मुगुको सोरु गाउँपालिकामा धारामा बरफ जमेपछि खानेपानी समस्या - कर्णाली - कान्तिपुर समाचार
कान्तिपुर वेबसाईट
AdvertisementAdvertisement

मुगुको सोरु गाउँपालिकामा धारामा बरफ जमेपछि खानेपानी समस्या 

राजबहादुर शाही

मुगु — अत्यधिक चिसोका कारण खानेपानीका धाराहरुमा बरफ जमेपछि जिल्लाका विभिन्न बस्तीमा खानेपानी समस्या देखिएको छ । उच्च लेकाली बस्तीका धारामा बाक्लो हिउँ जमेको छ भने बेंसीका धाराहरु बरफ जमेपछि पानी सुकेका हुन् । 

सोरु गाउँपालिकाको सोरुकोट खानेपानी आयोजनाको पाइपमा बरफ जमेपछि झण्डै ३ सय घरधुरीमा खानेपानी समस्या चुलिएको स्थानीय स्थानीय जैविर रोकालले बताए । उनले खानेपानी आयोजनाको करिब ८ सय मिटर पाइपमा बरफ जमेपछि दुई सातायता धाराबाट पाउन आउन छोडेको बताए । उनका अनुसार रोकायाबाडा, चुलिसाडा, दलितबाडा, बन्जाहा र सोरुकोटमा खानेपानीको आपूर्ति गर्न समस्या भएको छ । ‘बरफ पगालेर खानेकुरा पकाउनुको विकल्प छैन,’ उनले भने, ‘आगोमा तताएको बरफ पनि एकै छिनमा जम्न थालेपछि खानेपानी समस्या चुलिएको हो ।’

धारामा बरफ जमेपछि सोरुकोटस्थित सोरु गाउँपालिकाको कार्यालय, इलाका प्रशासन कार्यालय, प्रहरी चौकी र विभिन्न सामुदायिक विद्यालयमा खानेपानी अभाव भएको छ । सदरमुकाम आसपासका अधिकांश गाउँमा पनि धारामा बरफ जमेको स्थानीय कमल शाहीले बताए । ‘धारा र खानेपानी मुहान सबैमा बरफ जमेको छ,’ उनले भने, ‘जमेको बरफ ल्याइ उमालेर पानीको जोहो गर्न बाध्य छौं ।’

गाउँपालिकाभरि वर्षेभरि खानेपानी सुविधा पुर्‍याउन बृहत् आयोजना सञ्चालन गर्न थालिएको गाउँपालिका अध्यक्ष लोकबहादुर शाहीले बताए । उनका अनुसार जसका लागि संघीय खानेपानी कार्यालय, जुम्लाबाट ९ करोड रुपैयाँको बजेटमा ठेक्का आव्हान भइसकेको छ । उनले आयोजनाको काम चालु आर्थिक वर्षबाटै सुरु हुने जानकारी दिए ।

प्रकाशित : पुस २६, २०७७ १६:४२
प्रतिक्रिया
पठाउनुहोस्

भक्तपुरमा दुई मोटरसाइकल आपसमा ठोक्किँदा १ जनाको मृत्यु, २ घाइते

कान्तिपुर संवाददाता

भक्तपुर — मध्यपुर थिमी–३ गठ्ठाघरमा दुई मोटरसाइकल आपसमा ठोक्किएर दुर्घटना हुँदा एक जनाको मृत्यु भएको छ । मृत्यु हुनेमा प्रदेश ३–०२–०४ प ७३२४ मोटरसाइकलका चालक उदयपुर लिमचुङबुङ गाउँपालिका–१ का २२ वर्षीय मनराज राई छन् । 

भक्तपुरबाट काठमाडौंतर्फ जाँदै गरेको प्रदेश ३-०२-०४ प ७३२४ नम्बर मोटरसाइकल र सोही दिशातर्फ जाँदै गरेको बा ५३ प ९८६४ नम्बरको मोटरसाइकल शनिबार साँझ आपसमा ठोक्किएको थियो । दुर्घटनामा मोटरसाइकल चालक मनराज राई र २४ वर्षीया मनिकला राई सख्त भएका थिए । उनीहरुलाई उपचारका लागि केएमसी अस्पताल सिनामङ्गल पुर्‍याइएको र चिकित्सकले मनराजलाई मृत घोषणा गरेको महानगरीय प्रहरी परिसर भक्तपुरका प्रवक्ता डीएसपी दिपक गिरीले बताए । मनिकलाको भने सोही अस्पतालमा उपचार भइरहेको उनले बताए ।

दुर्घटनामा सामान्य घाइते भएका बा ५३ प ९८६४ नम्बरको मोटरसाइकल चालक रौतहट गौर नगरपालिका–८ का ४१ वर्षीय युवराज विक उपचारपछि सवारी साधनसहित महानगरीय प्रहरी वृत थिमीको नियन्त्रणमा रहेको जनाएको छ ।

प्रकाशित : पुस २६, २०७७ १६:२७
पूरा पढ्नुहोस्
प्रतिक्रिया
पठाउनुहोस्
×