गमगढी-नाक्चेनाङ्ला सडकमा १२ ठाउँमा पहिरो
मुगु — गमगढी–नाक्चेनाङ्ला सडकखण्डमा १२ ठाउँमा पहिरो खसेपछि यातायात अवरुद्ध भएको छ । अविरल वर्षापछि गमगढी–नाक्चेनाङ्ला सडकखण्डका करिब १२ ठाउँमा पहिरोले सडक अवरुद्ध गरेको मुगुमकार्मारोङ गाउँपालिका ओभरसियर राजबहादुर रावलले जानकारी गराए ।
लगातार वर्षापछि उक्त सडकखण्डको सालीम गार्ड, अल्कासाँधु, भियालबाडामा, तरासीपाखा, माग्रीगाउँलगायतका ठाउँमा पहिरो खसेको हो ।
डोजर लगाएर पहिरो नपन्छाएसम्म सवारी साधन नचल्ने र स्थानीयलाई हिँडडुल गर्नसमेत कठिन हुने मुगुमकार्मारोङ गाउँपालिका प्रमुख छिरिङक्याप्ने लामाले बताए । वर्षा रोकिएपछि डोजर लगाएर पहिरो पन्छाउने कामलाई तीव्रता दिइने उनले बताए ।