फौजीकिराले मकैबाली सखाप- कर्णाली - कान्तिपुर समाचार

फौजीकिराले मकैबाली सखाप

कान्तिपुर संवाददाता

सल्यान — सिद्धकुमाख गाउँपालिकाका किसानले झन्डै ७ सय रोपनी जग्गामा लगाएको मकैबाली अमेरिकन फौजी र फेदकटुवा किराले सखाप पारेको छ । किराले मकै सखाप पारेपछि झण्डै एक सय किसान परिवार प्रभावित भएका छन् । 


झण्डै ६ महिना खान पुग्ने अन्नबाली फौजीकिराले नष्ट पारेपछि किसान चिन्तित भएका छन् । फौजीकिराले मकै नष्ट पारेपछि कोसा लाग्न थालेका मकै सुकेको बाझकाँडाका किसान दुर्पत बुढाथोकीले बताए । उनले सात रोपनी क्षेत्रफलमा मकैखेती गरेका छन् । विषादी प्रयोग गरे पनि रोग नियन्त्रणमा आउन नसकेको उनको भनाइ छ । ‘आधा मिटरसम्म अग्लो भएका मकै किराले सखाप पार्‍यो,’ उनले भने, ‘अहिले मकैका जरा मात्र बाँकी छन् ।’

अर्का किसान धर्मबहादुर चलाउनेले मकैको कलिलो बिरुवामा किरा लाग्न थालेपछि उत्पादन घट्ने चिन्ता व्यक्त गरे । ‘यो किराले पोहोर साल धानबालीमा असर पार्‍यो, यसपालि मकैमा,’ उनले भने, ‘उत्पादन घटेपछि जीविकोपार्जनमा समस्या हुने देखियो ।’ किरा लागेका बोट उखेलेर खाल्डो खनी गाडे पनि नियन्त्रणमा आउन नसकेको उनको गुनासो छ ।

किराका कारण धमाधम मकैबाली सुकेपछि दोस्रोपटक जोतेर बाली लगाएको मेलबोटकी देवी बुढाथोकीले बताइन् । ‘सुरुमा किरा नदेखिने रहेछ, मकैका बोट सुक्दै गएपछि उखेलेर हेर्दा किराले सखाप पारेको भेटियो,’ उनले भनिन्, ‘फेरि लगाएको मकै पनि क्षति होला भन्ने डर छ ।’ उनले झन्डै ६ रोपनी जग्गामा मकैखेती गरेकी छन् ।


प्रकाशित : जेष्ठ ३०, २०७८ ०८:५८
प्रतिक्रिया
पठाउनुहोस्

नेपालले छनोटमा गुमाएको अवसर

नेपालले विश्वकप २०२२/एसियन कप २०२३ छनोटमा घरेलु भूमिमा प्रतिस्पर्धा गर्न नपाउँदा ठूला टिमविरूद्ध अंक खोस्ने अवसर गुमायो ।
राजु घिसिङ

काठमाडौँ — घरेलु मैदानसँगको आत्मीयता र हजारौं दर्शकको समर्थनले फुटबलमा धेरै फरक पार्छ । विश्वका जुनसुकै टिमले पनि घरेलु मैदानमा उत्कृष्ट प्रदर्शन गरेका तथ्यांक प्रशस्तै छन् । यस्तो अवसर नेपाली टिमले विश्वकप २०२२/एसियन कप २०२३ छनोटको दोस्रो चरणमा पाएन । एउटा आफ्नै कारण र अर्को महामारीले ।

नेपाली टिमले घरेलु मैदानमा खेल्न पाएको भए छनोटको कथा नै फरक हुनसक्थ्यो । हामीसँग विश्वकप छनोटमै १० वर्षअघिका दुई खेलको नतिजा ताजै छ । नेपालले जोर्डनविरुद्ध अम्मानमा ९–० ले हारेको एक साताभित्रै दशरथ रंगशालामा १–१ को बराबरी गरेको थियो । त्यो नतिजा घरेलु मैदान र हजारौं समर्थकले सम्भव भएको खेलाडीहरूले प्रतिक्रिया दिएका थिए । ठीक यही अवसरमा नेपाली टिम यसपालि चुक्यो । जसको प्रत्यक्ष असर एसियन कप छनोटमा परेको छ । विश्वकप छनोटको अर्को चरणमा पुग्ने त नेपालको लक्ष्य पनि थिएन ।

यसपालिको छनोट ‘होम एन्ड अवे’ को आधारमा हुनुपर्ने हो । चार खेल विदेशी भूमिमा र चार खेल स्वदेशी मैदानमा । दशरथ रंगशाला तयार नहुँदा कुवेतविरुद्ध थिम्पू (भुटान) मा खेल्नुपर्‍यो भने तीन खेल कोरोना भाइरसको महामारीका कारण तटस्थ भूमिको रूपमा कुवेत सिटीमा सर्‍यो । नेपालको समूह ‘बी’ मा अस्ट्रेलिया, जोर्डन, कुवेत र चाइनिज ताइपेई परेका थिए । चारै प्रतिद्वन्द्वी फिफा वरीयतामा नेपालभन्दा माथि थिए । छनोटमा नेपालको इतिहास गतिलो थिएन । त्यसैले समूहमा नेपाल एउटा ‘अन्डरडग’ नै थियो ।

जोर्डनविरुद्धको इतिहासकै कारण हामी जे गर्न सक्छौं घरेलु भूमिमै गर्न सक्छौं भन्ने थियो । तर, त्यो अवसर जुरेन । ठूला टिम विशेषगरी अस्ट्रेलिया, जोर्डन र कुवेतविरुद्ध अंक जोड्न सकेन । विश्वकपका पछिल्ला चारै संस्करण खेलेको र युरोपेली लिगमा आबद्ध खेलाडीले भरिएको अस्ट्रेलियाविरुद्ध अंक खोस्न नेपालले जहाँ पनि फलामको च्युरा चपाउनुपर्ने हुन्छ । तर, जोर्डन र कुवेतविरुद्ध असम्भव भन्ने थिएन । कुवेतविरुद्ध थिम्पूमा १–० को झिनो हारले पनि त्यो सम्भावना देखाउँछ । ठूला टिमविरुद्ध अंक जोड्न नसक्दा नेपाल समूहमा चौथो भएर उत्कृष्ट चार (चौथो हुने आठ टिममध्ये) मा पर्न सकेन र सिधै एसियन कप छनोटको तेस्रो चरणमा प्रवेश गर्ने अवसर गुमायो । त्यसैले नेपाल प्लेअफमा झरेको छ । सेप्टेम्बर–अक्टोबरमा हुने प्लेअफमा सफलता हात पार्न सकेमात्रै नेपाल छनोटको तेस्रो चरणमा पुग्नेछ । कम्तीमा ६ खेल खेल्दै फेरि एक वर्ष अन्तर्राष्ट्रिय फुटबलमा व्यस्त हुनका लागि त्यो प्लेअफमा सफलता अनिवार्य छ ।

महामारीअघिका ५ खेलमा नेपाली टिम स्विडिस प्रशिक्षक योहान कालिनले सम्हालेका थिए । महामारीपछि कुवेती प्रशिक्षक अब्दुल्लाह अलमुताइरीको काँधमा जिम्मेवारी आयो । यी दुई प्रशिक्षक फरक सिद्धान्तमा फुटबल खेलाए । त्यसैले छनोटमा नेपाली टिम दुई खालको रह्यो । कालिनले सम्हालेको टिमले रक्षात्मक फुटबल खेल्यो । आफ्नो रक्षापंक्तिलाई बलियो बनाएर काउन्टर आक्रमणमा अगाडि बढ्ने अर्थात् गोल खाएन भने हारिँदैन भन्ने खालको । यस्तो टिममा एक फरवार्डले मात्रै मौका पाउँछन् । तर, पहिलो खेलमै कुवेतविरुद्ध ७–० ले स्तब्ध भयो, जुन नतिजा कालिनले कल्पना गरेका थिएनन् । मैत्रीपूर्ण खेलमा गोलरहित बराबरी र एक गोलको हार बेहोरेको टिमविरुद्ध उनलाई त्यति ठूलो अन्तरको पराजय अहिलेसम्म पत्यार लागिरहेको छैन ।

अब्दुल्लाहले टिमलाई पूरै परिवर्तन गरिदिए । एक होइन, तीन फरवार्डलाई एकैपल्ट मैदानमा उतारे, ४–३–३ को आक्रामक शैलीमा । यो ठ्याक्कै बार्सिलोनाको संरचना हो । उनले नेपाली टिमलाई रक्षात्मक रणनीति र लामो पास खेल्ने परम्परा परिवर्तन गर्ने प्रयास गरेका छन् । गोल गरेन भने खेल जितिँदैन भन्ने उनलाई थाह छ र त्यसैगरी खेलाए । यस्तो परिवर्तन सकारात्मक देखिएको छ । उनले भविष्यकै लागि भनेर युवा खेलाडीलाई टिममा अवसर दिए । पाँच खेलाडीलाई डेब्यू गराए ।

उनले सेप्टेम्बरमा हुने साफ च्याम्पियनसिपलाई मुख्य लक्ष्य बनाएका छन्, जहाँ उनी नेपाललाई पहिलोपल्ट फाइनल खेलाउन चाहन्छन् । त्यसैले पनि टिममा आमूल परिवर्तन गरेको हुनसक्छ । उनले कालिनले छाडेको टिमका ११ खेलाडी लिए । चैतमा थ्री नेसन्स कप जितेका बालगोपाल महर्जनको टिमका १० खेलाडीमात्रै अब्दुल्लाहको टिममा अटाए । ६ खेलाडीले पहिलोपल्ट राष्ट्रिय टिममा स्थान पाए । मनीष डाँगी र गौतम श्रेष्ठलाई इराकविरुद्ध ६–२ ले हारेको मैत्रीपूर्ण खेलमा डेब्यू गराए । सुरजज्यू ठकुरी, आयुष घलान र कमल थापाले ‘पहिलो क्याप’ अस्ट्रेलियाविरुद्ध पाए । विशेषगरी मनीष र गौतमले राम्रो प्रभाव देखाए ।

छनोटमा नेपालले आठमध्ये दुई खेलमात्रै जित्यो । दुवै जित ताइपेईविरुद्ध । समान २–० को जित । कुवेतविरुद्ध ७–० को हार थिम्पूमा १–० मा झर्‍यो । जोर्डनविरुद्ध दुवै खेल ३–० ले हार्‍यो । एसियन कप २०१५ च्याम्पियन अस्ट्रेलियाविरुद्ध ५–० को हार कुवेत सिटीमा ३–० मा छोट्यायो । अस्ट्रेलियाविरुद्ध दुवै खेलमा नेपालले गोलको अवसर सिर्जना गर्न सकेन । अरू खेलमा अवसर पाएको थियो तर ताइपेईविरुद्धमात्रै गोल गर्‍यो । छनोटमा ४ गोलमात्रै गरेको नेपालले २२ गोल बेहोर्‍यो । तीन गोल अञ्जन विष्टले गरे भने नवयुग श्रेष्ठले एक गोल ।

अब्दुल्लाहले सम्हालको टिमले सुधारिएको प्रदर्शन गर्‍यो । ठूला टिमविरुद्ध डराएर खेल्ने नेपाली टिम छोटो–छोटो पास खेल्न आतुर देखिएको छ । ठूला टिमविरुद्ध पनि आक्रमण गर्न सक्छौं भन्ने विश्वास बढेको पाइएको छ । अस्ट्रेलिया र जोर्डनविरुद्ध बहादूरीपूर्वक खेल्यो । अखिल नेपाल फुटबल संघ (एन्फा) ले दिएको लक्ष्य (चौथो स्थान) अब्दुल्लाहको टिमले हासिल गर्‍यो । यसलाई उनी सुरुआतमात्रै मान्छन् । हो पनि । उनलाई खेलाडी चिन्ने अवसर थियो यो छनोट । यसको अनुभव साफ च्याम्पियनसिप र एसियन कप छनोटको प्लेअफमा उपयोगी हुनेछ ।

प्रकाशित : जेष्ठ ३०, २०७८ ०८:५७
पूरा पढ्नुहोस्
प्रतिक्रिया
पठाउनुहोस्
×