२२ वर्षपछि बन्यो टेलिफोन टावर- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

२२ वर्षपछि बन्यो टेलिफोन टावर

हाल ‘टु जी’ सेवा सञ्चालन गरिएकामा एक साताभित्रै ‘फोर जी’
विप्लव महर्जन

सल्यान — सशस्त्र द्वन्द्वको समयमा तत्कालीन माओवादीले क्षति पुर्‍याएको टेलिफोन टावर २३ वर्षपछि पुनर्निर्माण गरिएको छ । जिल्लामा पहिलोपल्ट टेलिफोन विस्तार गर्न २०५१ मा निर्माण गरिएको टावर २०५४ पुस ९ मा गराइएको बम विस्फोटबाट क्षतिग्रस्त भएको थियो । घटनामा दुई जना प्रहरीले ज्यानसमेत गुमाएका थिए ।

२३ वर्षपछि पुनर्निर्माण गरिएको सल्यानको छत्रेश्वरी गाउँपालिका–२ साउनेपानीस्थित टेलिफोन रिपिटर टावर । तस्बिर : विप्लव/कान्तिपुर

छत्रेश्वरी गाउँपालिका–२ साउनेपानीमा रहेको टेलिफोन टावर पुनर्निर्माणपछि जिल्लाको टेलिफोन सेवा प्रभावकारी हुने अपेक्षा गरिएको छ । टावर सोमबारदेखि सञ्चालनमा आएको नेपाल टेलिकम, सुर्खेतका प्राविधिक सहायक अधिकृत कुम्भबहादुर शाहीले बताए । उनका अनुसार टावर बनेपछि सल्यानको झिम्पे, दमाचौर, लेखपोखराका साथै रोल्पा र रुकुम पश्चिमका केही भागमा समेत सेवा पुगेको छ । अहिले ‘टु जी’ सेवा सञ्चालन गरिएको टावरमा एक साताभित्रै ‘फोर जी’ सेवा पनि सुरु हुनेछ ।

झन्डै दुई करोड रुपैयाँको लागतमा टावर पुनर्निर्माण गरिएको हो । टावर निर्माणका लागि तीन वर्षअघि हुवाई कम्पनीले जिम्मा लिएको थियो । टावर बनेपछि स्थानीयले वर्षौंदेखिको सञ्चार सेवामा रहेको समस्याबाट मुक्ति पाएको छत्रेश्वरी गाउँपालिका–२ का वडाध्यक्ष प्रेम खड्काले बताए । ‘वडाका धेरै बस्ती खोंचमा भएकाले मोबाइलको टावर नटिप्ने समस्या थियो,’ उनले भने, ‘अब स्थानीयले फोन गर्नकै लागि डाँडामा जानुपर्ने बाध्यताबाट मुक्ति पाए ।’

स्थानीय हीरालाल ओलीले टावर पुनर्निर्माणपछि घरबाटै फोन गर्ने सुविधा मिलेको बताए । ‘टेलिफोन सेवा नहुँदा सानो कामका लागि पनि ठूलो सास्ती भोग्नुपर्ने बाध्यता थियो,’ उनले भने, ‘टेलिफोन सुविधासँगै गाउँको जनजीवन सहज बनेको छ ।’ उनका अनुसार यसअघि आफन्तसँग कुरा गर्न आधा घण्टा उकालो चढेर डाँडामा गई फोन गर्नुपर्ने बाध्यता थियो । संघीय र प्रदेश सरकारलाई पटकपटक ताकेता गरेपछि टावर पुनर्निर्माण भएको छत्रेश्वरी गाउँपालिका अध्यक्ष सन्तोष केसीले बताए । ‘टावर बनेपछि गाउँपालिकाका सबै टोलमा सञ्चार सुविधा पुगेको छ,’ उनले भने, ‘अन्य विकासका पूर्वाधार पनि सबै वडामा पुर्‍याउने हाम्रो योजना हो ।’ उनका अनुसार टावर नियमित सञ्चालनका लागि गाउँपालिकाले ३० लाख रुपैयाँ खर्च गरी साउनेपानीमा विद्युत् सेवा विस्तार गरेको छ ।

प्रकाशित : वैशाख ७, २०७८ १२:०४
प्रतिक्रिया
पठाउनुहोस्

डढेलो बस्तीमा फैलँदा पाँच घर जले

विप्लव महर्जन

सल्यान — वनमा लागेको डढेलो बस्तीमा पस्दा कुमाख गाउँपालिका-३ राम्रीमा मंगलबार बिहान पाँच घरगोठ जलेर नष्ट भएको छ । स्थानीय रातपहरा सामुदायिक वनमा लागेको डढेलो बस्तीमा पस्दा नन्दराम ओलीको घरगोठ, क्षेत्रबहादुर ओलीको घरगोठ र होतीराम ओलीको गोठ जलेर नष्ट भएको हो ।

वनमा लागेको डढेलो पस्दा कुमाख गाउँपालिका ३ राम्रीमा जलेको घर । तस्बिर: विप्लव महर्जन/कान्तिपुर

घरगोठ जल्दा घरमा भएका खाद्यान्न, लत्ताकपडा,नगद, गहनालगायत सबै सामान जलेर नष्ट भएको जिल्ला प्रहरी कार्यालय सल्यानले जनाएको छ । सल्यान प्रहरीका सूचना अधिकृत अर्जुन पौडेलका अनुसार पाँच घरगोठ जलेर नष्ट हुँदा २० लाख बराबरको क्षति भएको छ । घरगोठ जलेर नष्ट भएका नन्दराम र क्षेत्रबहादुर ओलीको परिवार अहिले छिमेकीको घरमा आश्रय लिएर बसेका छन । स्थानीय र प्रहरीको सक्रियतामा सोमबारदेखि सामुदायिक वनमा लागेको डढेलो नियन्त्रण गर्न सफल भएको र बस्तीका अन्य घरहरु बचाउन सकिएको उनले बताए ।

अहिलेपनि जिल्लाका दर्जन वनमा डढेलो लागिरहेको र जनशक्तिको अभावमा निभाउन कठिनाई भएको सल्यान प्रहरीका डीएसपी गोविन्द थापाले बताए । शारदा नगरपालिका ११ खैराबाङ मन्दिर नजिकै वनमा लागेको डढेलो सोमबार निभाए पनि मंगलबार फेरि लागेको उनले जानकारी दिए ।

जिल्लाका विभिन्न सामुदायिक वनमा लागेको डढेलोका कारण एक महिनामा दर्जन घर जलेर नष्ट भएको र दर्जन बस्ती जोखिममा रहेको प्रहरीले जनाएको छ । वनमा डढेलो नलगाउनका लागि ठाउँठाउँमा सचेतनामूलक कार्यक्रम गर्दै आएपनि स्थानीयले अटेर गर्दै आएका र आफनो फाइदाका लागि भन्दै डढेलो लगाउँदा जिल्लाभरीका १० हजार हेक्टर भन्दा बढि क्षेत्रफलमा डढेलो लागेको डिभिजन वन कार्यालय सल्यानका प्रमुख रमेशकुमार गिरीले जानकारी दिए ।

प्रकाशित : वैशाख ७, २०७८ १२:०३
पूरा पढ्नुहोस्
प्रतिक्रिया
पठाउनुहोस्
×