हिउँले ढाकियो रारा- कर्णाली - कान्तिपुर समाचार

हिउँले ढाकियो रारा

राजबहादुर शाही

मुगु — कर्णाली प्रदेशको मुख्य पर्यटकीय गन्तव्यमध्येको एक रारा हिउँले ढपक्कै ढाकिएको छ । आइतबार रातिदेखि परेको हिँउले राराक्षेत्र कपासले छोपिएजस्तो देखिएको छ ।


तालसँगै वरपरको वन सेताम्मे बनेको छ । घुम्न आएका आन्तरिक पर्यटक, निकुञ्जका कर्मचारी, गुल्ममा कार्यरत सेनाका जवानहरू हिउँ खेलेर रमाउँदै छन् । रारामा यो यस वर्षको दोस्रो हिमपात रहेको रारा राष्ट्रिय निकुञ्ज कार्यालयका रेन्जर सरोज खड्काले बताए । उनका अनुसार करिब ५ इन्च हिउँ जमेको छ । हिउँ पर्ने क्रम अझै जारी छ ।

गत मंसिर २ गते पनि रारामा २ इन्च हिउँ परेको परेको निकुञ्जका कर्मचारीले जनाएका छन् । चिसोले स्थानीय जनजीवन भने प्रभावित भएको छ । गाउँदेखि गमगढी बजारसम्मका बासिन्दा आगो तापेर दिन कटाइरहेका छन् ।

रारा तालभन्दा एक घण्टा माथिको मुर्मा गाउँमा भने आधा फिट हिउँ जमेको छ । यो ठाउँ समुद्री सतहदेखि ३२ सय मिटर उचाइ पर्छ । हिउँ परेपछि हिउँदे बाली सप्रने भएकाले कृषकहरू खुसी भए पनि गाईबस्तु चराउन, घाँसदाउरा ल्याउन कठिनाइ भएको स्थानीय बिर्खबहादुर रोकायाले सुनाए ।

प्रकाशित : पुस २०, २०७७ १३:३८
प्रतिक्रिया
पठाउनुहोस्

५० राउन्ड गोलीसहित त्रिभुवन अन्तर्राष्ट्रिय विमानस्थलबाट एक जना पक्राउ

कान्तिपुर संवाददाता

काठमाडौँ — त्रिभुवन अन्तर्राष्ट्रिय विमानस्थलबाट पेस्तोलमा लाग्ने ५० राउन्ड गोलीसहित एक जना पक्राउ परेका छन् ।

झापाको मेचीनगर नगरपालिका २ का बद्रीहाङ राई ९ एमएम पेस्तोलमा लाग्ने ५० राउन्ड गोलीसहित पक्राउ गरिएको महानगरीय विमानस्थल प्रहरी सुरक्षा कार्यालयले जानकारी दिएको छ । राई श्री एयरलाइन्सबाट झापाको भद्रपुर जाँदै थिए ।

सुरक्षा जाँचका क्रममा राईको लगेजमा गोली भेटिएको कार्यालयका एसएसपी राजेशनाथ बास्तोलाले बताए । पक्राउ परेका राईलाई महानगरीय प्रहरी वृत्त गौशालाको जिम्मा लगाइएको उनले बताए । घटनाको थप अनुसन्धान भइरहेको र विस्तृत विवरण आउन बाँकी रहेको प्रहरीले बताएको छ ।

प्रकाशित : पुस २०, २०७७ १३:३८
पूरा पढ्नुहोस्
प्रतिक्रिया
पठाउनुहोस्
×