हुम्ला टेलिकम कार्यालयमा तालाबन्दी

जिल्लामा सक्रिय युवा समूह, विभिन्न विद्यार्थी संगठन, महिला सञ्जाल र नागरिक समाजले टेलिकम कार्यालयमा तालाबन्दी गरेका हुन् । टेलिफोन सेवा भरपर्दो नबनाइँदासम्म तालाबन्दी जारी रहने नेविसंघकी उपाध्यक्ष सोनामछिरिङ लामाले बताइन् । ‘टेलिफोन सेवा भरपर्दो नहुँदा अन्य सेवाबाट पनि वञ्चित हुनुपरेको छ,’ उनले भनिन्, ‘महिनौसम्म फोन सेवा अवरुद्ध भएपछि दुर्गम गाउँका बासिन्दाको सदरमुकामसँग सम्पर्कविच्छेद भएको छ ।’ उनका अनुसार झण्डै ६० जनाको समूहले टेलिकममा तालाबन्दी गरेको हो ।

क्षमताभन्दा बढी मोबाइल सीम वितरण गरिएका कारण समस्या भएको टेलिकम प्रमुख शिवप्रसाद भट्टराईले बताए । ‘सम्भव भएसम्म मर्मतलाई पनि निरन्तरता दिएका छौं,’ उनले भने, ‘सेवालाई गुणस्तर बनाउन आवश्यक प्रयास गरिरहेका छौं ।’