धारामा बरफ जमेपछि तातोपानीमा घुइँचो- कर्णाली - कान्तिपुर समाचार

धारामा बरफ जमेपछि तातोपानीमा घुइँचो

राजबहादुर शाही

मुगु — हिमाली बस्तीहरुमा अत्यधिक जाडो बढेपछि तातोपानी कुण्डमा नुहाउन जानेको घुइँचो लागेको छ ।

खोला र धारामा बरफ जमेपछि छायानाथ रारा नगरपालिकाको रुगास्थित भुसेकुना र जिमास्थित कुलाहा तातोपानी कुण्डमा स्थानीयको भीड बढेको हो ।

हुम्ला सीमाका स्थानीयबासी जैरस्थित लुमछहरा तातोपानी कुण्डमा नुहाउन जाने गरेका छन् । जाडोको कारण धारामा नुहाउन नसकिने भएपछि रुगा, थार्प, इमा, निगाले, हेन्निकाँध, श्रीनगर, भामबाडालगायत ठाउँबाट भुसेकुना तातोपानी धारामा नुहाउन जाने बढिरहेका हुन् । ‘गाउँगाउँमा बाक्लो बरफ जमेको छ, जाडोले धारामा नुहाउनै सकिँदैन,’सोरु गाउँपालिका–६ की जयपुरा वुढाले भनिन्, ‘विभिन्न स्वास्थ्य समस्याबाट मुक्ति पाइने भएपछि तातोपानीमै नुहाउनै जाने गरेका हौं ।’ उनका अनुसार बालबालिकादेखि बृद्धसम्मको तातोपानीमा घुइँचो लाग्छ । शनिबारको दिन दुई सय जनासम्मले तातोपानीमा नुहाउने गरेको उनले बताइन् ।

तातोपानीमा नुहाउँदा शरीर दुख्ने, चर्मरोग, उच्च रक्तचाप, अनुहारको दागलगायत स्वास्थ्य समस्या समाधान हुने स्थानीयको भनाइ छ । जाडो बढेपछि सोरु गाउँपालिकाको जिमा–कुलाहा तातोपानी कुण्डमा नुहाउन नाथर्पु, कालै, रारा, सिप, धैनकोट, पुरुमुरु, सिप ख्याल्च, रारा गिलाहालगायत बस्तीका स्थानीयको ओइरो लाग्न थालेको छ । गर्मी महिनामा सुनसान हुने कुण्ड जाडो बढेसँगै भरिभराउ हुन्छन् । तातोपानीमा नुहाउने स्थानीयले देउडा खेलेर रमाइलो गर्ने गरेका छन् ।

सोरु गाउँपालिकास्थित सोरुकोट गाउँकी पूर्वादेवी कार्कीले बिहानैदेखि साँझ अबेरसम्म तातोपानीमा नुहाउनेको घुइँचो लाग्ने गरेको बताइन् । उनका अनुसार टाढाका स्थानीय एक सातासम्म पुग्नेगरी सातुचामल बोकेर तातोपानीमा नुहाउन जाने गरेका हुन् । तातोपानी व्यवस्थित नहुँदा नुहाउन समस्या भएको उनको गुनासो छ । गत वर्ष २५ लाख रुपैयाँ बजेटबाट भुसेकुना तातोपानी कुण्डलाई व्यवस्थित बनाइएको १३ नम्बर वडाध्यक्ष चक्र सावतले बताए ।

प्रकाशित : पुस ९, २०७७ १५:२१
प्रतिक्रिया
पठाउनुहोस्

सडक निर्माणमा रारा निकुञ्‍जको अवरोध

राजबहादुर शाही

मुगु — सदरमुकाम गमगढीदेखि खत्याड गाउँपालिकाको केन्द्र जोड्ने सडक निर्माणमा रारा राष्ट्रिय निकुञ्ज बाधक बनेको छ । गाउँपालिकाको सेरी हुँदै राराताल नजिकको माझघट्ट जोड्ने सडक निर्माण नहुँदा खत्याडवासी एक दिन पैदल हिँडेर सदरमुकाम आउजाउ गर्न बाध्य छन् ।

खत्याड गाउँपालिकाले निकुञ्ज क्षेत्रभित्र पर्ने १३ किलोमिटर सडक निर्माणका लागि गत आर्थिक वर्षमा सर्भे गरी निकुञ्ज कार्यालयसँग अनुमति मागेको थियो । गाउँपालिका अध्यक्ष उब्जन शाहीका अनुसार प्रारम्भिक रूपमा वातावरणीय प्रभाव मूल्यांकनसमेत गरिएको थियो । ‘तर अहिलेसम्म अनुमति दिइएको छैन, निकुञ्जले आफ्नो क्षेत्रबाट सडक बनाउन मिल्दैन भनिरहेको छ,’ उनले भने, ‘यो सडक बनिदिएको भए गाउँवासीलाई निकै सुविधा हुने थियो ।’

अहिले खत्याडवासीलाई एक दिन लगाएर जुम्लाको गोठीज्युला भएर गमगढी पुग्नुपर्ने बाध्यता छ । त्यसैले स्थानीय पैदलै आउजाउ गर्ने गरेको खत्याड–८ का जन्मजय भण्डारीले बताए । उनका अनुसार निकुञ्जबाट सडक खनिएमा करिब ५ घण्टामै सदरमुकाम पुग्न स किन्छ । गाउँपालिकादेखि निकुञ्जसम्म जोड्ने ग्राभेल सडक निर्माण भइसकेकाले पनि निकुञ्जले प्रक्रिया पुर्‍याएर अनुमति दिनुपर्ने उनले बताए । ‘निकुञ्जबाट हामीले सेवासुविधा केही पाएनौं, खालि दुःख मात्रै पाइरहेका छौं,’ उनले भने, ‘निकुञ्जले सडक छेकेर हामीलाई धेरै दुःख दियो ।’

छायानाथरारा नगरपालिकाले गमगढीदेखि लामाचौरसम्म सडक खनिसकेको छ । उताबाट खत्याड गाउँपालिकाले गम्थादेखि निगालबोटको समानेसम्म २१ किलोमिटर लामो सडक निर्माण भइसकेको जनाएको छ । निकुञ्ज क्षेत्रमा वातावरणीय प्रभाव मूल्यांकन गरेर निर्माणको अनुमति दिएमा दूरी निकै कम हुने गाउँपालिका अध्यक्ष शाहीले बताए ।

प्रकाशित : पुस १, २०७७ १४:०५
पूरा पढ्नुहोस्
प्रतिक्रिया
पठाउनुहोस्
×