र उपचारलाई प्राथमिकतामा राखेर कर्णाली सरकारले बजेट ल्याएको हो । जसमा पूँजीगततर्फ २१ अर्ब ६५ करोड ३९ लाख १३ हजार र चालुतर्फ ११ अर्ब ४९ करोड २७ लाख ७० हजार बराबरको बजेट ल्याइएको हो । यस्तै वित्तीयतर्फ ३ अर्ब ३९ करोड ९९ लाख ५३ हजार बजेट विनियोजन गरिएको मन्त्री शर्माले बताए ।

प्रदेश सरकारले कोभिड नियन्त्रणका लागि ५३ करोड ९३ लाख रुपैयाँ बजेट विनियोजन गरेको छ । कर्णालीको स्वास्थ्य सेवा सुदृढीकरणका लागि २ अर्ब ६१ करोड बजेट विनियोजन गरिएको मन्त्री शर्माले बताए । आगामी आर्थिक वर्षमै कर्णालीका अस्पतालहरुमा स्वास्थ्य सम्बन्धी यन्त्रहरुको जडान, दक्ष कर्मचारीको व्यवस्थापन लगायतका काम प्रभावकारी बनाउने गरी बजेटको व्यवस्था गरिएको मन्त्री शर्माले बताए ।

आगामी आर्थिक वर्षबाट सहिद परिवार र माओवादीले सञ्चालन गरेको सशस्त्र द्वन्द्वका क्रममा घाइते तथा अपांगता भएका व्यक्तिहरूले मासिक दुई हजार रुपैयाँ भत्ता पाउने भएका छन् । प्रदेश सरकारले उत्कष्ट किसानलाई सुनको हलो अंकित तक्माले सम्मान गर्ने पनि बजेटमा उल्लेख छ । ‘मुख्यमन्त्री कृषि कार्यक्रम’ मार्फत वार्षिक एक जना उत्कृष्ट कृषकलाई सुनको हलो अंकित तक्माले दिइने मन्त्री शर्माले घोषणा गरे । व्यवसायिक कृषि खेती प्रणालीको विकास तथा किसानको सम्मानका लागि प्रदेशका २०० किसानलाई सम्मान गरिने बजेट वक्तव्यमा उल्लेख छ । जसका लागि आगामी आर्थिक वर्षमा सरकारले ४० लाख रुपैयाँ बजेट विनियोजन गरेको छ ।

कर्णालीको पर्यटन विकासका लागि २३ करोड १५ लाख, सडक पूर्वाधार तथा यातायात विकासतर्फ सात अर्ब २९ करोड, खानेपानी तथा सरसफाई विकासतर्फ एक अर्ब ७९ करोड, सिंचाई तथा नदी नियन्त्रणका लागि ६८ करोड ७४ लाख, ऊर्जा विद्युततर्फ ४२ करोड ३१ लाख, शहरी व्यवस्थापनतर्फ ४० करोड, कृषि स्वरोजगारतर्फ एक अर्ब र खेलकुदतर्फ ५९ करोड बजेट विनियोजन गरिएको छ ।

एमालेले आफूले राख्दै आएको राजनीतिक मागहरुको सरकारले बेवास्ता गरेको भन्दै लामो समयदेखि सदन अवरुद्ध पारेको थियो । संसदीय दलको कारबाहीमा परेका सांसदहरूलाई सर्वोच्चले पुनर्बहाली गर्ने अन्तरिम आदेश दिएपछि ती सांसदहरूलाई प्रतिपक्षीकोसिटमा आएर बस्न एमालेले निर्देशन दिएको थियो । ती सांसदहरुले नमानेपछि एमाले संसदीय दलले यसमा सरकारले सहयोग गर्नुपर्ने माग राखेको थियो ।

गत वैशाख ३ गते मुख्यमन्त्री महेन्द्रबहादुर शाहीको पक्षमा मतदान गरी फ्लोर क्रस गरेका चार जना एमाले सांसदमध्ये तीन जना हाल शाही नेतृत्वकै सरकारमा मन्त्री छन् । एमाले संसदीय दलले उनीहरूलाई पनि राजीनामा दिएर प्रदेशसभाले व्यवस्था गरेको प्रमुख प्रतिपक्षीको सिटमा बस्नुपर्ने भनेको छ ।


प्रकाशित : श्रावण १, २०७८ ०६:१३
पूरा पढ्नुहोस्
प्रतिक्रिया
पठाउनुहोस्
×