मध्यपहाडी लोकमार्गको सडक भासियो- कर्णाली - कान्तिपुर समाचार

मध्यपहाडी लोकमार्गको सडक भासियो

हरि गौतम

रुकुम पश्चिम — मध्यपहाडी लोकमार्ग कालोपत्रेको काम सकिएको एक वर्षमै सडकमा समस्या आउन थालेको छ । कालोपत्रे गरिएको मुसीकोट खण्डमा सडक भासिनुका साथै चिरा परेको छ ।

मध्यपहाडी लोकमार्ग योजना कार्यालयले १४ किलोमिटर लामो उक्त खण्डको कालोपत्रेको जिम्मा कालिका कन्स्ट्रक्सनलाई दिएको थियो । ‘कम्पनीले काम सकेर हिँडिसक्यो, यता भने सडक भासिन सुरु भएको छ,’ मुसीकोट नगरपालिका नगरप्रमुख देवीराम गौतमले भने, ‘सडक कति भासिएको छ भन्नेबारे अध्ययन गरेर मर्मतको काम गर्न हामीले सम्बन्धित निकायमा भनिसकेका छौं ।’ सडक भासिनुका साथै विभिन्न स्थानमा चिरासमेत परेका उनले बताए ।

सडक भासिएपछि सवारी चलाउनसमेत जोखिम बढेको छ । मुसीकोटका स्थानीय यज्ञबहादुर ओलीले धेरै ठाउँमा जोखिम उठाएर गाडी गुडिरहेका बताए । ‘सडक कालोपत्रे नहुँदा कच्ची सडकका कारण जोखिम बढी थियो, अब भने भासिएका कारण जोखिम बढ्दै गएको छ,’ उनले भने, ‘भासिएका कतिपय ठाउँमा ग्राभेल हालिएको छ, त्यसले गर्दा झन् बिजोग भएको छ ।’

लोकमार्गमा गाडी चलाउने चालक विजय विकले कालोपत्रे भएको सडक भाँसिदा समस्या भएको बताए । धेरै ठाउँमा सडकको संरचना फेर्नुपर्ने गरी सडक भासिएको उनको भनाइ छ । मुसीकोट नगरपालिकाको शितलपोखरीदेखि रिनदहसम्मको खण्ड एक वर्षअघि कालोपत्रे गरिएको हो । रुकुम पूर्वको भूमे गाउँपालिका–१ नम्बर क्षेत्रदेखि बाग्लुङको सिमानासम्मको कालोपत्रेको काम पनि गत वर्ष सकिएको थियो । अन्य खण्डमा कालोपत्रको काम भइरहेको छ । मुसीकोट नगरपालिकाका नगर प्रमुख गौतमले समयमै समस्याग्रस्त सडकको अध्ययन गरी मर्मतको काम गर्नुपर्ने बताए । ‘भासिँदै गएको सडकले समस्या हुने देखिएको छ,’ उनले भने, ‘यसको सुधार वा व्यवस्थापन के हुन्छ त्यो गर्न भनि पठाइएको छ ।’

लोकमार्गको दैलेख योजना कार्यालयले भासिएको ठाउँको मर्मतसम्भार हुने जनाएको छ । सूचना अधिकारी इन्जिनियर तुलाराम शर्माले ठूलो पानी परेर, पहिरो झरेर, सडक भासिएको र त्यसको चाँडै पनर्निर्माण गरिने हुने बताए । सम्बन्धित निर्माण कम्पनीबाटै काम गराइने उनको भनाइ छ । ‘सडक भासिएको ठाउँको बिमा दाबी गरिएको छ, बिमाका प्रतिनिधिहरु आएर मूंल्याकन गरेपछि मर्मतको काम सुरु हुनेछ,’ उनले भने ।

रुकुम पश्चिम र रुकुम पूर्व गरी १ सय २३ किलोमिटर लामो सडक खण्डमध्ये आगामी वैशाखसम्म पछिल्लो पटक ठेक्का लागेको बाहेक काम सकिने शर्माले बताए । सेरीगाउँ–हासिवाङ खण्डको भने भर्खरै काम सुरु भएको छ । ३० महिनामा सक्ने गरी सम्झौता भएकाले यो खण्ड बाहेकको खण्ड वैशाखसम्म पूर्ण रुपमा कालोपत्रे भइसक्ने योजना कार्यालयले जनाएको छ ।

प्रकाशित : भाद्र २८, २०७७ १३:०१
प्रतिक्रिया
पठाउनुहोस्

सिन्धुपाल्चोक पहिरो : नाै शव भेटिए, अझै २२ जना बेपत्ता [अपडेट]

अनिश तिवारी

सिन्धुपाल्चोक — बाह्रबीसे नगरपालिका–७ मा दुइटा बस्ती बगाउने गरी शनिबार राति खसेको पहिरोमा बेपत्तामध्ये अहिलेसम्म नाै जनाको शव फेला परेको छ । अझै २२ जना बेपत्ता छन् । राति तीन बजेतिर बस्तीमाथिको घट्टे खोला उर्लिंदा खसेको पहिरोमा भिरखर्कका १० र नागपुजे गाउँका सात घर पुरिएका छन् ।

प्रहरी नायब उपरीक्षक प्रकाश सापकोटाका अनुसार अहिलेसम्म मृत्यु हुनेमा नागपुजेका ६२ वर्षीया भक्तिमाया श्रेष्ठ, ९८ वर्षीया ट्याक्सी शेर्पा र ४२ वर्षीया ज्ञानीमाया प्रधान तथा भिरखर्कका २३ वर्षीया जुनु विक, २४ वर्षीय शुकलाल विक, ८ वर्षीय सन्देश विक, ६० वर्षीया सर्किनी नेवार, ६५ वर्षका धनलाल विक र ६० वर्षीया हिरामाया नेवार छन् ।

बाह्रबीसे–७ का वडाध्यक्ष मीनबहादुर श्रेष्ठका अनुसार पहिरोले जमिन भास्सिएर अझ ठूलो पहिरो आउँदा भिरखर्कको माथिल्लो विक टोल, नेवार टोल, तामाङ टोलको नामोनिसान मेटिएको छ । माथिल्लो टोलका घाइतेलाई दुई घण्टापछि मात्रै उद्धार गरेर बाह्रबीसे प्राथमिक स्वास्थ्य केन्द्रमा ल्याइएको छ । श्रेष्ठका अनुसार पहिरोमा अझै २२ जना बेपत्ता छन् । उनीहरूको नेपाली सेना, सशस्त्र र जनपद प्रहरीको संयुक्त टोलीले खोजी गरिरहेको छ ।

पल्लोछेउदेखि वारि भिरखर्कसम्म पहिरो खसिरहेकाले शोकाकुल स्थानीय तल्लो भेगमा बसाइँ सर्दैछन् । भिरखर्क र नागपुजेका गरी ५८ परिवारलाई सुरक्षित स्थानतिर लगिँदै छ । उद्धारकार्यमा खटिइरहेका इलाका प्रहरी बाह्रबीसेका प्रहरी निरीक्षक नवराज न्यौपानेले बाह्रबीसे प्राथमिक स्वास्थ्य केन्द्र लगिएका भिरखर्कका तीन घाइतेलाई काठमाडौं रिफर गरिएको जानकारी दिए ।

सभामुख पुगे

सभामुख अग्नि सापकोटा आइतबार सुरक्षाकर्मीसहित घटनास्थल पुगेर स्थानीयको अवस्था र उद्धारकार्यबारे जानकारी लिएका छन् । शोकाकुल स्थानीयलाई आश्वासन दिँदै उनले पहिरो आउनुको कारण र थप जोखिमको अवस्थाबारे स्थानीय जनप्रतिनिधिसँग छलफल गरेका थिए ।

प्रकाशित : भाद्र २८, २०७७ १२:४९
पूरा पढ्नुहोस्
प्रतिक्रिया
पठाउनुहोस्
×