शिक्षक र कर्मचारीले ७ महिनादेखि तलब पाएनन्- कर्णाली - कान्तिपुर समाचार

शिक्षक र कर्मचारीले ७ महिनादेखि तलब पाएनन्

कर्णाली स्वास्थ्य विज्ञान प्रतिष्ठानद्वारा जाजरकोटमा फार्मेसी कार्यक्रमको पठनपाठन बन्द गर्ने तयारी
भीमबहादुर सिंह

जाजरकोट — कर्णाली स्वास्थ्य विज्ञान प्रतिष्ठानअन्तर्गत सञ्चालन भएको ‘डिप्लोमा इन फार्मेसी’ कार्यक्रमका शिक्षक तथा कर्मचारीले ७ महिनादेखि तलब पाएका छैनन् । फार्मेसी कार्यक्रमले शिक्षक र कर्मचारीहरूलाई ७ महिनाको झन्डै ३६ लाख रुपैयाँ तलब भुक्तानी दिन बाँकी छ । 

जाजरकोटस्थित भेरी ज्ञानोदय क्याम्पसमा सञ्चालन भएको ‘डिप्लोमा इन फार्मेसी’ कार्यक्रममा अध्ययनरत विद्यार्थी । तस्बिर : भीमबहादुर/कान्तिपुर 

भेरी ज्ञानोदय क्याम्पसमा २०७६ सालदेखि फार्मेसी कार्यक्रम सञ्चालन गरिएको थियो । उक्त क्याम्पसमा ३१ जना विद्यार्थीले फार्मेसी अध्ययन गरिरहेका छन् । कार्यक्रमका लागि ९ शिक्षक र ४ कर्मचारी भर्ना गरिएको क्याम्पसले जनाएको छ । प्रतिष्ठानले पूर्णकालीन शिक्षकको व्यवस्था गर्न नसकेपछि आंशिकको भरमा कार्यक्रम चलिरहेको शिक्षक जनक केसीले बताए । ‘प्रथम वर्षको कोर्स पूरा गरेर विद्यार्थीले दोस्रो वर्ष प्रवेश गरिसके,’ उनले भने, ‘तर शिक्षक र कर्मचारीले अझै तलब पाएनौं ।’ विद्यार्थीबाट झन्डै ५०/६० लाख शुल्क रकम असुलेर पनि तलब नखुवाउनु प्रतिष्ठानको चरम लापरबाही भएको उनको भनाइ छ ।

फार्मेसी कार्यक्रमका लागि आवश्यक पर्ने बजेटको व्यवस्था गर्न नसक्दा शिक्षक र कर्मचारीलाई तलब भुक्तानी गर्न ढिलाइ भएको प्रिन्सिपल रवीन्द्रकुमार रोकायले बताए । कार्यक्रम सञ्चालन गर्नुअघि आवश्यक बजेट जिल्लाबाटै जुटाउने सहमति भए पनि सरोकारवालाले वास्ता नगर्दा समस्या भएको उनको भनाइ छ । ‘सञ्चालन तथा व्यवस्थापन खर्च र शिक्षक कर्मचारीको तलबलगायत खर्च जिल्लास्तरबाटै व्यहोर्ने गरी जाजरकोटमा डिप्लोमा इन फार्मेसी कार्यक्रम सुरु भएको हो,’ उनले भने, ‘तर विद्यार्थीको शुल्कबाहेक अरू रकम जुट्न सकेन ।’

सम्बन्धित संस्थामा बजेटको व्यवस्था हुन नसकेपछि प्रतिष्ठानमार्फत तलब खुवाउन पहल थालिएको रोकायले बताए । उनका अनुसार विद्यार्थीहरूबाट अहिलेसम्म ५० प्रतिशत मात्र शुल्क लिइएको छ । विद्यार्थीहरूले ३ वर्षे फार्मेसी कार्यक्रम अध्ययनका लागि करिब ४ लाख रुपैयाँ तिर्नुपर्ने उनले जानकारी दिए ।

कर्णाली स्वास्थ्य विज्ञान प्रतिष्ठानले भने जाजरकोटमा फार्मेसी कार्यक्रमको पठनपाठन बन्द गर्ने तयारी गरेको छ । चिकित्सा शिक्षा आयोगले सीटीईभीटीबाहेकका संस्थाले डिप्लोमा फार्मेसीलगायत शैक्षिक कार्यक्रम सञ्चालन गर्न नपाउने नियम बनाएपछि प्रतिष्ठानले उक्त कार्यक्रम बन्द गर्ने तयारी गरेको हो । कार्यक्रम बन्द हुने भएपछि घर छेउमा डिप्लोमा तहको प्राविधिक विषय पढ्न पाउने आशा बोकेका विद्यार्थी निराश बनेका छन् । ‘जाजरकोटमा फार्मेसी कार्यक्रम हात्ती आयो, हात्ती आयो फुस्साजस्तै भयो,’ विद्यार्थी कल्पना बुढाले भनिन्, ‘एक ब्याजबाहेक अरू पढाइ नहुने भएपछि विद्यार्थीलाई मर्का परेको छ ।’

प्रकाशित : असार २९, २०७८ १०:११
प्रतिक्रिया
पठाउनुहोस्

सरकारमा पठाउने नेता चयन गर्न माओवादी केन्द्रको बैठक

कान्तिपुर संवाददाता

काठमाडौँ — कांग्रेस सभापति शेरबहादुर देउवाको नेतृत्वमा गठन हुने नयाँ सरकारमा कसलाई पठाउने भन्नेबारेमा निणर्य गर्न नेकपा माओवादी केन्द्रको स्थायी कमिटी बैठक बसिरहेको छ ।

पेरिसडाँडास्थित पार्टी केन्द्रीय कार्यालयमा केही बेरदेखि बैठक जारी रहेको माओवादी केन्द्रका अध्यक्ष पुष्पकमल दाहालका प्रेस सल्लाहकार विष्णु सापकोटाले जानकारी दिएका छन् । सरकार गठन र सरकारमा सहभागी हुने नेता चयन गर्नका लागि स्थायी कमिटी बैठक बोलाइएको उनले बताए ।

कांग्रेस सभापति देउवाले आजै राष्ट्रपतिसमक्ष प्रधानमन्त्रीको पदको शपथ लिँदैछन् । आजै कांग्रेस, माओवादी केन्द्र र जनता समाजवादी पार्टीको उपेन्द्र समूहबाट सानो मन्त्रिपरिषद् बनाउने तयारी रहेको छ ।

संविधानको दायरा नाघेर राष्ट्रपतिबाट स्वेच्छाचारी निर्णय भएको ठहर गर्दै सर्वोच्च अदालतले सोमबार शेरबहादुर देउवालाई प्रधानमन्त्री नियुक्त गर्न परमादेश जारी गरेको थियो। संविधान र अघिल्लो फैसलाको समेत प्रतिकूल भएको भन्दै सर्वोच्चले प्रतिनिधिसभा विघटनको निर्णय पनि बदर गरेको छ ।

मंगलबार अपराह्नसम्म देउवालाई प्रधानमन्त्रीमा नियुक्त गर्न र आगामी साउन ३ भित्र प्रतिनिधिसभा अधिवेशन डाक्न पनि आदेश जारी भएको छ ।

सम्बन्धित समाचार

प्रकाशित : असार २९, २०७८ १०:०८
पूरा पढ्नुहोस्
प्रतिक्रिया
पठाउनुहोस्
×