वीरेन्द्रनगरमा धमाधम पार्क बन्दै- कर्णाली - कान्तिपुर समाचार

वीरेन्द्रनगरमा धमाधम पार्क बन्दै

ज्योति कटुवाल

सुर्खेत — वीरेन्द्रनगर नगरपालिकाले यो वर्ष पार्क निर्माणमा ठूलो रकम खर्चिएको छ । चालु आवमा वीरेन्द्रनगर–८ मा सात वटा पार्क निर्माणाधीन छन् ।

नगरपालिकाले संघीय र प्रदेश सरकारको समन्वयमा पार्क निर्माणको योजना अघि सारेको हो । यो वर्ष वीरेन्द्रनगरमा मात्रै १२ वटा पार्क निर्माण भइरहेका छन् । अधिकांश पार्क निर्माण भइसकेका छन् । केहीको काम अन्तिम चरणमा पुगेको छ । नगरपालिकामा यो वर्ष बाल उद्यान, सहिद, भानु , भानुभक्त र बुलबुले उद्यान पार्कमा रकम विनियोजन गरिएको छ । त्यस्तै गडी, मुस्कान, गुराँस, संगम, चौगान, सिटी पार्क र गुरुङचौक पार्क निर्माणाधीन छन् । प्रदेश, संघ र नगरको झन्डै ३ करोड रुपैयाँको लागतमा यी पार्क बन्न लागेका हुन् ।

८ नम्बर वडाको खुलामञ्चमा पार्क बनाउन वीरेन्द्रनगर–६, ७ र ८ नं. वडाले १ करोड रुपैयाँ विनियोजन भएको छ । सोही वडामा मुस्कान, गुराँस, संगम र सिटी पार्कको निर्माण सम्पन्न भइसकेको छ । थप चार पार्क अन्तिम चरणमा पुगेका छन् । नगरपालिकाले गत वर्ष ४ नम्बर वडामा १ करोड १३ लाख रुपैयाँ खर्च गरी सहिद स्तम्भ र पानीको फोहोरा बनाएको थियो । यस वर्ष सोही पार्कमा पर्खाल र स्वागतद्वार निर्माणको काम भइरहेको छ । वीरेन्द्रनगरमै २१ करोड रुपैयाँको लगानीमा चौंघान पार्क निर्माणाधीन छ । उपत्यका नगर विकास समितिमार्फत बन्ने पार्क ५५ रोपनीमा क्षेत्रफलमा निर्माण भइरहेको हो । सहिद पार्कमा अघिल्लो वर्ष वर्ष १ करोड रुपैयाँ विनियोजन गरेको नगरपालिकाले गत वर्ष २ करोड ५० लाख र यो वर्ष ७२ लाख रुपैयाँ छुट्याएको छ । त्यस्तै, चौघान पार्कमा गत वर्ष १ करोड छुट्याइएकोमा यो वर्ष १ करोड ७२ हजार रुपैयाँ खर्च हुँदै छ ।

यो वर्ष संगमपार्कमा २५ लाख, गुराँसपार्कमा १५ लाख र भानुपार्कमा १० लाख रकम विनियोजन गरिएको नगरपालिकाका प्रमुख प्रशासकीय अधिकृत टीकाराम ढकालले बताए । ‘स्थानीयको माग र नगरपालिकाको सुन्दरताका लागि पार्क निर्माण गरिरहेका हौं,’ उनले भने, ‘पर्यटकीय विकासका लागि पनि पार्क अनिवार्य छ ।’ उनले पुराना र ऐतिहासिक महत्त्वका पार्कलाई थप व्यवस्थित बनाइने बताए । गुरुयोजनाअनुसार पार्क निर्माण भइरहेको उनको भनाइ छ ।

यसैबीच, वीरेन्द्रनगरको खुलामञ्चमा निर्माणाधीन पार्कको काम रोक्न भन्दै उच्च अदालत सुर्खेतमा रिट दायर भएको छ । अधिवक्ता शेरबहादुर खत्रीले नगरपालिकाले नगर गुरुयोजनाविपरीत पार्क निर्माण गरेको भन्दै यसलाई रोक्न रिट दर्ता गराएका हुन् । सुर्खेत उपत्यका नगर विकास समितिसहित ६ जनालाई विपक्षी बनाएर रिट निवेदन दर्ता गरिएको छ । उनले सार्वजनिक खुला क्षेत्रमा पार्क निर्माण गरी कुरुप हुनबाट रोक्न रिट निवेदन दर्ता गरिएको बताए ।

प्रकाशित : असार २७, २०७८ १०:१३
प्रतिक्रिया
पठाउनुहोस्

संक्रमण बढ्दै, छैन सावधानी

ज्योति कटुवाल

दैलेख — स्थानीयले सुरक्षा सावधानी नअपनाउँदा दैलेखमा कोरोना संक्रमण बढेको छ । परीक्षण गराएकामध्ये आधा व्यक्तिमा कोरोना देखिएको स्वास्थ्य सेवा कार्यालयले जनाएको छ ।

कार्यालयका अनुसार निषेधाज्ञा खुकुलो भएपछि स्थानीयहरू जथाभावी हिँडडुल गर्दा कोरोना संक्रमण बढेको हो । एक साताको अवधिमा ९९ जनाको स्वास्थ्य परीक्षण गर्दा ५० जनामा कोरोना देखिएको निमित्त स्वास्थ्य सेवा व्यवस्थापक थीरप्रसाद रेग्मीले बताए । ‘निषेधाज्ञा जारी हुँदा केही समय संक्रमित घटे, तर लकडाउन खुल्नासाथ संक्रमण दर आधा बढ्यो,’ उनले भने, ‘दैनिकजसो संक्रमित बढे नियन्त्रण गर्न गाह्रो हुन्छ ।’

संक्रमण दर मात्रै होइन, दैलेखमा दुई सातायता मृत्युदर पनि बढिरहेको छ । गत आइतबार कांग्रेस दैलेखका पूर्वसभापति जगजंग थापाको कोरोना संक्रमणबाट मृत्यु भयो । त्यसको ३ दिन नबित्दै बुधबार डुगेश्वर गाउँपालिका–२ लाँकुरीका ६१ वर्षीय वडा सदस्य तेजबहादुर थापाले ज्यान गुमाए । संक्रमितको धमाधम मृत्यु भएपछि ग्रामीण क्षेत्रमा त्रास छाएको छ । ‘त्रास बढ्यो तर सावधानी भएन,’ रेग्मीले भने, ‘भीडभाड बढेपछि धमाधम संक्रमित थपिन थाले ।’ उनका अनुसार अहिलेसम्म जिल्ला अस्पतालको आइसोलेसनमा मात्रै २७ जना कोरोना संक्रमितले ज्यान गुमाएका छन् । जिल्लामा शुक्रबारसम्म संक्रमितको संख्या ३ हजार ३ सय ६१ पुगेको छ ।

संक्रमितहरू आइसोलेसनमा नबस्दा संक्रमण फेरि बढ्न थालेको नारायण नगरपालिका–१ का मनोज थापाले बताए । ‘लकडाउन हुँदासम्म स्थानीयहरू बाहिर निस्कनसमेत डराउँथे,’ उनले भने, ‘अहिले त संक्रमित नै खुलमखुला हिँडिरहेका छन् ।’

संक्रमित व्यक्तिले नै लापरबाही गर्दा जोखिम बढेको जिल्ला प्रहरी कार्यालयका प्रहरी निरीक्षक अनुप श्रेष्ठले बताए । ‘धमाधम मृत्यु बढे पनि सावधान भएन,’ उनले भने, ‘बजार क्षेत्रमा जथाभावी हिँड्नेलाई कडाइ गरिरहेका छौं ।’

उनले मास्क लगाएर र स्वास्थ्य सुरक्षा मापदण्ड अपनाएर मात्र अत्यावश्यक काममा निस्कन स्थानीयलाई आग्रह गरिएको बताए । संक्रमित बढेपछि जिल्ला प्रशासनले असार १७ गतेदेखि विवाह, व्रतबन्ध, मृत्यु संस्कारलगायत धार्मिक तथा सामाजिक कार्यमा बढीमा १५ जना मात्रै सहभागी हुन पाउने सूचना जारी गरेको छ ।

प्रकाशित : असार २६, २०७८ ११:३८
पूरा पढ्नुहोस्
प्रतिक्रिया
पठाउनुहोस्
×