जडान भएन अक्सिजन प्लान्ट

जेठ १५ गतेभित्र अक्सिजन प्लान्ट जडान गर्ने गरी काठमाडौंको नेपटेक मेडिकल सप्लायर्सले ठेक्का सम्झौता गरेको थियो । कम्पनीले दुई महिनाअघि अक्सिजन प्लान्ट जडान गर्न ४० लाख रुपैयाँमा ठेक्का सम्झौता गरेको थियो । अक्सिजन प्लान्ट स्थापनाका लागि आर्थिक वर्षको सुरुमै बजेट आए पनि टेन्डर प्रक्रियामा जान ढिलाइ भएको हो ।

ठेक्का सम्झौताअनुरूपको निर्धारित समय बितिसक्दा पनि नेपटेकले अस्पतालमा अक्सिजन प्लान्ट जडानको कुनै प्रक्रिया पनि अघि नबढाएको जिल्ला स्वास्थ्य सेवा कार्यालयले जनाएको छ । अक्सिजन प्लान्ट जडान नहुँदा अक्सिजनका सिलिन्डर भर्न नेपालगन्ज पठाउनुपर्ने बाध्यता भएको स्वास्थ्य सेवा व्यवस्थापक टीकाराम जैसीले बताए । ‘ठेक्का सम्झौताबमोजिम तोकेको समयभित्र काम नगर्ने ठेकेदार कम्पनीलाई कालोसूचीमा राखेर धरौटी जफत गरी ठेक्का सम्झौता तोड्ने प्रक्रिया सुरु गरेका छौं,’ उनले भने, ‘हामीले पटकपटक ताकेता गरे पनि ठेकेदार कम्पनीले बेवास्ता गरिरहेको छ ।’ नेपटेकले कोरोना महामारी र लकडाउनका कारण प्लान्ट जडान गर्न नसकिएको भन्दै १५ दिनको थप समय माग गरेको छ । तर कार्यालयले ५ दिनको समय मात्र थप गरेको स्वास्थ्य सेवा व्यवस्थापक जैसीले बताए । उनका अनुसार निर्धारित समयभित्र काम सम्पन्न हुन नसके बढीमा ५ दिनसम्म समय थप गर्न सकिने व्यवस्था छ । थप गरिएको समय पनि गुज्रिएपछि ठेकेदारले थप समय माग गरेको उनले बताए ।

नेपटेकका प्रोप्राइटर नरबहादुर लिम्बूले जेठ मसान्तभित्र अक्सिजन प्लान्ट जडान गरिने बताए । थपिएको समय पनि सकिएकाले ठेकेदारलाई कस्तो कारबाही गर्ने भन्नेबारे प्रमुख जिल्ला अधिकारीलगायतका सरोकारवालासँग परामर्श भइरहेको स्वास्थ्य सेवा कार्यालयले जनाएको छ । समयमा अक्सिजन प्लान्ट जडान नगर्दा कोरोना संक्रमितलाई अक्सिजन दिन समस्या भएको छ । अक्सिजन प्लान्ट जडान नहुँदा कोराना संक्रमितको उपचारमा समस्या भएको जिल्ला अस्पतालका मेडिकल अधिकृत डा. अमिन शाहले बताए । ‘प्लान्ट जडान भए संक्रमितको उपचारमा सहयोग पुग्थ्यो,’ उनले भने, ‘अहिले जटिल समस्या भएका बिरामीलाई नेपालगन्ज र सुर्खेत रेफर गर्नुको विकल्प छैन ।’

छेडागाडमा संक्रमित बढे

छेडागाड नगरपालिकामा कोरोना संक्रमितको संख्या बढेको छ । नगरपालिकाले एक साताको समयमा ४ सय ९८ जनाको परीक्षण गर्दा २ सय जनामा कोरोना संक्रमण पुष्टि भएको थियो । गाउँगाउँमा ज्वरो आउने, रुघाखोकी लाग्ने, टाउको दुख्नेलगायत लक्षणका बिरामी बढेपछि परीक्षण गरिएको नगरपालिकाले जनाएको छ । शंकास्पद व्यक्तिलाई परीक्षण गर्दा झन्डै ५० प्रतिशतमा कोराना पोजिटिभ पाइएको नगर स्वास्थ्य शाखाका अहेव रामबहादुर थापाले बताए । उनका अनुसार २ सय १० जनाको स्वाब संकलन गरी पीसीआर परीक्षण गर्दा १ सय २६ जनामा कोरोना पुष्टि भएको छ । उनका अनुसार ६६ जनाको रिपोर्ट आउन बाँकी छ । ‘यो डरलाग्दो अवस्था हो,’ उनले भने, ‘अहिले त घरैपिच्छे बिरामी बढेका छन् ।’ उनले २ सय ८८ जनालाई एन्टिजेन परीक्षण गरेकामा ६४ जनामा कोरोना देखिएको बताए ।

संक्रमितको मृत्यु

सल्यान– चार दिनसम्म मृत्युदर शून्य भएको सल्यानमा शुक्रबार एक कोरोना संक्रमितको मृत्यु भएको छ । त्रिवेणी गाउँपालिका–४ का ७७ वर्षीय कोरोना संक्रमितको जिल्ला अस्पतालमा उपचारका क्रममा मृत्यु भएको हो ।

उनको एक साताअघि कोरोना संक्रमण पुष्टि भएको थियो । श्वासप्रश्वास प्रक्रियामा गम्भीर समस्या देखिएपछि उनको मृत्यु भएको जिल्ला स्वास्थ्य सेवा कार्यालयले जनाएको छ । कार्यालयका अनुसार योसँगै जिल्लामा कोरोनाबाट मृत्यु हुनेको संख्या ५७ पुगेको छ । जिल्लाभित्र ४७ र बाहिर १० जनाको कोरोना संक्रमणका कारण मृत्यु भएको कार्यालयका कोरोना नियन्त्रण फोकल पर्सन रिखाराम पुनले बताए ।