अवैध स्वास्थ्य संस्था बन्द- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

अवैध स्वास्थ्य संस्था बन्द

‘मेडिकलले अनावश्यक औषधि चढाएर बिरामीलाई धेरै दिनसम्म झुलाएर राख्ने गरेको भेटियो’
हरि गौतम

रुकुम पश्चिम — प्रक्रिया पूरा नगरी सञ्चालन गरिएका तीन निजी स्वास्थ्य संस्था बन्द गरिएको छ । सानीभेरी गाउँपालिकामा सञ्चालित एक निजी अस्पतालसहित बाँफीकोट गाउँपालिकामा सञ्चालित एक/एकवटा क्लिनिक र मेडिकल बन्द गरिएको हो । 

रुकुम पश्चिमको त्रिवेणी गाउँपालिकास्थित एक मेडिकलमा अनुगमन गरिँदै। तस्बिर : हरि/कान्तिपुर

गाउँमा अवैध रूपमा सञ्चालित स्वास्थ्य संस्थाका कारण नागरिकको स्वास्थ्य जोखिममा परेको गुनासो बढेपछि सहायक प्रमुख जिल्ला अधिकारी प्रमेश शिवा नेतृत्वको टोलीले अनुगमन गरेको थियो । जिल्ला अस्पतालका डा.राजकुमार भुजेलसहित स्थानीय जनप्रतिनिधि, कर्मचारी तथा स्वास्थ्यकर्मी सम्मिलित टोलीले अनुगमनपछि स्वास्थ्य संस्था बन्द गराएको हो ।

सानीभेरी गाउँपालिका–९ सिम्लीस्थित न्यु बुद्ध सोलाबाङ अस्पताल अवैध रूपमा सञ्चालनमा रहेको फेला परेको डा. भुजेलले बताए । उनका अनुसार अस्पतालमा डाक्टरबिना बिरामीहरूको चेकजाँच तथा उपचार भइरहेको पाइएको थियो । अस्पतालमा ल्याब सेवासमेत अवैधरूपमा सञ्चालन भइरहेको भेटिएको उनले जानकारी दिए । ‘लापरबाहीपूर्ण रूपमा अस्पताल सञ्चालन भइरहेको भेटियो,’ उनले भने, ‘अस्पताल सञ्चालनका लागि अनुमतिसमेत लिइएको रहेनछ, अन्य प्रक्रिया पनि पूरा भएको पाइएन ।’ रेमन विकले सञ्चालन गरिरहेको अस्पताल केही समय मुसीकोट नगरपालिका–४ सोलावाङमा सञ्चालन भएको थियो ।

तर त्यहाँ नचलेपछि उक्त अस्पताल अनुमतिबिना र आवश्यक प्रक्रिया नपुर्‍याई सिम्लीबाट सञ्चालन भइरहेको अनुगमन टोलीले पत्ता लगाएको छ । त्यस्तै बाँफीकोट गाउँपालिका–४ कोटमा नन्दराम केसीले सञ्चालन गरेको रेमन हेल्थ क्लिनिक पनि कुनै निकायमा दर्ता नभएको पाइएपछि बन्द गराइएको छ । औषधि ऐन–२०३५ को दफा ४ को उपदफा १० अनुसार औषधि पसल दर्तासम्बन्धी न्यूनतम मापदण्ड पूरा नगरेको पाइएको डा. भुजेलले बताए ।

बाँफीकोट गाउँपालिका–६ मा सञ्चालित नवीन मेडिकल हलले एउटै सुई धेरै बिरामीलाई प्रयोग गरेको पाइएको छ । एक जना बिरामीलाई प्रयोग गरिसकेको सुई निर्मलीकरण नगरी अर्को बिरामीलाई प्रयोग गर्नु गम्भीर लापरबाही भएको उनको भनाइ छ । ‘मेडिकलले अनावश्यक औषधि चढाएर बिरामीलाई धेरै दिनसम्म झुलाएर राख्ने गरेको भेटियो,’ उनले भने, ‘अवस्था गम्भीर बनेपछि मात्र अन्य स्वास्थ्य संस्थामा पठाउने गरेको पाइएको छ ।’

सञ्चालनका लागि पूरा गर्नुपर्ने मापदण्ड पूरा गरेमा बन्द भएका स्वास्थ्य संस्था सुचारु हुनेछन् । सम्पूर्ण प्रक्रिया पूरा गरेकोबारे सम्बन्धित स्थानीय तहले सिफारिस गरेपछि स्वास्थ्य संस्था खुला हुने सहायक प्रमुख जिल्ला अधिकारी शिवाले बताए । उनका अनुसार बन्द भएका स्वास्थ्य संस्थाबारे थप अनुसन्धान भइरहेको छ ।

प्रकाशित : जेष्ठ २६, २०७८ ०८:५१
प्रतिक्रिया
पठाउनुहोस्

निषेधाज्ञामा विकासका काम

वर्षा र आर्थिक वर्षको अन्तिम महिना सुरु हुन लागेकाले पनि कामलाई तीव्रता
विप्लव महर्जन

सल्यान — कोरोना संक्रमण फैलिएको भन्दै स्थानीय प्रशासनले झन्डै एक महिनादेखि निषेधाज्ञा जारी गरे पनि जिल्लामा विकास निर्माणका काम रोकिएका छैनन् । विभिन्न सरकारी निकायले स्वास्थ्य सुरक्षा मापदण्डको पालना गरी विकास निर्माणका कामलाई तीव्रता दिएका हुन् । 

आर्थिक वर्ष सकिन लागेको भन्दै बजेट फ्रिज हुन नदिन स्थानीय तह र विकासे कार्यालयमार्फत विकासका काम भइरहेका हुन् । बन्गाडकुपिण्डे नगरपालिकामा निषेधाज्ञायता करिब ४० वटा विकास योजना सम्पन्न भएका छन् ।

अहिले पनि करिब ५० योजनामा काम चलिरहेको नगरप्रमुख गोविन्दकुमार पुनले बताए । ‘निषेधाज्ञाकै कारण निर्माणका काम रोक्दा ठूलो रकम फ्रिज हुने देखियो,’ उनले भने, ‘संघीय र प्रदेश सरकारका ठूला योजनालाई पनि निरन्तरता दिएका छौं, गाउँगाउँमा उपभोक्ता समितिमार्फत काम भइरहेको छ ।’ उनले उपभोक्ता र ठेकेदारमार्फत अहिले सिँचाइ, खानेपानी, विद्यालय भवन, सडकलगायत योजनामा काम भइरहेको बताए । नगरपालिकाले निषेधाज्ञाअघि करिब ४० प्रतिशत योजना मात्र सम्पन्न गरेको थियो ।

कोरोना महामारीका कारण भारत तथा अन्य मुलुकबाट फर्किएका नागरिकलाई प्राथमिकता दिई विकास योजना सञ्चालन गरिरहेको शारदा नगरपालिकाले जनाएको छ । ‘कोरोनाबाट बच्न विभिन्न उपाय अवलम्बन गरी विभिन्न निर्माणका काम अघि बढाएका छौं,’ नगरप्रमुख सुरेश अधिकारीले भने, ‘वर्षा र आर्थिक वर्षको अन्तिम महिना सुरु हुन लागेकाले पनि कामलाई तीव्रता दिइएको हो ।’ उनले चालु आर्थिक वर्षमा विनियोजन गरिएका ९० प्रतिशत योजनाको निर्माण सक्ने गरी उपभोक्ता समिति र ठेकेदारमार्फत काम भइरहेको बताए ।

चालु आवमा नगरपालिकाले करिब ३ सय योजना छनोट गरेकोमा ६० प्रतिशत योजना वैशाख पहिलो साताअघि नै सकिएका थिए । गाउँमा निषेधाज्ञाको असर नहुँदा निर्माणका काम गर्न सजिलो भएको कालीमाटी गाउँपालिका अध्यक्ष दानबहादुर खत्रीले बताए । उनका अनुसार गाउँमा अहिले सञ्चालन गरिएका योजनामार्फत दैनिक एक हजार जनाले रोजगारी पाइरहेका छन् । ‘गाउँको विकास भएको छ, स्थानीयले नियमित रोजगारी पनि पाएका छन्,’ उनले भने, ‘विकास निर्माणले भारतबाट फर्किएका नागरिकको जीविकोपार्जनमा सहयोग गरेको छ ।’ उनका अनुसार पालिकाले छनोट गरेका करिब ३ सय ५० योजनामध्ये ७० प्रतिशत सम्पन्न भएका छन् भने २० प्रतिशतको काम जारी छ ।

स्थानीय तहसँगै विकासे कार्यालयले पनि झोलुंगे पुल, पक्की पुल, सडकलगायत पूर्वाधार निर्माणका काम जारी राखेका छन् । दक्ष मजदुरी नपाउँदा केही समस्या भए पनि स्थानीय जनशक्तिको प्रयोग गरी निर्माणका काम गरिरहेको पूर्वाधार विकास कार्यालयका प्रमुख विनोदकुमार पुनले बताए । ‘गत वर्ष महामारीको निहुँ बनाएर काम नगरेका ठेकेदारले यो वर्ष उन्मुक्ति पाएका छैनन्,’ उनले भने, ‘ठेकेदारलाई समयमै काम गर्न ताकेता गरेका छौं, लकडाउनमा काम नगरेका ठेकेदारको म्याद थपिने छैन ।’

खानेपानी कार्यालयले पनि लकडाउनकै समयमा ७० वटा योजना निर्माणको काम भइरहेको जनाएको छ । प्राविधिक समस्याका कारण १० योजनाको काम रोकिए पनि अन्य योजनाको काम भइरहेको कार्यालय प्रमुख पदमराज देवकोटाले बताए । उनका अनुसार असार मसान्तभित्र निर्माणाधीन सबै योजना सक्ने कार्यालयको लक्ष्य छ । ‘लकडाउनका कारण निर्माण सामग्रीको ढुवानी र दक्ष कामदार पाउन भने मुस्किल भयो,’ उनले भने, ‘तर अधिकांश योजना सक्ने गरी कामलाई तीव्र बनाएका छौं ।’

प्रकाशित : जेष्ठ २६, २०७८ ०८:४३
पूरा पढ्नुहोस्
प्रतिक्रिया
पठाउनुहोस्
×