हुम्लाको शैक्षिक सत्र स्थगित, जिल्ला प्रवेशमा रोक- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

हुम्लाको शैक्षिक सत्र स्थगित, जिल्ला प्रवेशमा रोक

विगत वर्षमा फागुनमा सुरु भएर कात्तिकमा शैक्षिक सत्र सकिन्थ्यो ।
छपाल लामा

हुम्ला — कोरोना संक्रमितको संख्या बढेपछि हुम्लाको शैक्षिक सत्र स्थगित भएको छ । बुधबार बसेको संकट व्यवस्थापन केन्द्रको बैठकले बिहीबारदेखि जिल्लाभरिका शैक्षिक संस्था बन्द गर्ने निर्णय गर्दै जिल्ला प्रवेशमा रोक लगाएको हो ।

नाम्खा गाउँपालिकाको याल्वाङस्थित महाबौद्ध माध्यमिक विद्यालयमा अध्ययनरत ५१ जना विद्यार्थीमा कोरोना संक्रमण पुष्टि भएपछि जिल्लाभरका शैक्षिक संस्था बन्द गर्ने निर्णय गरिएको हो । लामो समयको लकडाउनपछि हुम्लाका विद्यालयहरु कात्तिक दोस्रो साताबाट खुलेका थिए ।

अत्यधिक चिसो हुने भएकाले विगत वर्षमा फागुनमा सुरु भएर कात्तिकमा शैक्षिक सत्र सकिन्थ्यो । तर लकडाउनका कारण बन्द हुने समयमै जिल्लाका विद्यालयहरु खुलेका थिए । संक्रमितहरु बढेपछि केन्द्रको बैठकले सातवटै गाउँपालिकाका मुख्य नाकामा चेकजाँचमा कडाइ गर्ने निर्णय गरेको छ ।

नाम्खा र सिमकोट गाउँपालिकामा बाहिरका मानिस आउन नदिन ३ दिनका लागि नाका बन्द गरिएको प्रमुख जिल्ला अधिकारी चिरिञ्जिवी गिरीले बताए । उनका अनुसार नाम्खा गाउँपालिकाको यालबाङमा ४ दिनको अवधिमा ५६ जनामा कोरोना संक्रमण पुष्टि भएपछि उच्च सतर्कता अपनाइएको छ ।

उनले नाम्खामा संक्रमणको दर उच्च रहेको जानकारी दिए । ‘सबै स्थानीय तहसँग समन्वय गरेर स्वाब संकलन र परीक्षणको व्यवस्था मिलाउन जिल्ला स्वास्थ्य कार्यालयलाई निर्देशन दिएका छौं,’ उनले भने, ‘७ वटै पालिकामा कन्ट्रयाक्ट ट्रेसिङलाई पनि तीव्रता दिइएको छ ।’ लक्षणसहितका कोरोना संक्रमितलाई बाहिरका अस्पतालमा पठाउन प्रदेश सरकारसँग हेलिकप्टर माग गरिएको बताए ।

केन्द्रको बैठकले जिल्ला अस्पतालका २ भेन्टिलेटर अपुग भएपछि थप माग गर्ने, सिमकोट गाउँपालिकाले जिल्लास्तरीय क्वारेन्टाइनको व्यवस्था गर्ने, प्रत्येक गाउँपालिकामा ५ शय्याको आइसोलेसन र १५ बेडको क्वारेन्टाइन बनाउने निर्णय गरेको छ । नेपालगन्ज र सुर्खेतबाट आएका यात्रुको ज्वरो मापन गर्नका लागि सिमकोट विमानस्थलमा स्थापना गरिएको हेल्थ डेस्कलाई थप व्यवस्थित गरिएको प्रमुख जिल्ला अधिकारी गिरीले बताए ।

प्रकाशित : मंसिर ४, २०७७ १७:१०
प्रतिक्रिया
पठाउनुहोस्

काठमाडौं उपत्यकामा थप १२ सय २९ जनामा कोरोना संक्रमण

कान्तिपुर संवाददाता

काठमाडौँ — पछिल्लो २४ घन्टामा काठमाडौं उपत्यकामा थप १२ सय २९ जनामा कोरोना संक्रमण देखिएको स्वास्थ्य तथा जनसंख्या मन्त्रालयले जनाएको छ ।

बिहीबार काठमाडौं जिल्लामा ९६५, भक्तपुरमा ७५ र ललितपुरमा १८९ जनामा कोरोना संक्रमण देखिएको हो ।

थपिएका नयाँ संक्रमित मध्ये ५१३ जना महिला र ७१६ जना पुरुष रहेका छन् ।

यस्तै, काठमाडौंमा १२ हजार ४४१, भक्तपुरमा ९८९ र ललितपुरमा २२ सय ४४ जना सक्रिय संक्रमित रहेका छन् ।

कोरोनाबाट हालसम्म काठमाडौंमा ३१२, भक्तपुरमा ८१ र ललितपुरमा ८९ जनाको मृत्यु भएको मन्त्रालयले जनाएको छ ।

बिहीबार देशभर २ हजार १०३ जनामा कोरोना संक्रमित थपिएका छन् । यस्तै, पछिल्लो २४ घन्टामा बिहीबार २ हजार ८५८ जना कोरोनाबाट मुक्त भएका छन् ।

प्रकाशित : मंसिर ४, २०७७ १६:५६
पूरा पढ्नुहोस्
प्रतिक्रिया
पठाउनुहोस्
×