मुगुका १२ गाउँ पहिरोको उच्च जोखिममा- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

मुगुका १२ गाउँ पहिरोको उच्च जोखिममा

राजबहादुर शाही

मुगु — मुगुका १२ वटा गाउँ पहिरोको उच्च जोखिममा छन् । रिघा, कम्फा, चराप, कालापाल्ता, रावलबाडा, भियालबाडा, माग्री, गमगढी, गाडेखोला, भटडाडी, चरापलगायत बस्ती पहिरोको जोखिममा परेका हुन् ।

छायानाथरारा नगरपालिकास्थित २१ घरधुरी रहेको भियालबाडा दलित बस्तीमा वर्षा सुरु भएसँगै गाउँमाथिबाट पहिरो खस्ने क्रम जारी छ । गाउँमुनि कर्णाली नदीले जमिन कटान गर्न थालेपछि स्थानीयबासी त्रसित बनेका छन् ।

केही घरहरु पहिरोले पुरिन थालेपछि नजिकैको लुम्सबगरमा बस्न थालेको स्थानीय नन्दबहादुर नेपालीले बताए । उनका अनुसार नजिकैको भटडाडीगाउँमा पनि पहिरोको त्रास छ । गाउँमुनिबाट पहिरो खस्‍न थालेपछि कम्फाका ४२ परिवार पनि त्रासै त्रासमा घरमा बस्न बाध्य भएको उनले जानकारी दिए ।

खत्याड गाउँपालिका–७ र ८ स्थित रिघागाउँ पहिरोको उच्च जोखिममा परेपछि ठूलो वर्षा हुँदा स्थानीयबासी पिपलचौतारामा जम्मा भएर बस्ने गरेका छन् । २ वर्षअघि गाउँमाथिबाट खसेको पहिरोले १४ घर पुरेको थियो । ‘फेरि ठूलो पहिरो आएर गाउँ नै पुर्ने हो कि भन्‍ने चिन्ता छ,’ स्थानीय मनोज गिरीले भने, ‘पहिरोको डरले धेरै रात अनिदो बसियो ।’

ताल्चा विमानस्थलको ढल कालापाल्ता बस्तीमा पस्‍न थालेपछि एक दर्जन स्थानीयको जग्गा पहिरोले बगाएको छ । पहिरोको जोखिम बढ्दै गएपछि पानी परेको रात जाग्राम बस्ने गरेको स्थानीय प्रविण रावलले गुनासो गरे ।

बाढी–पहिरो जानसक्ने क्षेत्रमा पूर्वतयारी थालिएको प्रमुख जिल्ला अधिकारी कृष्णकुमार निरौला बताउँछन् । ‘प्रकोप भए ठूलो क्षति नहोस् भनेर उद्धार टोली तयारी अवस्थामा राखेका छौं,’ उनले भने, ‘सबै स्थानीय तहमा विपद् व्यवस्थापन समिति गठन गरी पूर्वतयारीका लागि क्रियाशील बनाइएको छ ।’

प्रकाशित : श्रावण ३१, २०७७ १४:१३
प्रतिक्रिया
पठाउनुहोस्

निषेधाज्ञापछि सुनसान नारायणगढ [तस्बिरहरु]

रमेशकुमार पौडेल

चितवन — भरतपुर महानगरपालिकाभित्र लागू भएको निषेधाज्ञाका कारण चितवन जिल्लाको मुख्य बजार क्षेत्र नारायणगढ र भरतपुर सुनसान भएको छ । सडकमा अत्यावश्यक सेवा बाहेकका गाडीहरु चलेको देखिँदैन ।

पैदलयात्रुहरु पनि निकै नै कम छन् । बजार क्षेत्र पूरै बन्द छ । महानगरपालिकाभित्र शुक्रबार मध्यरातदेखि भदौ ५ गते मध्यरातसम्म चितवन जिल्ला प्रशासन कार्यालयले निषेधाज्ञा घोषणा गरेको छ ।

चितवनमा पछिल्ला दिनहरुमा कोरोना भाइरसको संक्रमण तीव्र हुन थालेसँगै महानगरपालिकाभित्र लागू हुने गरेर निषेधाज्ञा गर्ने निर्णय भएको हो । शुक्रबार बिहान महानगरपालिकामा प्रहरी र प्रशासनको पनि संयुक्त बैठक बसेर भएको छलफलले यस्तो निर्णय लिएको भएको भरतपुर–१० का वडाध्यक्ष तथा महानगरपालिकाका प्रवक्ता अरुणपीडित भण्डारीले जानकारी दिए ।

निषेधाज्ञा पालना गराउनका लागि ठाउँ–ठाउँमा सुरक्षाकर्मी तैनाथ छन् । उद्योगी तथा व्यवसायीहरुको संस्था चितवन उद्योग वाणिज्य संघ र उद्योग संघ चितवनले शुक्रबार नै छुट्टाछुट्टै विज्ञप्ति निकालेर लकडाउन पालना गर्न समस्त उद्योगी व्यवसायीहरुलाई अपिल गरेका थिए ।

चितवनमा साउन २१ यता कोरोना भाइरसको संक्रमण तीव्र हुन थालेको छ । भरतपुर अस्पतालका सूचना अधिकारी लिलाधर पौडेलका अनुसार शुक्रबारसम्म जिल्लाभर संक्रमितको संख्या १७२ पुगेको छ ।

यीमध्ये ५६ जना साउन २१ यता मात्रै संक्रमित भएका हुन् । बजार, बैंक, अस्पताल, प्रहरी जताततै संक्रमण पुगेको छ । जिल्लाको आधा क्षेत्रफल र जनसंख्या रहेको भरतपुर महानगरपालिकामा सबैभन्दा धेरै संक्रमितहरु रहेका छन् ।


प्रकाशित : श्रावण ३१, २०७७ १४:००
पूरा पढ्नुहोस्
प्रतिक्रिया
पठाउनुहोस्
×