लेखापाल, श्रीमती र भतिजाको खातामा जम्मा भएको सरकारी रकम फिर्ता- कर्णाली - कान्तिपुर समाचार

लेखापाल, श्रीमती र भतिजाको खातामा जम्मा भएको सरकारी रकम फिर्ता

हरि गौतम

रुकुम पश्चिम — त्रिवेणी गाउँपालिकाका लेखापाल हेमन्त केसी उनकी श्रीमती विर्मा र भतिजा सुवासको खातामा जम्मा भएको सरकारी रकम फिर्ता भएको छ । तीन दिनमा ४ पटक गरी गाउँपालिकाको सञ्चित खातामा २४ लाख ९२ हजार ३ सय ७२ रुपैयाँ फिर्ता भएको हो ।

यसअघि २ दिन ३ पटक र बुधबार गरी उक्त रकम गाउँपालिकाको खातामा जम्मा भएको हो । साउन १६ गते ७ लाख ८२ हजार ५ सय ९५, साउन १९ गते ६ लाख र सोही दिन ८ लाख ५९ हजार ७ सय ७७ तथा साउन २१ गते २ लाख ५० हजार रुपैयाँ गाउँपालिकाको खातामा जम्मा भएको हो । यी ३ जनाको खाताबाट उक्त रकम गाउँपालिकाको खातामा जम्मा भएको गाउँपालिकाले जनाएको छ ।

आर्थिक वर्ष २०७६/०७७ मा लेखापाल केसीले विभिन्न शीर्षकको सरकारी रकम आफू, श्रीमती र त्रिवेणीमै लेखा सहयोगीको काम गर्ने भतिजा सुवासको नाममा जम्मा गरेको खुलेको थियो । विभिन्न शीर्षक र तीन जनाको खातामा जम्मा गरेको पाइएपछि कार्यपालिकाले त्यसको अनुसन्धान समेत थालेको थियो । कार्यपालिकाले अनुसन्धान गर्ने भन्ने निर्णय गरेपछि उक्त रकम गाउँपालिकाको खातामा जम्मा गर्न सुरु भएको बताइएको छ ।

सरकारी रकम आफ्नो, श्रीमती र भतिजाको खातामा जम्मा गरेको विषयमा प्रशासनले समेत छानविन थालेको छ । बुधबार जिल्ला प्रशासन कार्यालयको ३ सदस्यीय टोलीले गाउँपालिकामै पुगेर आगजात अध्ययन तथा स्टेटमेन्ट अध्ययन थालेको हो ।

मंगलबार इकान्तिपुरमा यो सम्बन्धिको समाचार प्रकाशन भएको थियो । त्यसपछि जिल्ला प्रशासन कार्यालयले छानबिन सुरु गरेको हो । एक जना अधिकृत, एक जना मुद्दा फाँटवाला र एक जना लेखापाल गरी ३ सदस्यीय छानबिन समिति बनाइएको प्रमुख जिल्ला अधिकारी उपेन्द्रराज पौड्यालले बताए । उनले अख्तियारको दुरुपयोग भएको पाइए कानून बमोजिम सजाय हुने पनि बताएका छन् ।

प्रकाशित : श्रावण २१, २०७७ २०:१५
प्रतिक्रिया
पठाउनुहोस्

रामेछापका दुई पालिकाले विद्यालयबाट हटाए क्‍वारेन्टाइन

टीकाप्रसाद भट्ट

रामेछाप — भदौ १ गतेदेखि विद्यालय संचालन गर्ने तयारीका लागि रामेछापका २ गाउॅपालिकाले विद्यालयबाट क्वारेन्टाइन हटाएका छन् । खाँडादेवी र दोरम्बा गाउॅपालिकाका विभिन्न विद्यालयहरुलाई खाली गराइएको छ । खाँडादेवीले केही समय अगावै विद्यालयबाट क्‍वारेन्टाइन हटाएको थियो ।

दोरम्बाले हालै विद्यालयबाट क्वारेन्टाइन बेड हटाएको छ । दोरम्बा गाउॅपालिकाका अध्यक्ष कमानसिं मोक्तानका अनुसार अहिले क्वारेन्टाइन राखेका विद्यालयहरुलाई निर्मलीकरण गर्ने काम भइरहेको छ ।

विद्यालयबाट क्वारेन्टाइन हटाएपछि उक्त गाउॅपालिकाहरुले वैकल्पिक व्यवस्थाका लागि बेग्लाबेग्लै तयारी गरेका छन् । खाँडादेवी गाउॅपालिकाका अध्यक्ष प्रेमबहादुर तामाङका अनुसार विद्यालयको साटो बेग्लै क्वारेन्टाइन बनाइसकिएको छैन । ‘भूकम्पपछि पुनर्निर्माण गरिएका निजी आवासहरु खाली रहेको स्थानमा तिनैलाई क्‍वारेन्टाइन बनाउने गरी तयारी गरिरहेका छौं’, तामाङले भने । उनका अनुसार स्वास्थ्य चौकी नजिकैका निजी आवासहरुमा क्वारेन्टाइन राख्ने गरी सामग्री तयारी अवस्थामा राखिएका छन् । पालिकाले बेड लगाएका सामग्री भण्डार गरी राखेको तामाङले बताए । उनका अनुसार जहाँ आवश्यक हुन्छ, त्यस्तो स्थानमा क्वारेन्टाइन कक्ष राख्ने तयारी पालिकाको छ ।

दोरम्बामा भने फरक निर्णय भएको छ । विद्यार्थी संख्या न्यून भएर विगतमा मर्जरमा गएको खाली विद्यालय भवन अबको क्वारेन्टाइन कक्ष हुनेछ । दोरम्बामा त्यस्तो भवनलाई धमाधम सुधार गरेर क्वारेन्टाइनको रुपमा विकास गर्न लागिएको अध्यक्ष मोक्तानले बताए । मोक्तानका अनुसार अव पालिकाका अन्य क्षेत्रमा क्वारेन्टाइन राखिँदैन । ‘कोही नयाँ व्यक्ति आयो भने दोरम्बामा १४ दिन राखेर घर पठाउने विचारमा छौं ’ उनले भने । पालिकाले दोरम्बा स्वास्थ्य चौकीमा आइसोलेसन राखेको छ ।

प्रकाशित : श्रावण २१, २०७७ २०:०८
पूरा पढ्नुहोस्
प्रतिक्रिया
पठाउनुहोस्
×