दाउरा प्रहार गरी दाइको हत्या
सल्यान — बन्गाडकुपिण्डे नगरपालिका–१०, थापाचौरका २० वर्षीय देवीलाल पुनले दाउरा प्रहार गरी २४ वर्षीय दाइ अमर पुनको हत्या गरेका छन् । जिल्ला प्रहरी कार्यालयका अनुसार घरायसी विवादमा दाजुभाइबीच झगडा भएको थियो ।
दाउरा प्रहारबाट अमरको टाउकोमा गम्भीर चोट लागेको र उनको घटनास्थलमै मृत्यु भएको जिल्ला प्रहरी प्रमुख डीएसपी गोविन्द थापाले बताए । उनका अनुसार घटनालगत्तै देवीलाल फरार छन् । उनले दाइको हत्या गरेपछि घर नजिकैको ओढारमा शव फालेको प्रहरी अनुसन्धानको क्रममा खुलेको छ ।
घटनाबारे वडाध्यक्ष मानसिं पुरीले जानकारी दिएपछि प्रहरीले ओडारबाट शव निकालेर पोष्टमार्टमका लागि जिल्ला अस्पताल ल्याएको छ । घटनाबारे आवश्यक अनुसन्धान भइरहेको र फरार अभियुक्तको खोजी भइरहेको डीएसपी थापाले बताए ।
प्रकाशित : कार्तिक १, २०७७ १३:२३