पोल ढुवानी गर्न हेलिकप्टर- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

पोल ढुवानी गर्न हेलिकप्टर

छपाल लामा

हुम्ला — हिल्दुम साना जलविद्युत् आयोजनाको लाइन विस्तार योजनामा पोल ढुवानी गर्न हेलिकप्टर प्रयोग गरिएको छ । खार्पुनाथ गाउँपालिका–३, रायामा लाइन बिस्तार गर्न आयोजनाले ५० वटा पोल १० लाख रुपैयाँ भाडा तिरी हेलिकप्टरमार्फत ढुवानी गरेको हो ।

पोलहरु सदरमुकाम सिमकोटबाट गाडीमा ढुवानी गरी खार्पुनाथ गाउँपालिकाको दोभानमा पुर्‍याइएको थियो । दोभानदेखि रायासम्म पोल ओसार्न हेलिकप्टरलाई ७ मिनेट लागेको उपभोक्ता समिति अध्यक्ष टेकबहादुर वुढाले बताए । उनका अनुसार दोभानबाट रायागाउँको पैदल दूरी ३ घन्टाको छ ।

हेलिकप्टरबाट पोल ढुवानी गरिएकोप्रति स्थानीय युवाले भने बिरोध जनाएका छन् । ‘कि सदरमुकामबाटै हेलिकप्टरबाट ढुवानी गर्नुपर्थ्यो,’ स्थानीय लालधुन टमाटाले भने, ‘बीच बाटोबाट हेलिकप्टर प्रयोग गर्दा हाम्रो मजदुरी खोसियो ।’ कोरोना महामारीका कारण विकास निर्माणका काम नहुँदा अधिकांश युवा बेरोजगार बनेको उनको गुनासो छ । उपभोक्ता समितिले विकासको नाममा चरम लापरबाही र बजेटको दुरुपयोग गरेको उनले आरोप लगाए ।

राया पुर्‍याइएका पोलहरु नेपालगन्जबाट जहाजमा ढुवानी गरी सिमकोट ल्याइएको थियो । ७ मिनेटको दूरीमा एउटा पोल ढुवानी गर्न २० हजार रुपैयाँ खर्च भएको अध्यक्ष वुढाले बताए । ‘कठिन भूगोलका कारण भरिया प्रयोग गरी पोल गाउँ लग्न सकिएन,’ उनले भने, ‘मजदुरमार्फत ओसार्दा ढिलाइ हुने भएपछि बाध्य भएर हेलिकप्टर प्रयोग गरेका हौं ।’ उनले ढुवानी रकम हेलिकप्टर कम्पनीलाई भुक्तानी दिइसकेको जानकारी दिए । उनका अनुसार पोल गाउँमा पुगेपछि गाड्ने कामलाई तीव्र पारिएको छ । योजनाको अधिकांश काम एक महिनाअघि नै सकिए पनि पोलकै कारण ढिलाइ भएकाले हतारमा हेलिकप्टरमार्फत ढुवानी गरिएको आयोजनाले जनाएको छ । आयोजनाका अनुसार अहिले सिमकोट गाउँपालिकामा पनि लाइन बिस्तारको काम जारी छ । ढुवानीसहित पोल र तार जडानका लागि आयोजनाले २५ लाख बजेट छुट्याएको उपभोक्ता समितिका अध्यक्ष वुढाले बताए । ‘एक महिनाभित्रै गाउँमा बिजुली बाल्ने गरी निर्माणलाई तीव्रता दिएका छौं,’ उनले भने, ‘योजना सम्पन्न भएपछि गाउँका १ सय ५० घरमा विद्युत् सेवा पुग्नेछ ।’

प्रकाशित : आश्विन ९, २०७७ २२:३७
प्रतिक्रिया
पठाउनुहोस्

पाल्पा पहिरो : एकै परिवारका ५ जनाको शव भेटियो

कान्तिपुर संवाददाता

पाल्पा — रम्भा गाउँपालिका–२, फोक्सिङकोटमा पहिरोमा परी बेपत्ता भएका पाँचै जनाको शव पुरिएको अवस्थामा शुक्रबार भेटिएको छ । तीन बालबालिकाको शव दिउँसो र दुई जनाको भने शुक्रबार बेलुका फेला परेको हो ।

बिहीबार बिहान पहिरोले घर पुरिँदा एकै परिवारका पाँच बेपत्ता थिए । पहिरोमा पुरिएर मृत्यु हुनेमा ६० वर्षीय हुमबहादुर गाहा, उनकी पत्नी ५० वर्षीया धनीसरा गाहा, छोरी १७ वर्षीया कृष्णामाया गाहा, हुमबहादुरका नातिनीहरू ८ वर्षीया लक्ष्मी गाहा र १४ वर्षीया खुमीसरा आलेको शव फेला परेको प्रहरी कार्यालयका सूचना अधिकारी मदन गिरीले बताए । हुमबहादुर र धनीसराको शव बेलुका अबेरमात्र निकालिएको हो । उनले भने, ‘पहिरो ठूलो भएकाले पन्छाउन धेरै समस्या भएको हो ।’

सडक अवरुद्ध भएकाले पहिरोमा पुरिएकाको उद्धार गर्न टोली अलि ढिला पुगेको थियो । ताँहुबाट दुई घण्टा हिँडेर टोली घटनास्थल फोक्सिङकोट पुगेपछि शुक्रबार बिहानै खोजी कार्य सुरु भएको थियो । पहिरोमा पुरिएकाको सेना, प्रहरी बल, स्थानीय बासिन्दाले खोजी गरेका हुन् । पाँचै जनाको शव पोस्टमार्टमका लागि ताँहुसम्म ल्याइएको प्रमुख जिल्ला अधिकारी रमेश न्यौपानेले बताए । ताँहुको प्राथमिक स्वास्थ्य केन्द्रमा शव पोस्टमार्टम गर्न तानसेनबाट चिकित्सक पुगेका छन् ।

प्रदेश सांसद नारायणप्रसाद आचार्यले पहिरो खसेको स्थानमा प्राविधिक लगेर बस्तीका विषयमा अध्ययन गरिने बताए । उनले पीडित परिवारका लागि रेडक्रम सोसाइटीमार्फत कम्बल, त्रिपाललगायत सामग्री लगेर छाडेको बताए । ‘बस्तीकै अध्ययन गर्ने भनेर प्राविधिक लगिएको थियो,’ उनले भने, ‘सडकको पहिरो पन्छाउन नसकेर पुग्न सकिएन ।’ बेलौजामा तीन घर पहिरोमा पुरिएका छन् भने १७ घर जोखिममा छन् । खतरामा परेका बस्तीका बासिन्दालाई विद्यालय, स्वास्थ्यचौकी र छिमेकीको घरमा सारिएको छ । रम्भा गाउँपालिकाले पहिरोमा पुरिएर मृत्यु हुनेलाई प्रतिव्यक्ति ५० हजार रुपैयाँ राहत दिने निर्णय गरेको छ । यस्तै विस्थापित परिवारको खाने, बस्ने व्यवस्था मिलाउने गाउँपालिका अध्यक्ष विष्णुप्रसाद भण्डारीले बताए ।

प्रकाशित : आश्विन ९, २०७७ २२:२९
पूरा पढ्नुहोस्
प्रतिक्रिया
पठाउनुहोस्
×