हिमाली बस्तीमा फैलिँदै कोरोना- कर्णाली - कान्तिपुर समाचार

हिमाली बस्तीमा फैलिँदै कोरोना

कान्तिपुर संवाददाता

मुगु — मुगमकार्मारोङ गाउँपालिकाका विभिन्न बस्तीमा कोरोना संक्रमणको दर बढेको छ । ज्वरो र रुघाखोकीका बिरामी बढेपछि गाउँपालिकाले परीक्षणलाई तीव्रता दिएको छ । तर जहाँ परीक्षण गर्‍यो उतै संक्रमित भेटिएपछि स्थानीय बासिन्दा त्रसित बनेका छन् । 

एक सातायता गरिएका परीक्षणमा सोरु, खत्याड र छायानाथरारा नगरपालिकाको तुलनामा मुगमकार्मारोङमा कोरोना संक्रमणको दर बढी छ । गाउँपालिकामा आइतबारसम्म १ सय ५० जनामा संक्रमण पुष्टि भइसकेको छ । माग्री, मह, पुलु, चिमात, पापु, रिउस, सेरोक, किम्री, दाउरा, ताखा, चितैलगायत गाउँमा धमाधम संक्रमित बढेपछि नियन्त्रणमा समस्या देखिएको हो । मुममकार्मारोङ जिल्लामा सबैभन्दा बढी चिसो हुने क्षेत्र हो । एक गाउँका झन्डै ९० प्रतिशत बिरामीमा कोरोना देखिएको गाउँपालिकाका स्वास्थ्य संयोजक बलिराज बुढाले बताए । ‘अरू स्थानीय तहमा संक्रमण घट्दो छ,’ उनले भने, ‘यहाँ भने जसलाई परीक्षण गर्‍यो उसैमा कोरोना पुष्टि भइरहेको छ ।’ उनले एउटै घरमा ४/५ जनासम्म बिरामी परेपछि उपचारमा समस्या भएको बताए ।

एन्टिजेन किट अभावले तीव्ररूपमा परीक्षण भने हुन नसकेको स्वास्थ्य संयोजक बुढाले बताए । उनका अनुसार कोरोनाका कारण गाउँपालिकामा अहिलेसम्म ४ जनाको मृत्यु भइरहेको छ । उनले कोरोना परीक्षण तथा उपचारका लागि गाउँगाउँमा स्वास्थ्यकर्मीको टोली परिचालन गरिएको जानकारी दिए । संक्रमितको मृत्यु हुँदा मलामीको भीड लाग्ने गरेकाले पनि कोरोना समुदायस्तरमै फैलिएको स्वास्थ्यकर्मीको आशंका छ । आइसोलेसनको व्यवस्था नहुँदा सबै संक्रमितलाई होम आइसोलेसनमा बस्न आग्रह गरिएको गाउँपालिकाका सूचना अधिकारी तीर्थराज शाहीले बताए । ‘स्वास्थ्य मापदण्ड पूरा नगरी सामूहिक काम गर्दा पनि समुदायस्तरमा संक्रमण देखियो,’ उनले भने, ‘संक्रमित बढेपछि स्वास्थ्यकर्मीले दैनिक निगरानी गर्न थालेका छन् ।’ संक्रमित बढेपछि गाउँपालिकाका सबै सेवा प्रवाह बन्द गरिएको उनले बताए ।

औषधि न स्वास्थ्यकर्मी

मुगमकार्मारोङमा कोरोना संक्रमितको संख्या बढे पनि औषधि र स्वास्थ्यकर्मी पर्याप्त नहुँदा उपचारमा समस्या भएको छ । अधिकांश स्वास्थ्य संस्थामा सिटामोलसमेत नभएपछि संक्रमितहरू घरेलु उपचारको भरमा छन् ।गाउँपालिकाले खरिद गरेको अधिकांश औषधिको मौज्दात सकिएको स्वास्थ्य संयोजक बुढाले बताए । उनका अनुसार प्रदेश र संघीय सरकारले थप औषधि नपठाउँदा उपचारमा समस्या छ । रिउस, माग्री र पुलु स्वास्थ्यचौकीमा औषधि अभावको समस्या बढी छ ।

गाउँपालिकामा एक जना पनि चिकित्सक छैनन् । सबै स्वास्थ्यचौकी अहेब र अनमीको भरमा भएकाले पनि उपचारमा समस्या भएको उनले बताए । उनका अनुसार केही स्वास्थ्यकर्मी संक्रमित भएपछि उपचारमा थप समस्या भएको हो । महामारी नियन्त्रणका लागि जुम्लास्थित कर्णाली स्वास्थ्य विज्ञान प्रतिष्ठानलाई चिकित्सक पठाइदिन आग्रह गरिएको स्वास्थ्य संयोजक बुढाले बताए ।

प्रकाशित : जेष्ठ ३१, २०७८ ०८:३९
प्रतिक्रिया
पठाउनुहोस्

बर्खा नलाग्दै सडक अवरुद्ध

पहिरो हटाउन कम्तीमा एक महिना लाग्ने
राजबहादुर शाही

मुगु — बर्खा नलाग्दै जिल्लाका अधिकांश ग्रामीण सडकमा यातायात सेवा अवरुद्ध भएको छ । सडक अवरुद्ध भएपछि सदरमुकाम आएका स्थानीय घण्टौ पैदल हिँडेर गन्तव्यमा जान बाध्य छन् ।

पहिरोले अवरुद्ध मुगुको गमगढी–छाइल सडकखण्ड । तस्बिर : राजबहादुर/कान्तिपुर

मुगमकार्मारोङ गाउँपालिकालाई सदरमुकाम सँग जोड्ने गमगढी–छाइल सडकको झन्डै १२ स्थानमा ठूला पहिरो खसेपछि यातायातका साधन सञ्चालन हुन समस्या भएको छ । उक्त सडकको भट्टडाँडी, सालिमखोला, नाकेभीर, सुनाथ, कम्फाखोला, छाइलखोलालगायत ठाउँमा पहिरो खसेको मुगुमकार्मारोङ गाउँपालिका अध्यक्ष छिरिङक्याप्ने लामाले बताए । ‘जताततै पहिरै पहिरो खसेको छ,’ उनले भने, ‘बिरामीलाई अस्पताल लैजानसमेत समस्या भयो ।’

पहिरोले छायानाथरारा नगरपालिका र मुगुमकार्मारोङ गाउँपालिकाको सिमानामा बनेको स्वागतद्वार भत्किएको उनले बताए । उनले सडकमा गएको पहिरो हटाउन कम्तीमा एक महिना लाग्ने बताए ।

कर्णाली राजमार्गअन्तर्गत गमगढी– नाग्मा सडक खण्डको ताल्च, झयारी–पिना, घुच्ची, गोठीज्यूलालगायत ठाउँमा पनि पहिरो खसेपछि गाडी चलाउन मुस्किल भएको चालकहरूको गुनासो छ । सामान्य पानी पर्दासमेत सडक हिलाम्मे हुँदा सवारीसाधन चल्न समस्या भएको गाडी चालक कमल विकले बताए । उनका अनुसार हरेक वर्ष सडक फराकिलो बनाउने नाममा डोजर लगाएर जथाभाबी माटो फाल्दा राजमार्ग जोखिमपूर्ण बनेको हो । गमगढीदेखि ताल्च विमानस्थलसम्मको ९ किलोमिटर सडक पनि जोखिमपूर्ण बनेको उनले जानकारी दिए ।

जिल्लामा कुनै पनि सडक कालोपत्रे नहुँदा झन्डै ६ महिना सडक अवरुद्ध हुने गरेको स्थानीय युवा सुमन मल्लले बताए । ‘सामान्य पानी पर्दा त अवस्था यस्तो छ,’ उनले भने, ‘असार–साउनमा झन ठूलो वर्षा हुँदा सडकको अवस्था के होला ?’ उनले तत्काल गमगढी– नाग्मा सडक कालोपत्रे गर्न सरकारसँग माग गरे ।

मुगमकार्मारोङमा कोरोना संक्रमण बढ्दै गए पनि सडक बन्द हुँदा संक्रमितलाई उपचारका लागि लैजान समस्या भएको गाउँपालिकाका सूचना अधिकारी तीर्थराज शाहीले बताए । उनका अनुसार गमगढीदेखि छाइलसम्मको १८ किलोमिटर सडक अवरुद्ध हुँदा दैनिक उपभोग्य सामग्री ढुवानी गर्न समस्या भएको छ । उनले सदरमुकाम गमगढी आउन एक दिन पैदल हिँड्नुपर्ने बाध्यता रहेको सुनाए । ‘वातावरणीय प्रभाव मूल्यांकन बिना जथाभाबी सडक खन्दा अन्य प्रकोपको जोखिमसमेत छ,’ उनले भने, ‘सडक अवरुद्ध भएपछि कृषि उत्पादन गाउँमै थन्किएको छ ।’

प्रकाशित : जेष्ठ ३१, २०७८ ०८:३६
पूरा पढ्नुहोस्
प्रतिक्रिया
पठाउनुहोस्
×