पहिरोले कर्णाली राजमार्ग अवरुद्ध
कालीकोट — तीन दिनदेखिको अविरल वर्षापछिको पहिरोले कर्णाली राजमार्गको सुर्खेत-जुम्ला सडकको ठाउँ ठाउँमा पहिरो खस्दा राजमार्ग अवरुद्ध भएको छ ।
दैलेखको किटु, कालीकोटको गगनेखोला, हुल्म, सुनार खोला, पिली सेराबाड़ा, खल्लागाड र भिग्ममा पहिरो खसेको हो । केही ठाउँमा सोमबार पहिरो पन्छाए पनि वर्षा नरोकिएकोले पुन: अवरुद्ध भएको प्रमुख जिल्ला अधिकारी कृष्णप्रसाद आचार्यले बताए ।
राजमार्ग अवरुद्ध हुँदा कालीकोट, जुम्ला र मुगुका लागि दैनिक उपभोग्य सामान र निर्माण सामग्री बोकेर आएका गाडी बाटोमा रोकिएका छन् ।
वर्षा नरोकिएकाले पहिरो पन्छाउन कठिन छ । पहिरोले सडक अवरुद्ध हुँदा बाटोमा सास्ती भएको सुर्खेतबाट जुम्ला जान सोमबार बिहान ५ बजे हिँडेका समाज कल्याण परिषदका सदस्य गोविन्दबहादुर शाहीले बताए । उनका अनुसार ठूलो पहिरो ६/७ ठाउँमा मात्र भए पनि सानो पहिरो ४०/५० ठाउँमा झरेको छ ।
