ठेकेदारले काम नगर्दा बाफुखोला स्वास्थ्यचौकी भवन अलपत्र- कर्णाली - कान्तिपुर समाचार

ठेकेदारले काम नगर्दा बाफुखोला स्वास्थ्यचौकी भवन अलपत्र

विप्लव महर्जन

सल्यान — बागचौर नगरपालिका–१२ बाफुखोलामा निर्माणाधीन स्वास्थ्यचौकी भवन सम्झौता अवधि सकिँदा पनि पूरा हुन सकेको छैन । भवन बनाउने जिम्मा पाएको एडी बिल्डर्सले एक वर्षयता काम अलपत्र छाडेको छ ।

१६ कोठे दुईतले भवन दुई वर्षमा सम्पन्न गरिसक्नुपर्नेमा ठेकेदार कम्पनीले लापरबाही गर्दै आएको स्वास्थ्यचौकी इन्चार्ज विनोद केसीले बताए । उनका अनुसार अहिलेसम्म झन्डै ६० प्रतिशत काम मात्र सकिएको छ ।

२०७४ असोज ८ गते सम्झौता भएको योजना २०७६ असोज ८ सम्म सक्नुपर्नेमा काम रोकिएको एक वर्ष बित्दा पनि ठेकेदार सम्पर्कमा नआएको केसीले बताए । ‘भवन निर्माण बीचैमा रोकिएपछि पुरानो तथा पानी चुहिने भवनबाट सेवा दिनुपरेको छ । भवन पुरानो भएकाले सुत्केरी सेवा सञ्चालनमा सबैभन्दा बढी समस्या छ,’ उनले भने । कोठा अपुग भएकाले गर्भ जाँच र स्टोरका लागि कोठा भाडामा लिएर काम चलाइरहेको केसीको भनाइ छ ।

बागचौर नगरपालिका–१२ का वडाध्यक्ष दीपक ओलीले ठेकेदारले विभिन्न बहाना बनाउँदै भवन निर्माणको काम अलपत्र पारेको बताए । ‘दुईतले भवनको ढलान भएर अहिले बाहिरबाट हेर्दा प्लास्टर भएको देखिन्छ,’ उनले भने, ‘तर झ्यालढोका, माथिल्लो तलामा कोठा निर्माण, रंगरोगन, बाइरिङलगायत धेरै काम बाँकी छन् ।’ उनका अनुसार ठेकेदारलाई पटकपटक सम्पर्क गर्न खोज्दा उनी फोन स्विचअफ गरेर बस्ने गरेका छन् । प्रमुख जिल्ला अधिकारीकहाँ गएर ताकेता गर्न लगाए पनि काम हुन भएको छैन ।

एडी बिल्डर्स कम्पनीका ठेकेदार चन्द्रबहादुर ओलीले भने लकडाउनका कारण समयमै निर्माण सामग्री ल्याउन नसकेको र बर्खामा बाटो अवरुद्ध भएकाले काम प्रभावित भएको बताए । ‘समयमै काम सम्पन्न गराउने प्रयत्न गर्दागर्दै विभिन्न अवरोधले गर्दा ढिलाइ भयो,’ उनले भने ।

प्रकाशित : भाद्र २८, २०७७ १४:०७
प्रतिक्रिया
पठाउनुहोस्

लमजुङमा १६ सैनिकसहित २७ जनामा कोरोना पुष्टि

आश गुरुङ

लमजुङ — लमजुङमा आइतबार १६ जना सैनिकसहित २७ जनामा कोरोना संक्रमण पुष्टि भएको छ ।

प्रदेश जनस्वास्थ्य प्रयोगशालामा परीक्षण गरिएकामध्ये १६ जना नेपाली सैनिकमा कोरोना संक्रमण पुष्टि भएको जिल्ला प्रशासन कार्यालय लमजुङले जनाएको छ । उनीहरु सबै सुन्दरबजार नगरपालिका–९, सिउँडीबारस्थित नेपाली सेनाको कृषि तथा व्यवसायिक तालिम केन्द्रमा कार्यरत रहेका नेपाली सेनाको उदिपुरस्थित श्रीजंग गणका गणपति प्रमुख सेनानी जयराम थापाले बताए ।

उनका अनुसार गत भदौ ६ गते पीसीआर परीक्षणका क्रममा उक्त तालिम केन्द्रका २० जनामा कोरोना संक्रमण पुष्टि भएको थियो । नमुना सामुदायिक अस्पताल सुन्दरबजारको आइसोलेसनमा रहेका २२ जनामध्ये ६ जना कोरोना संक्रमण निको भएर फर्किसकेका छन् । तालिम केन्द्रका २० जना सैनिकमा गत भदौ ६ गते कोरोना पुष्टि भएको थियो । तालिम केन्द्रमा कार्यरत एक सैनिक साउन २९ गते बाग्लुङस्थित घर गएको बेला ज्वरो आउने र खोकी लाग्ने भएर अस्पताल भर्ना भएपछि पीसीआर परीक्षण गर्दा कोरोना पुष्टि भएको थियो ।

तालिम केन्द्रमा कार्यरत करिब ६० जनालाई पहिलो चरणमा ३० जना र पछिल्लो चरणमा ३० जनाको पीसीआर विधिबाट कोरोना परीक्षण गरिएको थियो । कोरोना परीक्षण गरिएकामध्ये हालसम्म तालिम केन्द्रका ३७ जना सैनिकमा कोरोना संक्रमण पुष्टि भएको छ । आइतबार कोरोना पुष्टि भएका १६ जनालाई आइसोलेसनमा लैजाने तयारी गरिएको छ ।

प्रमुख जिल्ला अधिकारी कृष्णप्रसाद शर्माका अनुसार कन्ट्याक्ट ट्रेसिङबाट प्रदेश जनस्वास्थ्य प्रयोगशाला पोखरामा परीक्षण गरिएकामध्ये तालिम केन्द्रका १६ जना सैनिक, बेंसीसहर नगरपालिका २ घर भइ चितवन मेडिकल कलेजको प्रयोगशालाबाट परीक्षण गरिएका १ जना पुरुष, कन्ट्याक्ट ट्रेसिङबाट प्रदेश जनस्वास्थ्य प्रयोगशालामा परीक्षण गरिएका सुन्दरबजार नगरपालिका–७ र ९ का ३ जना पुरुष, सुन्दरबजार नगरपालिका–९ का २ जना महिला, होटल क्वारेन्टाइनमा बसी परीक्षण गरिएका सुन्दरबजार–५ र ९ का ४ जना साथै होम क्वारेन्टाइनमा बसेका सुन्दरबजार–९ का एक पुरुष रहेका छन् ।

जिल्ला प्रशासन कार्यालयले लमजुङमा हालसम्म ३ सय १२ जनामा कोरोना संक्रमण पुष्टि भएको बताएकाे छ । यसमा १ सय ३९ जना निको भइसकेका छन् । कोरोना संक्रमित अहिले बेंसीसहरको सहजीस्थित सहरी विकास कार्यालयको आइसोलेसन, लमजुङ जिल्ला सामुदायिक अस्पताल, सुन्दरबजारको नमुना सामुदायिक अस्पताल र कृषि क्याम्पसको आइसोलेसनमा रहेका छन् ।

प्रकाशित : भाद्र २८, २०७७ १३:५४
पूरा पढ्नुहोस्
प्रतिक्रिया
पठाउनुहोस्
×