कर्णाली प्रदेशसभामा प्रतिपक्षीको अवरोध- कर्णाली - कान्तिपुर समाचार

कर्णाली प्रदेशसभामा प्रतिपक्षीको अवरोध

चाँदनी कठायत

वीरेन्द्रनगर — प्रमुख प्रतिपक्षी दल नेकपा एमालेले शुक्रबारको कर्णाली प्रदेशसभा बैठक अवरुद्ध पारेको छ । बैठकको सुरुमै बोल्दै एमालेका प्रमुख सचेतक गुलाबजंग शाहले आफ्ना पार्टीका ३ जना मन्त्रीले राजीनामा दिनुपर्ने विषय उठाएपछि प्रतिपक्षी दल एमालेका सांसदले उठेर संसद् चल्न नदिएका हुन् ।

सचेतक शाहले सर्वोच्चले सांसद पदमा पुनर्वहाली गरिदिएपछि उनीहरु एमालेका सांसद भएको भन्दै अब मन्त्री पदमा बस्न नमिल्ने बताए । ‘एमालेले सरकारलाई साथ दिएको भन्ने हल्ला छ,’ उनले भने, ‘सरकारलाई साथ दिने/नदिने भन्ने त पार्टीले गर्ने निर्णय हो कोही व्यक्तिको इच्छाले हुँदैन,’ उनले भने, ‘हामीले पहिलेदेखि नै माग गर्दै आएको विषय सुनुवाइ नभएकाले यो सदन अगाडि बढ्न सक्दैन ।’

एमालेले आफ्नो पार्टीले सरकारलाई साथ नदिएको भन्दै उनले एमाले पनि सरकारमा गएको भनेर बदनाम गरिरहेको सचेतक शाहले बताए । पहिले अर्कै परिस्थितबाट मन्त्री भएकाहरु अहिले परिस्थिति फेरिँदा पनि फेरि उही पदमा उनीहरुलाई सामेल गराइराख्न नमिल्ने उनको भनाइ छ । प्रतिपक्षी दल एमालेका सांसदहरुलाई बजेटको छलफल अगाडि बढाउन सभामुख राजबहादुर शाहीले आग्रह गरेका थिए । तर एमालेले आफ्नो अडान नछाडेपछि कर्णाली प्रदेशसभामा शुक्रबार पनि आगामी बजेटमाथिको छलफल सुरु हुन सकेन ।

प्रदेशसभाको बैठक आगामी आइतबार दिउँसो २ बजेसम्म स्थगित भएको छ ।

प्रकाशित : असार ११, २०७८ १६:०२
प्रतिक्रिया
पठाउनुहोस्

पुनर्निर्माण प्राधिकरणका इन्जिनियरहरु पक्राउ

तस्बिर : इलिट जोशी

काठमाडौँ — सिंहदरबार घेराउ गर्न गएका राष्ट्रिय पुनर्निर्माण प्राधिकरणमा कार्यरत इन्जिनियरहरुलाई प्रहरीले पक्राउ गरेको छ ।


राष्ट्रिय पुनर्निर्माण प्राधिकरण: प्राविधिक राष्ट्रिय हकहित संरक्षणमा रहेका इन्जिनियरहरु सिंहदरबार घेराउ गर्न हनुमानस्थान र माइतीघरबाट अगाडि सहरी विकास तथा भवन निर्माण विभाग अगाडिबाट पक्राउ परेका हुन् ।

सरकारले प्रत्येक वर्ष दिने भनिएको अतिरिक्त सुविधाहरुबाट पूर्ण वञ्चित गराइएको भन्दै इन्जिनियरहरु आन्दोलित हुँदै आएका छन् ।

२०७२ साल वैशाख १२ गतेको भूकम्प र त्यसपछिको पराकम्पनले देश र देशवासी संकट परेको बेला सरकारको आह्वानमा राष्ट्रिय पुननिर्माण प्राधिकरण अन्तर्गत रही नेपालको पुनर्निर्माणलाई अगाडि बढाएको इन्जिनियरहरुको दाबी छ ।

देश र जनताका हितका लागि इन्जिनियरिङ जनशक्तिको सिप र दक्षता खेर जान नदिन र विदेसिन बाध्य नपार्न उचित व्यवस्थापन गर्न सरकारलाई दबाब दिन आन्दोलनमा उत्रनु परेको बताएका छन् ।

भूकम्प पछिको पुनर्निमाणको काम बाँकी रहेको बेला हटाएर बेरोजगार बनाउन खोजेको भन्दै बाध्य भएर आन्दोलन गर्नुपरेको इन्जिनियरहरुले बताएका छन् ।

प्रकाशित : असार ११, २०७८ १५:३२
पूरा पढ्नुहोस्
प्रतिक्रिया
पठाउनुहोस्
×