मुगु र हुम्लामा हिमपात- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

मुगु र हुम्लामा हिमपात

राजबहादुर शाही

मुगु — मुगु र हुम्लाका उच्च हिमाली बस्तीमा यो वर्ष मंसिरमै हिमपात भएको छ । सोमबार मुगुको रारा, मुर्मा, ताल्चा, चुचुमारेलेक, घुच्चीडाब, बाम, चंखेलीलेक, मुगु, डोल्फु, छायानाथ, ऋणीमक्षलेकलगायत क्षेत्रमा करिब ३ इन्च हिउँ परेको हो । हिमपात भएपछि हुम्लाका डाँडाकाँडासमेत सेताम्मे बनेका छन् । 

सोरु गाउँपालिका–२, जडेपानीका राजेन्द्रबहादुर शाहीले हिमपात भएपछि तिहार रमाइलो बनेको बताए । उनले सोमबार दिनभर तिहार मनाउन माइतीमा आएका चेलीहरुसँग हिउँ खेलेर रमाएको जनाए । ‘अहिलेसम्म मंसिरमा हिउँ परेको अनुभव गरेको थिएन,’ उनले भने, ‘चाडबाडको समयमै हिमपात हुँदा परिवार र साथीभाइसँग रमाइलो गरियो ।’

उनीमात्र होइन, रारा विमानस्थलमा हिमपात भएपछि सदरमुकाम गमगढीका व्यवसायी र कर्मचारीसमेत रमाए । गत भदौदेखि सुख्खा देखिएको मुगुमा हिउँ परेपछि जताततै रमाइलो बनेको ताल्चाका बाँचे महतराले बताए । उनका अनुसार हिउँ परेपछि रारा घुम्न आएका पर्यटकसमेत रमाएका छन् । ‘केही वर्षयता मंसिरमै हिउँ पर्न थाल्यो,’ उनले भने, ‘अब रारा घुम्न आउने पर्यटक बढ्ने अपेक्षा छ ।’ उनका अनुसार यो वर्ष भारी हिमपात हुने स्थानीयवासीको अनुमान छ । उनले औंलतिरका बस्तीहरुमा पनि भारी वर्षा भएको जानकारी दिए ।


प्रकाशित : मंसिर २, २०७७ १७:१५
प्रतिक्रिया
पठाउनुहोस्

कोरोनाका कारण रोजगारी गुमाएकालाई पुन:नियुक्ति

हरि गौतम

रुकुम पश्चिम — आठबीसकोट नगरपालिकाले कोरोनाको कारण देखाउँदै हटाइएका शिक्षक र कर्मचारीलाई पुन:नियुक्ति दिएको छ ।

नगरपालिकाले करार सम्झौता रद्द गरेका डेढ सय शिक्षक र कर्मचारीलाई फेरि नियुक्ति दिएको हो । उनीहरुले ८ महिनापछि नियुक्ति पाएका हुन् ।

नगरपालिकाले नियुक्त गरेका शिक्षक तथा कर्मचारीको करार सम्झौता गत वैशाखमा रद्द गरेको थियो । नगरपालिकाले राजश्व बाँडफाँड शिर्षकबाट आउनुपर्ने बजेट नआएको र विद्यालयसमेत बन्द रहेको भन्दै १ सय ६६ जना शिक्षक, कर्मचारीहरुलाई हटाएको थियो ।

सम्बन्धित विद्यालय र नगर शिक्षा, युवा तथा खेलकुद शाखाबाट गरिएको कार्यसम्पादन मूल्यांकनबाट सफल भएका एक सय ४५ जनाको करार सम्झौता नविकरण गर्ने नगर शिक्षा समितिको असोज ३० गतेको निर्णयलाई कात्तिक १ गतेको ५३ औं नगर कार्यपालिका बैठकले पारित गरेको हो ।

बैठकले सहिद स्मृति नमुना माध्यामिक विद्यालयमा कार्यरत ५ जना शिक्षक, कर्मचारीको करार सम्झौता पनि थप गरेको छ । उनीहरुको असोज २१ गते र अन्य डेढ सय शिक्षक र कर्मचारीको कात्तिक १ गते देखि लागू हुने गरी करार सम्झौता नविकरण भएको नगरप्रमुख गोर्खबहादुर केसीले बताए ।

कार्यसम्पादन मूल्यांकन कमजोर भएका केही शिक्षक र कर्मचारीलाई हटाइएको उनले जानकारी दिए । उनका अनुसार नियुक्ति दिइएका १ सय ४५ जना शिक्षकलाई आन्तरिक स्रोतबाट तलब दिने गरी पुन:नियुक्त गरिएको हो ।

प्रकाशित : मंसिर २, २०७७ १७:१०
पूरा पढ्नुहोस्
प्रतिक्रिया
पठाउनुहोस्
×