सुर्खेतमा कान्तिपुरकर्मीसहित ९ पत्रकार सम्मानित- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

सुर्खेतमा कान्तिपुरकर्मीसहित ९ पत्रकार सम्मानित

कान्तिपुर संवाददाता

वीरेन्द्रनगर — नेपाल पत्रकार महासंघ, सुर्खेत शाखाले कान्तिपुरकर्मीसहित ९ जना पत्रकारलाई सम्मान गरेको छ । 

मंगलबार महासंघको २५औँ वार्षिक साधारणसभाको अवसरमा जिल्लामा क्रियाशील पत्रकारलाई विभिन्न विधामा सम्मान गरेको हो । महासंघले चार जनालाई १० हजार राशिको विकास तथा शान्ति पत्रकारिता पुरस्कार प्रदान गरेको छ । गत वर्षको पुरस्कार कान्तिपुरकर्मी चाँदनी कठायत र रेडियो नेपालमा कार्यरत डम्मर आचार्यलाई प्रदान गरिएको छ । त्यस्तै यस वर्षको पुरस्कारबाट देवीराम देवकोटा र रेडियो नेपालका भानुभक्त खड्का पुरस्कृत भएका छन् । यस्तै, १० हजार राशिकै खानेपानी तथा सरसफाइ पत्रकारिता पुरस्कार इमेज टेलिभिजनमा कार्यरत मानबहादुर ओली र सुनगाभा टेलिभिजनका संवाददाता खिम बुढाले पाएका छन् । यसैगरी अन्नपूर्ण पोष्टमा कार्यरत ललित वुढा र रेडियो भेरीका मधुवन बीसीलाई ५ हजार राशिको वर्ष पत्रकारिता पुरस्कार दिइएको छ ।

५ हजार राशिको नन्दु गेलाङ स्मृति पत्रकारिता पुरस्कारबाट युगआव्हान दैनिकमा कार्यरत गीता थापा पुरस्कृत भएकी छन् । साधारसभामा बोल्दै कर्णाली प्रदेशका आन्तरिक मामिला तथा कानुनमन्त्री नरेश भण्डारीले प्रदेशमा स्थापित एफएम, रेडियोलाई हरेक वर्ष एक लाख रुपैयाँ पुरस्कार प्रदान गर्ने घोषणा गरे । उनले केबल टेलिभिजन र सिनेमा हललाई पनि एक/एक लाख रुपैयाँ प्रदान गरिने बताए ।

छापा माध्यमलाई कति दिने भन्ने बारेमा छलफल भइरहेको मन्त्री भण्डारीको भनाइ छ । ‘पहिलो चरणमा हामी ५० प्रतिशत रकम दिनेछौं,’ उनले भने, ‘त्यसपछिको प्रगति हेरेर थप ५० प्रतिशत रकम प्रदान गरिनेछ, रकम जति भए पनि अब बाटो भने खुलेको छ ।’ मन्त्री भण्डारीले सञ्चार क्षेत्रसँग सम्बन्धित पूर्वाधार विकासमा सहकार्य गरेर अगाडि बढ्ने बताए ।


प्रकाशित : माघ २७, २०७७ १९:१९
प्रतिक्रिया
पठाउनुहोस्

चितवन च्याम्पियनसिप ट्रफी : मुन स्टोनको विजयी सुरुआत

रमेशकुमार पौडेल

चितवन — मंगलपुरको मुन स्टोन क्रिकेट क्लबले मंगलबारदेखि भरतपुरमा सुरु भएको १७ औं चितवन च्याम्पियनसिप ट्रफीमा विजयी सुरुआत गरेको छ । रामपुरमा निर्माणाधीन गौतम बुद्ध अन्तराष्ट्रिय क्रिकेट रंगशाला परिसरमा तयार भएको नमुना क्रिकेट मैदानमा भएको खेलमा मुन स्टोनले भरतपुर–३ को बेलचोक क्रिकेट क्लबलाई नौ विकटले पराजित गरेको हो ।

चितवन च्याम्पियनसिप क्रिकेट प्रतियोगितामा बुधबार ब्याटिङ गर्दै बेलचोक । तस्बिर : रमेशकुमार पौडेल/कान्तिपुर । 

५० ओभरको खेलमा पहिले ब्याटिङ रोजेको बेलचोकले ९७ रन मात्रै बनाएको थियो । मुन स्टोनले १४ ओभर चार बलमा नै झिनो लक्ष्य पार गरेको थियो । लक्ष्य पार गर्न मुन स्टोनले एक विकेटको मात्रै क्षति बेहोरेको थियो । राष्ट्रिय खेलाडी योगेन्द्रसिंह कार्कीको अलराउन्डर प्रदर्शन मुन स्टोनलाई विजय गराउने प्रमुख आधार बन्यो । कार्कीले ब्याटिङकका क्रममा नट आउट रहँदै ३१ बलमा ३२ रन बनाएका थिए ।

त्यसैगरी बेलचोक विरुद्धको बलिङमा पनि कार्कीले चार विकेट लिएका थिए । नौ ओभर चार बल बलिङ गर्दा कार्कीले विपक्षीलाई २३ रन मात्रै जोड्न दिए । उनले एक ओभर मेडेन राखे । कार्की ‘म्यान अफ दि म्याच’ भए । प्रतियोगिताका संयोजक उमेश पियाले उनलाई नगद १५ हजार रुपैयाँ प्रदान गरे । टस जितेपछि ब्याटिङ गरेको बेलचोकले जम्मा २९ ओभर चार बल खेल्दा सबै विकेट गुमाएर ९७ रन मात्रै बटुलेको थियो ।

बेलचोकका ब्याट्सम्यान गौतम केसीले २६ बलमा ३२ रन बनाएका थिए । त्यसैगरी रविन्द्रजंग शाहीले ३८ बल खेल्दा १३ रन मात्रै जोडेका थिए । अन्य ब्याट्सम्यानको प्रदर्शन राम्रो रहेन । यी दुई बाहेक कसैले पनि दोहोरो अंकको रन बनाउन सकेनन् । बेलचोक विरुद्धको बलिङमा कमल थापाले ६ ओभरमा दुई विकेट लिए । उनको बलिङमा बेलचोकका खेलाडीले १४ रन जोडेका थिए ।

जवाफी ब्याटिङमा मुन स्टोनबाट खेलेका राष्ट्रिय खेलाडी लोकेश बमले २० बलमा ४३ रन बनाएर आउट भएका थिए । अविजित रहेका आषिश ढुंगनाले ३७ बल खेल्दै १४ रन बनाएका थिए । रंगशाला बनाइ रहेको धुर्मुस सुन्तली फाउन्डेसनका अध्यक्ष सिताराम कट्टेलले ब्याटिङ र वाग्मती प्रदेश ट्राफिक प्रहरी कार्यालयका प्रमुख एसपी शान्तीराज कोइरालाले बलिङ गरेर प्रतियोगिता उद्घाटन गरेका थिए ।

चितवन क्रिकेट संघले प्रतियोगिता आयोजना गरेको हो । प्रतियोगिताका संयोजक उमेश पियाले दिएको जानकारी अनुसार प्रतियोगितामा चितवन क्रिकेट क्लब, भरतपुर क्रिकेट क्लब, मंगलपुरको मुन स्टोन क्रिकेट क्लब, टाँडीको इस्टर्न क्रिकेट एकेडेमी, बेलचोक क्रिकेट क्लब भरतपुर र गीतानगरको आधुनिक–११ सहभागी छन् । प्रतियोगितामा विजेताले २० हजार रुपैयाँ नगद र उपविजेताले १० हजार रुपैयाँ नगद पुरस्कार पाउने छन् ।

प्रतियोगिता फागुन ३ गतेसम्म चल्ने छ । प्रतियोगिताको मुख्य प्रायोजक नारायणगढको प्रेम सुपर मार्केट रहेको छ । प्रतियोगिताको बुधबारको खेल भरतपुर क्रिकेट क्लब र गीतानगरको आधुनिक–११ बीच हुनेछ ।

प्रकाशित : माघ २७, २०७७ १८:४७
पूरा पढ्नुहोस्
प्रतिक्रिया
पठाउनुहोस्
×