पुलु डिपो ८ महिनादेखि रित्तै - कर्णाली - कान्तिपुर समाचार

पुलु डिपो ८ महिनादेखि रित्तै 

राजबहादुर शाही

मुगु — मुगुमकार्मारोङका जनताका लागि स्थापना गरिएको मुगुको पुलु डिपो ८ महिनादेखि रित्तै छ । मुगुमकार्मारोङ गाउँपालिकाको पुलु खाद्य डिपोमा भने गत वैशाखदेखि खाद्यान्न ढुवानी भएको छैन । खाद्यान्न नपुग्दा स्थानीयवासी महँगोमा बजारको चामल किनेर खाँदैछन् ।


गाउँपालिकाका करिब १ हजार ३ सय परिवारका लागि आवश्यक खाद्यान्न उपलब्ध गराउन खाद्य व्यवस्था तथा व्यापार कम्पनीले पुलुमा डिपो स्थापना गरेको थियो । ढुवानीको जिम्मा लिएको शर्मा ढुवानी सेवाले डिपोमा चामल नपुर्‍याउँदा माथिल्लो बस्तीका मुगु, डोल्फू, कार्तिक, किम्री र तल्लोबस्तीका ताख, खारी, मह, रिउस गाउँका बासिन्दा महँगोमा चामल किन्न बाध्य छन् । शर्मा ढुवानी सेवामाथि मुगुको कालै पुर्‍याउनुपर्ने चामल भक्तपुर पठाएको आरोपमा जिल्ला प्रशासन कार्यालय सुर्खेतमा कालोबजारी ऐनअन्तर्गत मुद्दा चलिरहेको छ ।

हिमपातको बेला व्यापारीको चामल पनि पाउन मुस्किल हुँदा कसरी भोक टार्ने भन्ने चिन्ताले स्थानीयलाई सताएको छ । चितैगाउँका उर्गिन लामाले पैसा बोकेर चामल किन्न बजार जाँदासमेत रित्तै फर्किनुपरेको बताए । उनका अनुसार बजारमा चामल पाइहालेमा पनि प्रतिकेजी ८० देखि ८५ रुपैयाँसम्म पर्ने गर्छ । त्यही चामल डिपोमा ५० रुपैयाँसम्म पर्छ । ‘बरु पैसा कमाउन सजिलो, एक किलो चामल पाउन साह्रै गाह्रो,’ उनले भने ।

चालु आर्थिक वर्षमा पुलु डिपोका लागि १ हजार ७ सय ५० क्विन्टल चामलको कोटा स्वीकृत भए पनि ठेकेदारले ढुवानी गरेका छैनन् । गाउँपालिका अध्यक्ष छिरिङ क्याप्ने लामाले खाद्य कम्पनीसँग बारम्बार अनुरोध गर्दासमेत चामल नआएको बताए ।

प्रकाशित : मंसिर २८, २०७७ १३:५५
प्रतिक्रिया
पठाउनुहोस्

मुगमकार्मारोङका विद्यालयमा जाडो बिदा नहुने

राजबहादुर शाही

मुगु — मुगुमकार्मारोङ गाउँपालिकाले यस वर्ष सामुदायिक विद्यालयमा जाडो बिदा नदिने भएको छ । कोरोना महामारीका कारण बन्द विद्यालय झण्डै ८ महिनापछि खुलेकाले जाडो बिदा नदिने निर्णय गरिएको हो । गाउँपालिकाका विद्यालयहरु मंसिर १८ गतेदेखि संचालनमा आएका छन् । गाउँपालिकामा १८ सामुदायिक विद्यालय छन् ।

गत वर्षसम्म मुगमकार्मारोङमा पुस १५ देखि माघ १५ गतेसम्म जाडो बिदा हुन्थ्यो । कोर्स नसकिने भएपछि अरु सार्वजनिक बिदाका दिन पनि विद्यालय संचालन गर्ने निर्णय गरिएको गाउँपालिका अध्यक्ष छिरिङक्याप्ने लामाले बताए । ‘अब शनिबार पनि विद्यालय संचालन गर्ने निर्णय भएको छ,’ उनले भने, ‘अत्यधिक जाडो बढेपछि केही विद्यालय आगो बालेर पठनपाठन संचालन गरिरहेका छन् ।’

धेरै जाडो बढेपछि सावधानी अपनाएर पठनपाठन गराउन थालिएको बुद्ध माध्यमिक विद्यालयका प्रधानाध्यापक टिकाप्रसाद उपाध्यायले बताए ।

प्रकाशित : मंसिर २६, २०७७ १६:५२
पूरा पढ्नुहोस्
प्रतिक्रिया
पठाउनुहोस्
×