तीन दिनदेखि खलंगा अँध्यारो

नेपाल विद्युत् प्राधिकरणले तीन दिनसम्म पोल मर्मतमा ध्यान नदिँदा जाजरकोटवासी अँध्यारोमा बस्न बाध्य भएका हुन् ।

विद्युत् नहुँदा सरकारी तथा गैरसरकारी कार्यालयका कामकाज प्रभावित भएका छन् । बिजुली नआएपछि खलंगाका १ हजार ५ सय परिवार अँध्यारोमा बस्न बाध्य छन् । खलंगा बजारमा वितरण भएको केन्द्रीय विद्युत् लाइन पटकपटक अवरुद्ध हुँदा उपभोक्ताले सास्ती भोग्नुपरेको भेरी नगरपालिका–३ न्युरोडका कमानबहादुर खड्काले बताए । ‘नियमित विद्युत् आपूर्तिमा प्राधिकरणले बेवास्ता गरिरहेको छ,’ उनले भने, ‘१/२ घण्टामा मर्मत हुने लाइन ३ दिन बित्दासमेत सुचारु नहुनु गम्भीर लापरबाही हो ।’

विद्युत् अभावमा उद्योग, व्यापार, बैंकिङ कार्य, पठनपाठन, सरकारी सेवा प्रवाह, पूर्वाधार विकासलगायत काममा बाधा भएको सहायक प्रमुख जिल्ला अधिकारी हरिप्रसाद देवकोटाले बताए । उनका अनुसार सुर्खेतको बोटेचौरमा ११ केभी प्रसारण लाइनमा समस्या भएपछि विद्युत् सेवा बन्द भएको हो । लाइन सुचारु गर्न वितरण केन्द्रलाई निर्देशन दिइसकिएको उनले जानकारी दिए । सुर्खेतमा विच्छेद भएको विद्युत् लाइन मर्मतका लागि टोली निरन्तर खटेको प्राधिकरणका प्राविधिक रत्न हमालले बताए । उनका अनुसार लगातारको वर्षाले विद्युत् लाइन मर्मतमा समस्या भएको छ ।