१२ हजार घरमा बिजुली थपिँदै- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

१२ हजार घरमा बिजुली थपिँदै

ज्योति कटुवाल

दैलेख — जिल्लाका ७ स्थानीय तहमा सामुदायिक ग्रामीण विद्युतीकरण कार्यक्रमअन्तर्गत १ वर्षभित्र १२ हजार घरधुरीमा विद्युत् सेवा विस्तार हुन लागेको छ । संघीय सरकारको ९० प्रतिशत र स्थानीय तहको १० प्रतिशत लगानीमा विद्युतीकरण हुन थालेको हो । जसमा स्थानीय तहहरूले करिब ६० करोड रुपैयाँ लगानी गरेका छन् ।

गत वर्षबाट सञ्चालित कार्यक्रम कोरोना महामारीका कारण पछि धकेलिएको थियो । अहिले ७ वटै स्थानीय तहका सबै वडामा विद्युत् पुर्‍याउने गरी काम अघि बढेको छ । २०५४ जेठदेखि सदरमुकाममा राष्ट्रिय प्रसारण लाइन पुगे पनि अन्य स्थानीय तहमा विद्युत् सुविधा नहुँदा ग्रामीण विद्युतीकरणको अवधारण अघि सारिएको हो ।

भर्खरै डुंगेश्वर गाउँपालिका–२ मा राष्ट्रिय प्रसारण लाइन जोडिएको छ । राष्ट्रिय प्रसारण लाइन विस्तार भएपछि वडाका ७ सय घरमा बिजुली बलेको छ । सामुदायिक ग्रामीण विद्युतीकरण साझेदारी कार्यक्रमको २ करोड ५० लाख र निर्वाचन क्षेत्र नं १ अन्तर्गत स्थानीय पूर्वाधार विकास साझेदारी कार्यक्रमको ३० लाख रुपैयाँमा विद्युत् विस्तार गरिएको छ । ७ नम्बर वडामा विद्युत् जडान भएसँगै गाउँपालिकाका सबै वडामा बिजुली पुगेको अध्यक्ष नगेन्द्र मल्लले बताए । ‘कोरोना महामारीमा पनि कामलाई तीव्रता दिइयो,’ उनले भने, ‘उपभोक्ताले पनि सक्रियता देखाएपछि अरू पालिकाभन्दा यहाँ छिटो बत्ती बल्यो ।’

गुराँस गाउँपालिका अध्यक्ष खेमराज ओलीले एक वर्षभित्रै ४ हजार घरधुरीमा बिजुली पुर्‍याउने गरी निर्माणको कामलाई तीव्रता दिइएको बताए । उनका अनुसार आगामी दसैंसम्म विद्युतीकरणको काम सक्ने गाउँपालिकाको योजना छ । गुराँसले २० करोड, महाबुले १० करोड, डुगेश्वरले २ करोड ५० लाख, नौमुलेले ५ करोड ५० लाख, भगवतीमाईले ८ करोड र भैरवीले ९ करोड रुपैयाँ सामुदायिक विद्युतीकरणमा लगानी गर्न लागेका छन् । संघीय सरकारसँग दुई वर्षको अवधि रहने गरी कार्यक्रमको सम्झौता गरिए पनि कोरोना महामारीका कारण काममा केही ढिलाइ भएको छ ।

कार्यक्रम राष्ट्रिय प्रसारण लाइन नपुगेका ठाउँमा केन्द्रित गरिएको चामुन्डाविन्द्रासैनी नगरपालिकाका प्रमुख प्रशासकीय अधिकृत तिलक विकले बताए । दुल्लु नगरपालिकाले करिब ६० प्रतिशत काम सकिएको जनाएको छ । चैत महिनाभित्र ८० प्रतिशत काम सक्ने लक्ष्य लिइएको नगरप्रमुख घनश्याम भण्डारीले बताए ।

प्रकाशित : वैशाख ४, २०७८ १२:१०
प्रतिक्रिया
पठाउनुहोस्

चौरजहारी उपत्यकाका घरघरै खानेपानी

हरि गौतम

रुकुम पश्चिम — चौरजहारी उपत्यकावासी खानेपानीको समस्याबाट मुक्ति पाएका छन् । विजयश्वरी–चौरजहारी सुक्खा खानेपानी आयोजना निर्माण भएपछि उपत्यकाका १ हजार घरधुरीमा एकैपटक खानेपानी सुविधा पुगेको हो ।

एक घर, एक धाराको अवधारणासहित नगरका १ देखि ५ नम्बर वडाका सबै घरमा खानेपानी सुविधा पुर्‍याउने गरी आयोजना सुरु गरिएको थियो । लिट प्रविधिमार्फत भेरी नदीको पानी तानेर घरघरमा वितरण गरिएको नगर प्रमुख विशाल शर्माले बताए । उनका अनुसार २ सय मिटर भर्टिकल उचाइमा रहेको मैखारामा भेरीको पानी तानेर शुद्धीकरण गरी घरघरमा वितरण गरिएको हो । खानेपानी भण्डारण गर्न ३ लाख लिटर क्षमताको मुख्य र एक दर्जन सहायक ट्यांकी निर्माण गरिएको उनले जानकारी दिए ।

बाह्रै महिना खानेपानी समस्या भोग्नुपर्ने बाध्यताबाट मुक्ति पाइएको स्थानीय कमला शर्माले बताइन् । ‘हिउँदको समयमा पानी भर्न एक घण्टा हिँडेर भेरी नदीमै पुग्नुपर्ने बाध्यता थियो,’ उनले भनिन्, ‘त्यहाँ पनि पालो नपाइएपछि घन्टौं लाइन लाग्नुपर्ने अवस्थाबाट आजित थियौं ।’ उनका अनुसार वर्षायाममा चौरजहारीवासीलाई आकाशे पानीकै भर थियो ।

अहिले ४ र ५ नम्बर वडामा मिटर जडानको काम भइरहेको आयोजनाका अध्यक्ष तेजबहादुर बटालाले बताए । उनका अनुसार ३ वर्षअघि बनाइएको डीपीआरअनुसार १ हजार ६ सय ५ घरधुरीमा एक घर, एक धारा निर्माण गरिएको हो । ‘केही घरमा मिटर जडानको काम मात्र बाँकी छ,’ उनले भने, ‘अब उपत्यकावासीको फोहोर पानी खानुपर्ने र पानीका लागि घन्टौं लाइन लाग्नुपर्ने बाध्यता टरेको छ ।’

आयोजनाका लागि स्थानीयले झन्डै २१ लाख रुपैयाँ संकलन गरेका थिए । संघीय सरकारले झन्डै २० करोड रुपैयाँ लगानी गरेको आयोजनामा ३ वर्षअघि निर्माणको काम थालिएको थियो । नगर प्रमुख शर्माका अनुसार पुरानो आयोजनाको पानीले नपुगेपछि नगरपालिकाले आयोजना निर्माणका लागि पहल गरेको थियो । ‘आयोजना निर्माणपछि खानेपानीको आवश्यकता परिपूर्ति गरिएको छ,’ उनले भने, ‘अब नगरवासीले भेरी नदीको दूषित पानी पिउनुपर्ने बाध्यताबाट मुक्ति पाएका छन् ।’ उनका अनुसार यो आर्थिक वर्षभित्र नगरका ८० प्रतिशत घरमा धारा पुर्‍याउने नगरपालिकाको लक्ष्य छ ।

प्रकाशित : वैशाख ४, २०७८ १२:१०
पूरा पढ्नुहोस्
प्रतिक्रिया
पठाउनुहोस्
×