तुवाँलोका कारण हुम्लामा उडान प्रभावित- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

तुवाँलोका कारण हुम्लामा उडान प्रभावित

छपाल लामा

हुम्ला — बाक्लो तुवाँलोका कारण हुम्लामा हवाइ उडान प्रभावित भएको छ । तुवाँलोका कारण सिमकोट विमानस्थलबाट सुर्खेत तथा नेपालगञ्ज हवाइ उडान हुन नसकेको हो ।

बिहानदेखि नै नेपालगन्ज र सुर्खेत विमानस्थल क्षेत्रमा बाक्लो तुवाँलो लागेपछि हुम्लामा कुनै पनि उडान हुन नसकेको नागरिक उड्डयन प्राधिकरण सिमकोट शाखाका प्रबन्धक मोहन गिरीले जानकारी दिए । विमानस्थलको भिजिबिलिटी ५ किलोमिटर हुनुपर्ने भएपनि तुवाँलोका कारण ३ किलोमिटर मात्रै भिजिबिलिटी भएपछि उडान हुन नसकेको उनको भनाइ छ ।

अहिले नेपालगञ्जमा तुवाँलो हटेको भएपनि सिमकोटमा तीव्र हावाका कारण कुनै पनि उडान हुन नसकेको हो । हवाई सेवा प्रभावित भएपछि नेपालगञ्ज र सुर्खेतबाट हुम्ला पुग्ने यात्रु अलपत्र परेका छन् । दैनिक उपभोग्य सामग्री तथा अन्य विकास निर्माणका सामाग्री ढुवानी गर्न समस्या भएको व्यापारी छिरिङ लामाले बताए ।

सिमकोटबाट नेपालगञ्ज र सुर्खेत जाने यात्रुहरु पनि सिमकोटमै रोकिएका छन् । सिमकोट विमानस्थलका लागि तारा, सीता, समिट र नेपाल एयरलाइन्सका विमानले उडान भर्दै आएका छन् । हुम्लाका लागि विमानले दैनिक १० देखि १५ वटा उडान भर्ने गरेका छन् । दुई दिनदेखि हवाइ सेवा बन्द हुँदा तरकारी, मासुजन्य पसबाट पनि सेवा दिन समस्या भएको व्यापारी सरोज रावतले बताए ।

प्रकाशित : चैत्र २४, २०७७ १५:१९
प्रतिक्रिया
पठाउनुहोस्

हानिकारक कस्मेटिक उत्पादन गर्ने एक उद्योगी पक्राउ

गोदाम, बिक्री स्थलमा शिलबन्दी
कान्तिपुर संवाददाता

काठमाडौँ — सरकारले हानिकारक मेहेन्दी र कस्मेटिक उत्पादन गरी बिक्री गर्ने हबिब काला कोकिला हिनाज उद्योगमा शिलबन्दी गरेको छ । वाणिज्य आपूर्ति तथा उपभोक्ता संरक्षण विभाग र महानगरीय प्रहरी अपराध महाशाखाको संयुक्त अनुगमनमा उक्त उद्योगको उत्पादनस्थल, भण्डारण तथा बिक्री स्थलहरु शिलबन्दी गरिएको हो । त्यसक्रममा संलग्न एक व्यक्तिलाई प्रहरीले नियन्त्रणमा लिएको छ । 

विभागका प्रवक्ता शिवराज सेडाईका अनुसार गोप्य सूचनाका आाधरमा ती उद्योगमा अनुगमन गरिएको थियो । त्यसक्रममा विदेशीका ट्रेडमार्क/ब्राण्ड प्रयोगगरी जनस्वास्थ्यमा हानी नोक्सानी पुग्नेगरी अप्रमाणित रसायन मिश्रण गरी मेहेन्दी लगायतका तीन दर्जनभन्दा बढी प्रकारका कस्मेटिक बस्तुगोप्य भण्डारण, आयात र बिक्री गरेको फेला परेको थियो । उपभोक्ता संरक्षण ऐन २०७५ को दफा १६ विपरीत अनुचित व्यावसायिक क्रियाकलाप गरेको फेला परेपछि शिलबन्दी गरिएको विभागले जनाएको छ । ‘कलंकीस्थित मेहन्दी र मलतानी माटो प्याकिङ गर्ने उद्देश्यसहित घरेलु तथा साना उद्योग कार्यालयमा दर्ता भएको रहेछ । उद्योगमा बिना केमिस्ट आफ्नो हिसाबले सामान प्याकिङ गर्ने गरेको देखियो । हानीकारक हुने बस्तु उत्पादन गरेको देखिएकाले तत्काल शिलबन्दी गरेका छौं,’ प्रवक्ता शिवराज सेडाईले भने, ‘त्यसमा संलग्न उद्योगको गाडीसहित एक जनालाई पक्राउ गरेका छौं ।’ विभागका अनुसार उक्त उद्योगमा साइनबोर्ड पनि छैन । उद्देश्य प्याकिङ गर्ने भनिए पनि आयात पनि गरेको देखिन्छ । ‘मेड इन इन्डिया’ उल्लेख पर्याप्त र्‍यापर पनि फेला परेको छ । ‘धेरै शंकास्पद देखिएको छ,’ उनले भने, ‘थप अनुसन्धानको प्रक्रिया अगाडि बढाएका छौं ।’






प्रकाशित : चैत्र २४, २०७७ १५:१६
पूरा पढ्नुहोस्
प्रतिक्रिया
पठाउनुहोस्
×