चन्दननाथ र तिलामा निषेधाज्ञा- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

चन्दननाथ र तिलामा निषेधाज्ञा

एलपी देवकोटा

जुम्ला — थप ६ जनामा कोरोना संक्रमण पुष्टि भएपछि चन्दननाथ नगरपालिका र तिला गाउँपालिकामा निषेधाज्ञा जारी गरिएको छ । समुदायस्तरमा संक्रमण फैलिएको भन्दै जिल्ला प्रशासन कार्यालय जुम्लाले २ स्थानीय तहमा निषेधाज्ञा जारी गरेको हो ।

कार्यालयका अनुसार चन्दननाथ नगरपालिकाको पूर्वमा दानसाँघु, पश्चिममा उमगाड, उत्तरमा कर्णाली प्राविधिक शिक्षालय र दक्षिणमा तिलानदी क्षेत्रमा निषेधाज्ञा जारी गरिएको छ । त्यस्तै, तिला गाउँपालिका–५, ढिमकोटसहित पूर्वमा चुलाकोट, पश्चिममा जुगामूल, उत्तरमा डुड्ग्री र दक्षिणमा खोलीगाउँको क्षेत्रलाई सिल गरिएको हो । दुवै स्थानीय तहमा अर्को निर्णय नभएसम्मका लागि निषेधाज्ञा लागू गरिएको प्रमुख जिल्ला अधिकारी भुपेन्द्र थापाले बताए । उनका अनुसार पालिकाहरुमा स्वास्थ्य सेवाबाहेक सम्पूर्ण क्रियाकलाप बन्द गरिएको छ ।

संक्रमण देखिएकाहरुको कन्ट्याक्ट ट्रेसिङ सुरु भइसकेको स्वास्थ्य सेवा कार्यालयले जनाएको छ । कार्यालयका अनुसार कर्णाली स्वास्थ्य विज्ञान प्रतिष्ठानमा पछिल्लो पटक गरिएको पीसीआर परीक्षणको क्रममा चन्दननाथ नगरपालिकाको विजयनगर, डाँडाकोट, आचार्यबाँडा र तिला गाउँपालिकाको ढिमकोटका स्थानीयमा संक्रमण देखिएको थियो ।

प्रकाशित : श्रावण २५, २०७७ १७:२७
प्रतिक्रिया
पठाउनुहोस्

मकवानपुरमा एकैदिन ५ प्रहरीसहित २३ जनामा कोरोना पुष्टि

सुवास विडारी

मकवानपुर — मकवानपुरमा एकैदिन पाँच प्रहरीसहित २३ जनामा कोरोना संक्रमण पुष्टि भएको छ । हेटौंडा–१० स्थित किटजन्य रोग अनुसन्धान तथा तालिम केन्द्रस्थित प्रादेशिक प्रयोगशालामा गरिएको पीसीआर परीक्षणबाट आइतबार २३ जनामा कोरोना संक्रमण पुष्टि भएको हो ।

संक्रमितमध्ये ६ महिला र १७ जना पुरुष रहेका छन् ।

हेटौंडा–४ स्थित आइसोलेसन वार्डका इन्चार्ज भोला चौलागाईंका अनुसार हेटौंडाका विभिन्न प्रहरी चौकीमा कार्यरत ५ जना प्रहरी, हेटौंडा उपमहमानगभित्रका १६ जना स्थायी बासिन्दा, विराटनगर घर भएर हेटौंडा बस्दै आएका एक जना र बकैया गाउँपालिका–४, स्थायी घर भएर हाल हेटौंडाको एक सहकारीमा कार्यरत महिलामा कोरोना संक्रमण पुष्टि भएको हो । उनका अनुसार संक्रमित सबै जनालाई आइसोलेसनमा राख्ने तयारी भइरहेको छ ।

१२९ जनाको स्वाब परीक्षण गरिएकोमा २३ जनामा संक्रमण पुष्टि भएको हो । यो सँगै मकवानपुरमा संक्रमितको संख्या ७७ पुगेको छ जसमध्ये २९ जना डिस्चार्ज भइसकेका छन् ।

प्रकाशित : श्रावण २५, २०७७ १७:२६
पूरा पढ्नुहोस्
प्रतिक्रिया
पठाउनुहोस्
×