विद्यालय नखुलेपछि टोलटोलमै पुगेर पढाइ- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

विद्यालय नखुलेपछि टोलटोलमै पुगेर पढाइ

विप्लव महर्जन

सल्यान — कोरोनाका कारण महिनौंदेखि पढाइ ठप्प भएपछि दार्मा गाउँपालिकाको फारुलास्थित जनज्योति माविले टोलटोलमा सिकाइ केन्द्र स्थापना गरेर पढाउन थालेको छ । विद्यालयमा सामूहिक रूपमा पढाउन सकिने अवस्थान नरहेपछि टोलटोलमा सिकाइ केन्द्र राखेर थोरै–थोरै विद्यार्थीलाई पढाउन थालिएको हो ।

प्रावि तहमा चार र निमावि तथा माविमा आठ गरी १२ सिकाइ केन्द्र सञ्चालन गरेर असोज १ गतेदेखि पढाइ थालिएको प्रधानाध्यापक मीनबहादुर ओलीले बताए । गाउँपालिकाका डाँडागाउँ, दुबाङ, ढाडापीपल, बजारी, रागेडाँडा रातामाटा, झुलेरी, झ्यामबारी, घुसखोला, झ्यारीबाङ र ज्यामिरेचौरमा सिकाइ केन्द्र स्थापना गरिएको छ । एक केन्द्रमा प्रावि तहमा २५ र निमावि तथा माविमा ८५ जनासम्म विद्यार्थी राखेर पढाउन सुरु गरिएको ओलीले जानकारी दिए । उक्त विद्यालयमा ९ सय विद्यार्थी छन् । एक सिकाइ केन्द्रमा दुई शिक्षकले चार घण्टा विद्यालयले तयार पारेको वैकल्पिक पाठयक्रमका आधारमा पढाइरहेको ओलीले जानकारी दिए ।

केन्द्रमा शनिबारबाहेक सबै दिन पढाइ हुने गरेको विद्यालयका शिक्षक वीरेन्द्र चन्दले बताए । ‘बालबालिकाले धेरै कुरा बिर्सिसकेका थिए,’ उनले भने, ‘कक्षा सञ्चालन गरेपछि पुनः सिक्न थालेका छन् । उनीहरूको आनीबानीमा समेत सुधार आएको छ ।’

गाउँपालिका अध्यक्ष निमबहादुर केसीले गाउँपालिकामा रहेका ३३ विद्यालयमै सिकाइ केन्द्र स्थापना गरेर टोलटोलमा पढाउने तयारी भइरहेको बताए । कतिपय विद्यालयमा अहिले पनि क्वारेन्टाइन तथा आइसोलेसन रहेकाले समुदायमा पढाउनुपरेको उनले जानकारी गराए ।

प्रकाशित : आश्विन ६, २०७७ १३:२६
प्रतिक्रिया
पठाउनुहोस्

क्षतिग्रस्त टावर नबनाइँदा राक्सिराङमा टेलिकमको मोबाइल सेवा ठप्प

सुवास विडारी

मकवानपुर — चार महिनाअघि हावाहुरीले बिगारेको टावर मर्मत नगरिँदा मकवानपुरको विकट भेग राक्सिराङ गाउँपालिका–१ मा नेपाल टेलिकमको मोबाइल सेवा ठप्प भएको छ । 

जेठ १३ गतेको हावाहुरीले राक्सिराङ–२ स्थित भाँटीथुम्कीमा रहेको टावरमा क्षति पुर्‍याएको हो । नेटवर्क नै टिप्न छाडेपछि स्थानीयले टावर मर्मतका लागि टेलिकमलाई पटकपटक आग्रह गर्दा पनि बेवास्ता गरिएको स्थानीयको गुनासो छ ।

राक्सिराङ–१ का इन्द्रुङ, बरेटार, बिरालीटार, बाराङ, कुभिन्टार, घ्याङसिङटार, भुमेथुम, हेटौंडा–१९ का सिरानचोक, कुवापानी, बेसीटोल, बाँसघारी, सेरसेर, खोल्माडाँडालगायत क्षेत्रमा जेठ १३ देखि टेलिकमको नेटवर्क नरहेको वडाध्यक्ष कान्छाराम रुम्बाले जानकारी दिए ।

पटकपटक आग्रह गर्दा पनि टावर मर्मत नगरिएपछि रुम्बाको नेतृत्वमा करिब ३ दर्जन स्थानीय नेपाल टेलिकमको हेटौंडा शाखामा डेलिगेसनसमेत गइसकेका छन् । नेपाल टेलिकम हेटौंडाका इन्जिनियर रितिक तिवारीले टावर निर्माणका लागि केही दिनमै प्राविधिक पुग्ने बताए । नयाँ टावर निर्माणका लागि पनि सर्भेको तयारी भइरहेको टेलिकमले जनाएको छ ।


प्रकाशित : आश्विन ६, २०७७ १२:५५
पूरा पढ्नुहोस्
प्रतिक्रिया
पठाउनुहोस्
×