२६ किमि सडक प्रदेश सरकारलाई- कर्णाली - कान्तिपुर समाचार

२६ किमि सडक प्रदेश सरकारलाई

राजबहादुर शाही

मुगु — ग्रामीण पहुँच कार्यक्रमले निर्माण गरेको २६ किलोमिटर सडक प्रदेश सरकारलाई हस्तान्तरण गरिएको छ । गमगढीबाट चंखेलीसम्मको २६ किलोमिटर सडक प्रदेश सरकारलाई हस्तान्तरण गरिएको हो ।

निर्माण सम्पन्न भएको सडक शुक्रबार जिल्ला पूर्वाधार विकास कार्यालयलाई हस्तान्तरण गरिएको परियोजनाका फिल्ड व्यवस्थापक विष्णुराम विष्टले बताए । उनका अनुसार मुगुको चंखेलीदेखि हुम्लाको दार्म–देउलीसम्मको करिब ४१ किलोमिटर सडक पनि निर्माणाधीन छ । सडक निर्माणको झण्डै ७० प्रतिशत काम पूरा भइसकेको उनले जानकारी दिए । उनका अनुसार सन् २०२२ भित्र उक्त सडक निर्माण गरी प्रदेश सरकारलाई हस्तानान्तरण गर्ने कार्यक्रमको लक्ष्य छ । परियोजनाले उक्त सडकअन्तर्गतको दर्खेखोला, लुमखोला र लेब्राखोलामा पनि पक्की पुल बनाउन सुरु गरेको छ ।

सन् २०१८ देखि गमगढी–हुम्ला दार्म लिंकरोड निर्माण सुरु गरिएको थियो । सडक निर्माणमा अहिलेसम्म १ अर्ब ६२ करोड रुपैयाँ खर्च भइसकेको कार्यक्रमले जनाएको छ । कार्यक्रमले सन् २०१३ देखि २०१८ सम्म २१ किलोमिटर गमगढी–तारापानी सडक निर्माणको काम पूरा गरेको थियो । उक्त सडकले सोरुलाई सदरमुकाम गमगढीसम्म जोडेको छ ।

सडक निर्माणको काम गुणस्तरीय भएपछि प्रदेश सरकार मातहत ल्याइएको पूर्वाधार कार्यालय प्रमुख योगेन्द्र धरालाले बताए । उनका अनुसार सडक निर्माणमा झण्डै १३ सय स्थानीयले ३ वर्षसम्म रोजगारी पाएका थिए । सडक निर्माण पूरा भएपछि बाम, दर्खेलबाडा, फोइपाटा, लुम, रुघालगायत गाउँ सडक सञ्जालमा जोडिएका छन् ।

प्रकाशित : पुस १२, २०७७ १९:२४
प्रतिक्रिया
पठाउनुहोस्

कर्णालीमा बन्यो बेलिब्रीज

राजबहादुर शाही

मुगु — सदरमुकाम गमगढी र सोरु गाउँपालिकालाई सडक सञ्जालमा जोड्न कर्णाली नदीमा बेलिब्रीज निर्माण गरिएको छ । तारापानी– सिपगाउँ जोड्ने गरी सिपघाटमा पक्की पुल निर्माण गरिएको हो ।

गाउँपालिकाको ३ करोड ३७ लाख रुपैयाँ बजेटबाट पुल निर्माण गरिएको हो । यसअघि कर्णाली नदीमा पुल नहुँदा स्थानीयबासी दुई चरणमा यात्रा गर्न बाध्य थिए । गाडी भाडासमेत महँगो थियो । पुल नबन्दा गमगढीबाट तारापानीसम्म ५ सय र सिपगाउँदेखि सोरुकोटसम्म ७ सय रुपैयाँ जिप भाडा तिर्नुपर्ने बाध्यता रहेको स्थानीय कमल शाहीले बताए । ‘अब सोझै गमगढीबाट सोरुकोट पुग्न सकिने भयो,’ उनले भने, ‘भाडा पनि सस्तो हुने अपेक्षा छ ।’ यसअघि पुल नहुँदा भारीसहितका यात्रुले ठूलो सास्ती भोग्नुपरेको उनले बताए । उनले अब ५ घण्टामै घर पुग्न सकिने आशा व्यक्त गरे ।

जल्प/रवी/चक्र जेभीले पुल निर्माणको काम पूरा गरेको हो । पुल निर्माण सकिए पनि १ करोड ३५ लाख रुपैयाँ अझै भुक्तानी नहुँदा मजदुरलाई ज्याला दिन नसकिएको निर्माण कम्पनीले जनाएको छ । अहिलेसम्म २ करोड २ लाख रुपैयाँ मात्र भुक्तानी पाएको ठेकेदार हेमराज शाहीले बताए । ‘पुल निर्माण भएपछि ३ पटक पत्र लेखिसके,’ उनले भने, ‘बेवास्ता भएपछि निर्माण सामग्रीको रकम र मजदुरको ज्याला तिर्न मुस्किल भएको छ ।’ एक साताभित्रै ठेकेदार कम्पनीलाई बाँकी रकम भुक्तानी दिने गरी प्रक्रिया थालिएको गाउँपालिकाका प्रमुख प्रशासकीय अधिकृत वीरेन्द्र शाहीले बताए ।

प्रकाशित : पुस १०, २०७७ १९:०७
पूरा पढ्नुहोस्
प्रतिक्रिया
पठाउनुहोस्
×