निषेधाज्ञामा रोकिएन विकास- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

निषेधाज्ञामा रोकिएन विकास

ज्योति कटुवाल

दैलेख — निषेधाज्ञा लागू भए पनि जिल्लामा विकास निर्माणका काम जारी छन् । जिल्ला प्रशासन कार्यालयले निषेधाज्ञाको बहानामा कुनै पनि विकास निर्माणका काम नरोक्ने ठेकेदार कम्पनीलाई निर्देशन दिएपछि कामले निरन्तरता पाएका हुन् । 

जिल्ला प्रशासन कार्यालय दैलेखनजिकैको सडकमा कालोपत्रे गरिँदै । तस्बिर : ज्योति/कान्तिपुर

मध्यपहाडी (पुष्पलाल) लोकमार्गमा निशेषाधाको समयमा झन्डै २० प्रतिशत काम सकिएको छ । अहिले विभिन्न ठाउँमा सडक स्तरोन्नतिका कामहरू भइरहेको आयोजना प्रमुख अर्जुन बमले बताए । लोकमार्गका विभिन्न क्षेत्रमा झन्डै १ हजार २ सय स्थानीयले रोजगारी पाएका छन् । ‘लकडाउनकै कारण गत वर्ष काममा ढिलाइ भएपछि यो वर्ष तीव्रता दिएका हौं,’ उनले भने, ‘अहिले त अरू बेलाभन्दा बढी स्थानीयले रोजगारी पाइरहेका छन् ।’ उनका अनुसार लोकमार्गअन्तर्गत भगवतीमाई गाउँपालिकाको मनघरदेखि लोहोरेखोलासम्म २१ किमि खण्डमा कालोपत्रे सम्पन्न भइसकेको छ । दुल्लु लगरपालिकाको चकर्तादेखि रामाघाटसम्मको २५ किमि खण्डमा कालोपत्रे गर्ने तयारी भइरहेको उनले बताए । यस्तै लोहोरेदेखि सदरमुकाम दैलेख बजार खण्डको १० किमि सडकमा पनि स्तरोन्नतिको काम भइरहेको छ ।

आयोजना प्रमुख बमका अनुसार निर्माण क्षेत्रमा कामदारलाई माक्स तथा सेनिटाइजरको अनिवार्य प्रयोग गर्न र सामाजिक दूरी कायम गर्न भनिएको छ । ‘कोरोना संक्रमण फैलन नदिन आवश्यक सुरक्षा मापदण्ड अपनाइएको छ,’ उनले भने, ‘भारतबाट कोरोनाका कारण फर्किएका स्थानीयले पनि अहिले नियमित रोजगारी पाएका छन् ।’आयोजनाको कार्यालयले निषेधाज्ञाकै समयमा मुआब्जा विवादको समस्या हल गरिएको जनाएको छ ।

आयोजनाको कार्यालय दैलेखमै भएकाले प्राविधिकले पनि कार्यक्षेत्रमै बसेर काम गरिरहेको कार्यालयका सूचना अधिकारी मनीष सिंहले बताए । उनका अनुसार लोकमार्गमा यो वर्ष १० निर्माण कम्पनीमार्फत ४ अर्ब रुपैयाँको बजेटबाट सडक निर्माणको काम भइरहेको छ । एउटा कम्पनीले कम्तीमा पनि १ सय जना कामदार रोजगारी दिएको उनले बताए । ‘निषेधाज्ञाको बेला स्थानीयस्तरमै रोजगारी दिने उद्देश्यले बाहिरबाट आउने कामदारलाई रोक लगाएका छौं,’ उनले भने, ‘सबै खण्डमा सडक निर्माणका कामहरू एक दिन पनि रोकिएको छैन ।’

जिल्लाका स्थानीय तह, पूर्वाधार विकास कार्यालय, सडक डिभिजन कार्यालयलगायतका कार्यालयले पनि विकास निर्माणको कामलाई जारी राखेको जनाएका छन् । तीनवटै सरकारले विनियोजन गरेको विकास बजेट फ्रिज हुन नदिन निषेधाज्ञा पनि काम गर्न निर्देशन दिइएको प्रमुख जिल्ला अधिकारी हरि प्याकुरेलले बताए । ‘कतिपय स्थानीयवासी कोरोनाकै कारण रोजगारी गुमाएर फर्किएका छन्, यो बेला विकास योजना सञ्चालन हुँदा उनीहरूलाई पनि रोजगारी मिलेको छ,’ उनले भने, ‘यो लकडाउनमा गाउँको विकास पनि रोकिएको छैन ।’

लकडाउनको बहाना बनाई काम नगर्ने ठेकेदारलाई कारबाही गरिने उनले बताए । उनका अनुसार यो अवधिमा काम नगरेका ठेकेदारलाई म्याद थपबाट वञ्चित गराउने गरी विभिन्न निकायसँग पहल भइरहेको छ ।

प्रकाशित : जेष्ठ १३, २०७८ १२:२९
प्रतिक्रिया
पठाउनुहोस्

अस्पताललाई १९ लाखका सामग्री

कान्तिपुर संवाददाता

रुकुम पश्चिम — व्यक्तिगत रूपमा स्वस्फूर्त संकलित रकमले जिल्ला अस्पताललाई विभिन्न उपकरण र स्वास्थ्य सामग्री प्रदान गरिएको छ । कोरोना रोकथाम, नियन्त्रण तथा उपचारमा सहयोग पुर्‍याउन भन्दै रुकुम पश्चिमका स्थायी बासिन्दाले सहयोग अभियान थालेका थिए ।

रुकुम पश्चिमको जिल्ला अस्पतालमा हस्तान्तरण गरिएको २० केभीए क्षमताको जेनेरेटर काठमाडौंबाट ल्याइएको गाडीबाट अनलोड गरिँदै ।

विभिन्न मुलुकमा रहेका व्यक्ति, कर्मचारी, स्वास्थ्यकर्मी, व्यवसायीलयातयले ३ दिनको अवधिमा १८ लाख ९९ हजार रुपैयाँ संकलन गरेका हुन् । उक्त रुपैयाँको विभिन्न उपकरण खरिद गरी जिल्ला अस्पताललाई हस्तान्तरण गरिएको छ । अभियानअनुसार २ सय ३९ जनाले रकम जम्मा गरेको अभियन्ता जनक खड्काले बताए । ‘कोरोना महामारीमा थोरै भए पनि सहयोग पुगोस् भनेर स्वस्फूर्त सहयोग गर्न सामाजिक सञ्जालमार्फत आह्वान गरिएको हो,’ उनले भने, ‘संकलन भएको रकमबाट खरिद गरिएको सामग्री अस्पताललाई हस्तान्तरण गरिएको छ ।’

अभियानले १८ लाख ४८ हजार रुपैयाँमा स्वास्थ्य सामग्री खरिद गरेको हो भने अन्य रकम ढुवानी र अक्सिजन रिफिलमा खर्च भएको छ । अभियानले अक्सिजन सिलिन्डर, जेनेरेटर, अक्सिमिटर, एन्टिजेन किटलगायतका १० प्रकारका स्वास्थ्य सामग्री अस्पताललाई प्रदान गरेको छ । ४० लिटरका १० वटा हाइफ्लो अक्सिजन सिलिन्डर, ३ सय थान एन्टिजेन किट र अस्पतालमा विद्युत्को अभाव हुन नदिनका लागि २० किलोवाटको जेनेरेटर खरिद गरिएको खड्काले बताए ।

उनका अनुसार बिरामीको रगतमा अक्सिजन लेबल, ब्लड प्रेसर, ज्वरोलगायत अवस्था जाँच गर्न ५ थान प्यारामिटर र ७ थान पेसेन्ट मनिटर पनि खरिद गरिएको छ । आइसोलेसन वार्डमा रहेका बिरामीको अक्सिजन लेबल जाँच्न प्रयोग हुने ठूलो वायर र मोनिटरसहितका ३ वटा ह्यान्ड हेल्ड पल्स अक्सिमिटर पनि अस्पताललाई उपलब्ध गराइएको खड्काले बताए ।

प्रकाशित : जेष्ठ १३, २०७८ १२:२७
पूरा पढ्नुहोस्
प्रतिक्रिया
पठाउनुहोस्
×