विवादले भएन गाउँसभा- कर्णाली - कान्तिपुर समाचार

विवादले भएन गाउँसभा

राजबहादुर शाही

मुगु — जनप्रतिनिधिबीच विवाद हुँदा सोरु गाउँपालिकाको गाउँसभा अन्योलमा परेको छ । जनप्रतिनिधिको विवादले आठौं अधिवेशन तथा बजेट सभा प्रभावित भएको हो ।

यसअघि असार २० गतेका लागि गाउँसभा तोकिएको थियो । तर एमाले र माओवादी केन्द्रका जनप्रतिनिधिका कारण प्रमुख अतिथिको टुंगो नलाग्दा गाउँसभा हुन नसकेको हो ।

एमालेका जनप्रतिनिधिले पूर्वप्रतिनिधिसभा सदस्य गोपालबहादुर बमलाई र माओवादी केन्द्रले पूर्वसांसद नवराज धामीलाई प्रमुख अतिथि बनाउन खोजेपछि विवाद भएको हो । प्रमुख अतिथिको विषयमा दुवै दलका जनप्रतिनिधिबीच विवाद हुँदा २० गते गाउँसभा बस्न नसकेको प्रमुख प्रशासकीय अधिकृत वीरेन्द्र मल्लले बताए ।

असार १० गतेभित्रै गाउँसभा सम्पन्न गरिसक्नुपर्ने संवैधानिक व्यवस्था भए पनि जनप्रतिनिधिको विवादका कारण अन्योल भएको कर्मचारीको भनाइ छ । जिल्लाका चार स्थानीय तहमध्ये सोरु गाउँपालिकाले मात्र बजेट अधिवेशन गर्न सकेको छैन । छायानाथरारा नगरपालिका, खत्याड र मुगुमकार्मारोङ गाउँपालिकाले असार १० गते नै गाउँसभा सञ्चालन गरेका छन् । ती पालिकामा बजेटसमेत पारित भइसकेको छ ।

यसअघि तोकिएको मितिमा गाउँसभा बस्न नसकेपछि शुक्रबार बजेट प्रस्तुत गर्ने कार्यक्रम तय गरिएको गाउँपालिका अध्यक्ष लोकबहादुर शाहीले बताए । ‘फेरि पनि प्रमुख अतिथिका रूपमा विवाद भए बन्द सत्र मात्र गरी बजेट पारित गरिनेछ,’ उनले भने, ‘असार मसान्तभित्र नीति तथा कार्यक्रम र बजेट पारित गर्नुपर्ने संवैधानिक बाध्यता भए पनि समस्या भयो ।’

सोरुमा विभिन्न बहानामा विवाद हुने गरेको स्थानीय कमल शाहीले बताए । ‘कहिले प्रमुख प्रशासकीय अधिकृत आफ्नो पक्षका राख्न विवाद हुन्छ त कहिले प्रमुख अतिथि बनाउन,’ उनले भने, ‘जनप्रतिनिधिकै विवादका कारण हामीले स्थानीय सरकारको अनुभूति गर्न पाएका छैनौं ।’ उनका अनुसार विवादकै कारण गाउँपालिकाले अहिलेसम्म प्रशासनिक भवन निर्माण गर्न सकेको छैन । सबै वडा भवनविहीन छन् । गत वर्ष पालिकामा करिब ४० करोड रुपैयाँ विनियोजन भएको थियो ।

प्रकाशित : असार २८, २०७८ १०:३७
प्रतिक्रिया
पठाउनुहोस्

६ महिनादेखि तलबविहीन

विप्लव महर्जन

सल्यान — वनगाडकुपिन्डे नगरपालिकाको वडा कार्यालयमा कार्यरत १२ कर्मचारीले ६ महिनादेखि तलब पाएका छैनन् । करार सेवामा भर्ना भएका उनीहरुले नगरपालिकाले विभिन्न बहाना बनाउँदै तलबबाट वञ्चित गरेको बताएका छन् ।

समयमै तलब नपाए वडाका कुनै पनि कामकाज नगरी आन्दोलन गर्ने र नगरपालिका तालाबन्दी गर्ने कर्मचारीले चेतावनी दिएका छन् । जागिर सुनिश्चित गर्न नगर प्रमुख गोविन्दकुमार पुनलाई ध्यानाकर्षण पत्र बुझाउनुका साथै पटकपटक छलफल गरे पनि सुनुवाइ नभएको उनीहरूको भनाइ छ ।

कर्मचारी डिल्ली विकले वडा कार्यालयमा लगातार काम गरिरहेको र तलबका लागि बारम्बार माग राख्दै आए पनि विभिन्न उल्झन देखाउँदै बेवास्ता गर्ने गरिएको बताए । ‘नगरपालिकाले सुरुमा सहायक लेखापाल भनेर नियुक्ति दियो, त्यसपछि सामाजिक परिचालक भनेर नियुक्ति दियो,’ उनले भने, ‘पछिल्लो ६ महिनामा त नियुक्तिसमेत दिइएको छैन ।’

अर्का कर्मचारी धनबहादुर सुनारले जनप्रतिनिधिभन्दा पनि प्रमुख प्रशासकीय अधिकृतले करार अवधि थप्न र तलब दिन अवरोध गरिरहेको बताए । तलब नदिए पनि काम भने गरिरहेको उनको भनाइ छ । ‘कोरोना महामारीको बेलासमेत हामी ज्यानको पर्वाह नगरी काममा खटियौं, अहिले त्यसको मूल्यांकन हुनु त टाढाको कुरा तलबसमेत दिइएन,’ उनले भने, ‘हामीसँगै काम गरेका अन्य कर्मचारीले जोखिम भत्ता पाएका छन्, हामी भने तलब नपाएर रुनुपरेको छ ।’ लामो समय तलब नपाउँदा पसलबाट उधारो रासन लिएर जीवन धान्नुपरेको उनले बताए ।

वनगाडकुपिन्डे नगरपालिका प्रमुख गोविन्द पुनले ६ महिनाअघि गरेको निर्णयमा केही गल्ती भएकाले कर्मचारीले तलब खान नपाए पनि कर्मचारी तलबबाट वञ्चित नहुने बताए । अब बस्ने बैठकले कर्मचारीको कामको मूल्यांकन गरेर उनीहरूको जागिरको सुनिश्चिततासमेत गर्ने उनको भनाइ छ ।

प्रकाशित : असार २८, २०७८ १०:३१
पूरा पढ्नुहोस्
प्रतिक्रिया
पठाउनुहोस्
×