पहिरोले घर बगाउँदा रुकुम पश्‍चिममा २ जनाको मृत्यु

हरि गौतम

रुकुम पश्‍चिम — बाँफिकोट गाउँपालिका–९, स्यालामा पहिरोले एक घर बगाउँदा २ जनाको मृत्यु भएको छ । रातभर परेको अविरल वर्षापछि आएको पहिरोले स्थानीय जसवीर कामीको घर बगाएको हो। पहिरोले घर बगाउँदा जसबीरका २२ वर्षीय छोरा नवीन विक र छिमेकी हस्तबहादुर सुनारका १६ वर्षीय छोरा बलबहादुर सुनारको मृत्यु भएको प्रहरीले जनाएको छ ।

जिल्ला प्रहरी प्रमुख डीएसपी ठगबहादुर केसीले नवीन र बलबहादुरको शव भेटिएको र अरु ४ जनाको उद्धार गरिएको जानकारी दिए । जसवीरकी श्रीमती ६० वर्षीया झुपी कामी, बुहारी २२ वर्षीया व्युझना कामी, नातिनी ५ वर्षीया कोपिला र ३ वर्षीया रितु कामीको उद्धार गरिएको हो । झुपीको छिन्खेतस्थित स्थानीय मेडिकलमा उपचार भइरहेको छ ।

मंगलबार बिहान ४ बजेतिर घरदेखि १० मिटरमाथिबाट आएको पहिराले उक्त घर झण्डै डेढ सय मिटर तल रहेको किमाना खोलामा पुर्‍याएको छ । घरको माथिल्लो तलामा सुतेकालाई प्रहरी र स्थानीयले जीवितै उद्धार गरेका थिए भने तल्लो तलामा सुतेका नवीन र बलबहादुर घरसँगै बगेका थिए । पहिरो हटाएर उनीहरुको शव निकालेको घटनास्थलमा रहेका प्रहरी चौकी मग्मा इन्चार्ज प्रहरी सहायक निरीक्षक हरि देवकोटाले जानकारी दिए ।

प्रकाशित : श्रावण १३, २०७७ १०:१५
प्रतिक्रिया
पठाउनुहोस्

एनसेलद्वारा पुल्चोक क्याम्पसलाई पुरस्कार रकम हस्तान्तरण

कान्तिपुर संवाददाता

काठमाडौँ — दूरसञ्चार सेवा प्रदायक कम्पनी एनसेलले ललितपुरको इन्जिनियरिङ अध्ययन संस्थान, पुल्चोक क्याम्पसलाई ‘एनसेल छात्रवृत्ति तथा उत्कृष्टता सम्मान २०७७’ अन्तर्गतको पुरस्कार रकम हस्तान्तरण गरेको छ ।

व्यावसायिक सामाजिक उत्तरदायित्वअन्तर्गत पुल्चोकका पाँच संकायका उत्कृष्ट विद्यार्थीलाई सात वर्षदेखि बर्सेनि सम्मान गर्दै आएको कम्पनीले पुरस्कारको २४ लाख रुपैयाँ क्याम्पस प्रमुख प्राडा लक्ष्मण पौडेललाई सोमबार हस्तान्तरण गरेको हो ।

इलेक्ट्रिकल, इलेक्ट्रोनिक्स, कम्प्युटर, सिभिल र मेकानिकल संकायका १८ विद्यार्थीलाई छात्रवृत्ति र ६ जनालाई दिइँदै आएको उत्कृष्टता सम्मानको जनही एक लाख नगद क्याम्पसले छिट्टै हस्तान्तरण गर्ने प्रमुख पौडेलले बताए । एनसेलका प्रमुख कार्यकारी अधिकृत एन्डी चोङले यसपटक कोभिड–१९ का कारण कार्यक्रम गर्न नपाए पनि उत्कृष्ट प्रतिभाहरूको कदर हुने भन्दै सम्बद्ध विद्यार्थीका लागि शुभकामना व्यक्त गरे । एनसेलले छात्रवृत्ति तथा उत्कृष्टता सम्मान कार्यक्रमअन्तर्गत विद्यार्थीलाई पुरस्कार दिन २०८० सम्मका लागि क्याम्पससँग सम्झौता गरेको छ ।

प्रकाशित : श्रावण १३, २०७७ १०:०४
पूरा पढ्नुहोस्
प्रतिक्रिया
पठाउनुहोस्
×