निषेधाज्ञामा चर्को भाडा असुली

स्थानीय प्रशासनले सार्वजनिक गाडी सञ्चालन गर्न नदिए पनि अनुमतिपत्रका आधारमा यातायात सञ्चालन गर्न दिएको छ । अहिले जिल्लाबाट दैनिक ५ वटासम्म गाडी विभिन्न जिल्लाका लागि छुट्ने गरेका छन् । व्यवसायीले महँगो भाडा लिन थालेपछि मजदुरीका लागि भारत जाने विपन्न नागरिकलाई मर्का परेको छ ।

गाउँमा खेतबारीको काम सकिएको भन्दै एक सातायता भारत जानेहरूको संख्या बढेको छ । सल्लीबजारबाट नेपालगन्जसम्मका लागि बसमा ३ सय ५० र साना गाडीमा ४ सयदेखि ५ सय रुपैयाँसम्म भाडा तोकिएको छ । तर व्यवसायीले प्रतिव्यक्ति दुई हजार रुपैयाँसम्म भाडा लिइरहेको यात्रुको गुनासो छ ।

गाउँमा रोजगारी नपाइँदा भारत जानुको विकल्प नभएको बन्गाडकुपिण्डे नगरपालिका–५ का रामबहादुर रोकाले बताए । उनले ५ दिनदेखि नेपालगन्ज जान खोजे पनि भाडा महँगो हुँदा जान नसकिएको बताए । ‘एक त गाडी पाइँदैन,’ उनले भने, ‘पाइए पनि भाडा अचाक्ली महँगो छ ।’ उनी कोरोना महामारीकै कारण गत वर्ष भारतबाट रोजगारी गुमाएर फर्किएका हुन् । बाटोमा चेकजाँच नहुँदा यातायात व्यवसायीको मनोमानी बढिरहेको बामेका लालबहादुर बुढाले बताए ।

बामेबाट नेपालगन्जसम्मका लागि ५ सय रुपैयाँ भाडा तोकिए पनि २ हजार रुपैयाँ तिर्नुपर्ने बाध्यता भएको उनको गुनासो छ । जरुरी काममा बाहिर जानेहरूका लागि अनुमतिपत्र लिएर गाडी सञ्चालन गरिरहेको भेरी–राप्ती यातायात व्यवसायी समितिका अध्यक्ष इन्द्र पुनले बताए । उनका अनुसार यातायात व्यवसायीलाई नियमअनुसार नै भाडा लिन निर्देशन दिइएको छ । ‘नियमित गाडी सञ्चालन नभएकाले केहीले रिजर्वमा गाडी लिइरहेका छन्,’ उनले भने, ‘बढी भाडा लिएको पाइए व्यवसायीलाई कारबाही गरिनेछ ।’

उनका अनुसार सल्लीबजारबाट नेपालगन्ज, जाजरकोट, चौरजहारीलगायत ठाउँमा दैनिक ५/६ वटा गाडी सञ्चालन भइरहेका छन् । इलाका प्रहरी कार्यालय सल्लीबजारका प्रहरी नायब निरीक्षक विनोद रेग्मीले पास लिएर सञ्चालन भएका गाडीलाई ठाउँठाउँमा चेकजाँच गरिरहेको बताए ।