जसपाका कर्णाली प्रदेश महासचिवको निधन
वीरेन्द्रनगर — जनता समाजवादी पार्टी (जसपा) का कर्णाली प्रदेश महासचिव पञ्चसिंह रोकायाको निधन भएको छ । गत चैतदेखि मुखको क्यान्सरबाट पीडित उनको सोमबार बिहान वीरेन्द्रनगर नगरपालिकाको लाटीकोईलीस्थित आफ्नै घरमा निधन भएको हो ।
पाँच वर्षअघि कलेजो ट्रान्सप्लान्ट गरी निको भएका उनलाई मुखको खटिरा क्यान्सरले गत चैतमा ग्रसित बनाएको थियो । क्यान्सर भएपछि उनी उपचार गरेर घरमै बसिरहेका थिए ।
नेपाल आदिवासी जनजाति महासंघ सुर्खेतका अध्यक्षसमेत रहेका रोकाय वौद्ध ग्रामीण वहुउद्देश्यीय सहकारी संस्थाका अध्यक्षसमेत रहेर जिम्मेवारी सम्हालिरहेका थिए । उनका दुई छोरा र एक छोरी छन् ।
प्रकाशित : श्रावण २६, २०७७ १२:४२