मुसिकोटका भौतिक संरचना अब नक्सामा- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

मुसिकोटका भौतिक संरचना अब नक्सामा

हरि गौतम

रुकुम पश्चिम — अब मुसिकोट नगरपालिकाका हरेक भौतिक संरचना नक्सामा हेर्न पाइने भएको छ । नगरपालिकाभित्र बनेका सम्पूर्ण संरचना समेटिने गरी नगर यातायात गुरुयोजना बनाउन सुरु भएको हो ।

सडक र अरु संरचनाको निर्माण व्यवस्थित गर्न एउटै नक्सामा गुरुयोजना बनाउन लागिएको हो । जसका लागि क्यानभास इन्जिनियरिङ कन्सल्टेन्सीले १० लाख रुपैयाँमा गुरुयोजना बनाउने जिम्मा लिएको छ । अहिले १४ वटै वडामा जीपीएसको माध्यमबाट लगत संकलनको काम भइरहेको नगरपालिकाका इन्जिनियर पहलबहादुर पुनले बताए । उनका अनुसार लगत संकलन गरिएपछि त्यसको विश्लेषण हुने र यसैका आधारमा नगरपालिकाले थप रणनीति तथा योजना बनाउने छ । ‘सडकलगायतका भौतिक संरचनाको निर्माणमा एकरुपता कायम गर्न र आवश्यक्ताअनुसार काम गर्न गुरुयोजना बनाउन लागिएको हो,’ उनले भने, ‘यसले विकासको आवश्यक्तालाई पनि प्राथमिकीकरण गर्न सहयोग गर्नेछ ।’

सडक, झोलुंगेपुल, विद्यालय भवन, स्वास्थ्यचौकी, हेलिप्याडलगायतको नक्सा गुरुयोजनामार्फत बनाउन लागिएको हो । ‘यसमा ५ वर्षमा कति सडक निर्माण गर्ने, कुन स्तरका सडक निर्माण गर्ने र मर्मत गर्ने भन्नेबारे पनि प्रष्ट खुल्नेछ,’ नगरप्रमुख देविलाल गौतमले भने, ‘२० वर्षे सडक योजना पनि गुरुयोजनामा समाबेश हुनेछ ।’ सडकसँगै नगरपालिकाका अरु भौतिक संरचना पनि नक्सामा आउने उनले बताए । उनका अनुसार हेली लिफ्टका लागि १४ वटै वडामा हेलिप्याड बनाउने नगरपालिकाको योजना छ । कुन ठाउँमा हेलिप्याड बनाउने र कसरी बनाउने भन्ने विस्तृत विवरण गुरुयोजनामा समावेश हुने उनले जानकारी दिए ।

जिल्ला सदरमुकाममा रहेको नगरपालिकाले तीन समूहका सडक निर्माण गर्ने रणनीति अख्तियार गरेको छ । १४ मिटरको ‘क’, १० मिटरको ‘ख’ र ६ मिटरको ‘ग’ वर्गका सडक बनाउने नीति नगरपालिकाले लिएको छ । ठाउँ र अवस्था हेरि यि ३ भन्दा फरक नापका सडक निर्माणमा नगरपालिकाले रोक लगाएको नगरप्रमुख गौतमले बताए । उनका अनुसार सबै विकास संरचनालाई व्यवस्थित तवरले नक्सामा राखी योजनावद्ध विकासका लागि गुरुयोजनाको काम थालिएको हो ।

प्रकाशित : पुस २३, २०७७ १८:३१
प्रतिक्रिया
पठाउनुहोस्

ओलीको कदमविरुद्ध जनतामा जान दाहाल-नेपाल समूहलाई नागरिक अगुवाहरुको सुझाव 

कान्तिपुर संवाददाता

काठमाडौँ — नागरिक अगुवाहरुले प्रधानमन्त्री केपी शर्मा ओलीको कदमको विरोध गर्दै जनतामा जान सुझाव दिएका छन् । बिहीबार काठमाडौंको एक होटलमा नेकपा (दाहाल–नेपाल) समूहले गरेको अन्तरक्रियामा नागरिक अगुवाहरुले जनतामा जाँदा आफ्ना कमीकमजोरीहरु र प्रतिबद्धताहरु खुलस्त रुपमा राख्न पनि सुझाव दिएका छन् ।

कार्यक्रममा मानव अधिकारकर्मी कृष्ण पहाडीले विगतमा भएका सैद्धान्तिक र नीतिगत भूलको समीक्षा गरी गल्ती नदोहोर्‍याउने प्रतिबद्धता जनाएरमात्रै आन्दोलनमा जान सुझाव दिएका छन् । गलत कदम चाल्ने प्रधानमन्त्री ओलीको पतन निश्चित भएको पनि बताए । आफू पतन हुँदै लोकतन्त्रलाई पनि पतन गराउने हो की भन्ने खतरा रहेको पनि पहाडीले बताए । यस्तै सरकारले वैशाखमा चुनाव गर्ने कुनै मनसाय नराखेको स्पष्ट हुने पनि बताए ।

कार्यक्रममा वरिष्ठ अधिवक्ता हरि दाहालले असंवैधानिक कदमको विरुद्धमा सबै दल एक भएर आन्दोलनका कार्यक्रम गर्न सुझाव दिए । सबै दल एक भएमात्रै संविधान र लोकतन्त्रको रक्षा गर्न सकिने उनको भनाइ थियो ।

मानवअधिकारकर्मी मोहना अनसारीले स्वतन्त्र रुपमा नागरिकले बाँच्न पाउने अधिकार विस्तारै कुण्ठित हुने अवस्था आउन लागेको बताइन् । अहिलेको विकसित राजनीतिक घटनाक्रमले संवैधानिक संकटतर्फ देशलाई धकेलिरहेको उनले बताइन् ।

अर्थविद् दिपेन्द्रबहादुर क्षेत्रीले संसदले काम नगरे राजीनामा दिने ठाउँमा प्रधानमन्त्रीले आफ्नो नैतिकता देखाउन नसकेको टिप्पणी गरे । प्रधानमन्त्रीमा देखिएको हठका कारण देशमा राजनीतिक संकट उत्पन्न भएको उनले बताए ।

पूर्वसभामुख दमननाथ ढुंगानाले राजनीतिक संकट आउँदा मात्रै विज्ञहरुलाई सम्झिएको भन्दै राजनीतिक दलहरुको प्रवृत्ति माथि प्रश्‍न गरे । उनले प्रधानमन्त्रीले के गर्दै हुनुहुन्छ भन्ने आफ्नै दलका नेताहरुलाई थाह नहुने अवस्था कसरी भयो त्यसको जवाफ नेताहरुले दिनुपर्ने उनले बताए ।

पूर्वमुख्यसचिव लिलामणि पौडेलले मुलुक अस्थिरतातर्फ र संवैधानिक संकटतर्फ जाने खतरा बढेको बताए । राजनीतिक दलहरुले सरकारमा बसेको बेला पारदर्शी ढंगले सरकार सञ्चालन गर्छन् वा गर्दैनन् भन्ने कुरालाई हेरेर अबको दिनमा हुने आन्दोलनमा जनताले साथ दिने वा नदिने निर्धारण गर्ने बताए ।

प्रकाशित : पुस २३, २०७७ १८:२२
पूरा पढ्नुहोस्
प्रतिक्रिया
पठाउनुहोस्
×